Nunap karsiata imaarutinnginnissaa pillugu aningaasanik sipaarniarneq annertoorujussuaq Naalakkersuisut saqqummiuppaat 

Tallimanngornermi ualikkut Naalakkersuisut saqqummiuppaat aningaasaqarnikkut iluarsartuussinissamut 900 mio. kr.-inik sipaarniuteqarnissamut pilersaarut.

Naalakkersuisut allapput, Kalaallit Nunaat aningaasaqarnikkut ajornartorsiorfiusumut ingerlasoq, isertitat appariartortut aningaasartuutillu qaffakkiartortut, taamaattumillu Naalakkersuisut maanna piareersimasut aningaasanut inatsisissatut siunnersuummik, ukiuni tulliuttuni sisamani hundrede millionilikkaanik sipaarniuteqartoqassalluni.

- Ukiup tullianut aningaasanut inatsisissatut siunnersuutitigut ilungersunartumik killiffeqarnitsinnik tappiffeqarluni sulineq taamaammat ersersippaa, Múte B. Egede (IA) nalunaarummi oqarpoq.

865 mio. kr.-inik nassaarniassapput

Taassuma nassuiaatigaa, Naalakkersuisut pilersaarutaat aningaasaqarnikkut oqimaaqatigiissitsiniarluni, ukiunilu tulliuttuni sisamani aningaasanut inatsisissamut siunnersuut aqqutigalugu aningaasanik katillugit 51 millionit koruuninik sinneqartooruteqarnissaq siunnerfigineqartoq: 

- Tamanna angusinnaajumallugu pisortat ingerlatsiviat akimorlugu siunnerfilimmik 469 mio. kr-nik ileqqaarniartariaqarsimavugut, isertitassanillu nutaanik pissarsilluta. Taakku saniatigut pisortani immikkoortuni tamangajavinni sinaakkutitut ileqqarutitigut 395 mio. kr-nik ilanngartiterivugut – tamannalu agguaqatigiissillugu 2,5 procentip missaanniippoq. 

- Ukiuni tullerni sisamani 864 million koruunit katillugit sipaarniarnikkut isertitassallu nutaat aqqutigalugit nassaarivagut, Múte Bourup Egede nassuiaavoq.

Naalakkersuisup oqarnera naapertorlugu pilersaarut pisariaqartoq, taamaanngippat nunatta karsia ukiut arlaqanngitsut ingerlaneranni imaarutissaaq: 

- Aningaasanik pigisatsinnit amerlanernut atuinissatsinnut akissaqarunnaarpugut, taanna erseqqissaavoq.

Siorna akileraartarnikkut oqilisaanermut sanilliullugu muminganik pisoqarpoq

Taamaalilluni aningaasanut inatsisissatut siunnersuut siornamut sanilliullugu kingullermiit allaanerulluinnarpoq, tassani Naalakkersuisut siuliisa akileraartarnikkut iluarsartuussineq aqqutigalugu 300 mio. kr.-it sinnerlugit oqilisaaneq ingerlannikuugamikku.

Tusagassiuutitigut nalunaarummi Múte Bourup Egede annertuumik sipaarniarnermut tunngaviusutut pissutaasut arlallit taavai:

- Isertitat ikiliartorput. Aalisarneq - aningaasarsiornitta annertuumik tunngavigisaa - siornatigutut iluanaarutiginngilarput. Nammineerluta ingerlatseqatigiiffitsinnit isertitat affaannanngorsimapput. 

- Aammalu akileraarutitigut isertitat ikiliartorput. Tamatuma saniatigut aningaasartuutivut qaffakkiartorput. Pingaartumik utoqqaat amerlanerulernerat pissutigalugu, utoqqalinersialinnissamut pisinnaatitaaffeqartut. Ukioqatigiiaat amerlasuut sulinermik inuussutissarsiuteqarnermit anipput, tamannalu akeqarpoq.

Suliffissarsiornermi ikiorsiissutinut malittarisassat sukaterneqarput

Naalakkersuisup erseqqissaatigaa peqqinnissaqarfik sipaarniarnermi annertunerpaamik illersorneqassasoq, tigussaasumilli tassunga tunngatillugu oqaaseqanngilaq.

Tamatuma saniatgit aningaasat eqqortumik atorneqarnissaat sakkortusisamik nakkutigineqassaaq.

- Akileraartarnermi kukkunersiuisunik akileraaruserinermik nakkutilliinermik pinerlunniarnermillu aningaasanik pissarsianik malunnarunnaasaasarnermik akiuiniarnermik samminnittussanik nutaanik atorfinitsitsinissamut aningaasaliivugut, taamaalilluta tamat nammaqatigiillutik pilersueqatigiinnerat qulakkeerparput. 

- Suliffissarsiornermi ikiorsiissutinut malittarisassat sukaterpagut: Siunissami tunngavissaqanngitsumik suliffissamik itigartitsinermi ikiorsiissutit misinnartumik apparneqarsinnaalissapput. Atugarissaarnermi nammaqatigiinnermik sanarfineqarpoq – nammaqatigiinnermimi pisinnaasut peqqissullu tamarmik nammaqataanissaat pisariaqarpoq, aningaasaqarnermut akileraartarnermullu Naalakkersuisoq Múte Bourup Egede oqarpoq.