Nuup Kangerluani aavarneq aallarteruttorpoq.
Aavartulli ilaat umiarsuarnik takornariartaatineersunit umiatsiaaqqanik pullattakkanik akornuserneqarput. Taakkummi uumasunut qimaatitsillutillu piniarnermut akornusiipput.
Nuup Kangerluani aavarneq aallarteruttorpoq.
Aavartulli ilaat umiarsuarnik takornariartaatineersunit umiatsiaaqqanik pullattakkanik akornuserneqarput. Taakkummi uumasunut qimaatitsillutillu piniarnermut akornusiipput.
Taamaattoqarnerata nunaqavissut arlallit takornariat sumunnarsinnaanerannut malittarisassaqalernissaanik ujartuilernerannik kinguneqarpoq, ingammik aavarfiup nalaani.
Umiatsiaaraq pullattagaq ataasiinnaanngitsoq, arfineq-marlulli tulleriiaarlutik takornarianik ilaasullit, Karsten Fleischer Rexip ilaqutaasalu piniariarfiannut tikipput. - Ineriartornerup kingunissai ernumassutigaakka, Karsten Fleischer Rex oqarpoq, taassumalu takornariartitsinerup qanoq aaqqissuunneqarnissaa pillugu oqaloqatigiinneq iluaqutaasoq ujartorpaa.
Assi: Nammineq pigisaq
- Umiatsiaaraq pullattagaq takornarianik angallassisoq ataaseq ajunngilaq, ullaap tungaaniilli umiatsiaaqqat arfineq-marluk tulleriiaarlutik tikerartut akornutaapput, Karsten Fleischer Rex misigisani pillugit Facebookimi quppernermini allappoq, tamannalu qisuariarfigineqangaatsiarlunilu siammarterneqartorujussuuvoq.
Piniarneq kulturitsinnut ilaavoq
Karsten Fleischer Rexip, Nuummi Dronning Ingridip Napparsimmavissuani nakorsaasup, aavarfik ukiumut pilineruinnarani ilaquttanilu sulinngiffeqarnermi pinngortitamut nukissamik aallerfiuvoq.
– Kalaallit Nunaanni aavartarneq kulturitta ilaraa pingaarutilik, kinguaariinnilu arlalinni ingerlateqqitaalluni. Katsorsaataavoq inuunermullu pitsaanerulersitsisuulluni. Takornariaqarnerlu taamatut ineriartuinnassappat kingunissai isumakuluutigaakka.
- Takornariarpassuit Kalaallit Nunaannut tikeraarlutik nunarput alutornartoq misigerusuttarmassuk nuannaraara, kisianni nunap immikkoortuisa agguataarneqarnerat pillugu pitsaasumik oqaloqatigiinnissaq ujartorpara. Taamaalilluni nunaqavissut aavartartut takornariallu inissaqartinneqarsinnaalissammata.
Karsten aamma Hanne Fleischer Rex aavartut.
Assi: Nammineq pigisaq
Nunap immikkoortunut agguarneqarnera
Borgmesterip Avaaraq Olsenip Karsten Fleischer Rexip Facebookimi allaaserisaa aamma atuarsimagunarpaa.
Nuup Kangerluata immikkoortunut agguarneqarsinnaanera pillugu innuttaasut isummersornerat tusaaneqartoq Kommuneqarfik Sermersuumilu Aningaasaqarnermut Inuussutissarsiornermullu Ataatsimiititaliap aggustip 22-ani ataatsimiinnerani qaqinneqassasoq kommune nittartakkamini allappoq.
”Anguniagaq ersarippoq: Takornariaqarneq siullertut najukkami najugaqartunut nuannaarutaassaaq iluaqutaallunilu – ilutigalugu piumasaqaatigut malillugit tikeraartut immikkuullarissunik misigisaqartissavagut. Takornariat illoqarfitsinnut iluaqutaasut, suliffeqarfitsinni pisiniartartut aamma kulturikkut neqeroorutitsinni peqataasut – kisianni aamma immikkoortunik pinngortitamik ulluinnarnilu inuunermik paarsilluarfigisinnaasatsinnik ataqqinnittut pisariaqartippagut. Immikkoortunut agguataarinninneq oqimaaqatigiissitsinermik pilersitsinissatsinnut ikorfartuissaaq,” borgmesteri Avaaraq Olsen oqarpoq.
Naalakkersuisut takornariaqarneq pillugu inatsisaanni nutaami kangerloqarfimmi immikkoortunut agguaanissaq periarfissanngornikuuvoq, taamaaliornikkut pinngortitamut najukkamilu inuaqatigiinnut naleqquttumik takornariaqarneq aqunneqarsinnaalerluni.
Nuummi immikkoortunut agguaaneq politikkikkut oqaluuserineqartuni siullersaavoq. Kommunimi illoqarfinnut allanut piareersarnerit aallartipput, piaartumillu politikkikkut oqaluuserineqarnissaannut aamma saqqummiunneqassasut naatsorsuutigineqarpoq.
