KL

DK

Nunarput piareersimava: Takornariat marloriaatinngussapput

Takornariat nunaqavissullu qanoq ilillutik ataqatigiissinnaappat? Pilersaarusiami nutaami angallannermut malittarisassanut, attartortitsisartunut, peqqissutsimik isumaginnittunut allarpassuarnullu tunngassuteqartumi apeqqut tamanna akineqarpoq

Nuummi unnuisarfinnik misissuinerup misissuinerup takutippaa, illoqarfiit pingaarnersaanni ukiut marluk qaangiuppata unnuiffissat amigaatigineqalissasut. Umiarsuilli takornariartaatit ilaasuminnut unnuiffissaqartitsisarput.
Niels Ole Qvist
Tusagassiortoq
Saqqummersinneqarpoq

Takornariartitsisarneq rekordiliiffiuvoq, 2025-milu siuariartorfiulluarnissaa naatsorsuutigineqarluni. Nunanulli tamalaanut sanilliullugit suli amerlagisassaanngillat. Takornariartitsinermut tunngasunik suliaqartut politikerillu oqaatigaat, ukiuni tulliuttuni qulini takornariaqarnerup minnerpaamik marloriaatinngornissaannut inissaqartoq.

Tamanna takornariartitsinermut periusissiami, Naalakkersuisut maanna tusarniaassutigisaani, atuarneqarsinnaavoq.

Ukiumut takornariat 140.000-it missaat timmisartumut umiarsuarmulluunniit takornariartaammut ilaallutik Nunatsinnut tikeraartarput. Taakkununnga sanilliullugit Københavnimi Rundetårnimut takornariat 790.000-iupput Islandimilu takornariat 2 millioniullutik. Nunarsuaq tamakkerlugu takornariaqarneq siuariartorpoq, Nunatsinnulli takornariat amerliartortinnissaat tuaviuuppallaarneqartariaqanngilaq, naak periarfissaqaraluartoq:

- Sukkasuumik amerliartortitsineq pitsaanerujuaannanngilaq. Inuppassuit takornariartalernissaat anguniagaanngilaq. Kikkut tamarmik malinnaasinnaasariaqarput, naalakkersuisoq Naaja Nathanielsen takornariartitsinermut periusissiami aallarniummi allappoq.

Nakkutigineqartumilli ineriartortitsinikkut suna tapertaassava? Pilersaarummut tapiliussatut

siunnersuutit suliniutillu, ilaat qaqutigoortutut isikkoqartut, ilaatigut „peqqissutsimik isumaginnittuni akiliisinnaanermut“ aamma „takornarianut tunissuteqarnissamut periarfissanik“ pilersitsinissamik eqqarsaatiginninneq, allaatigineqarput.

Aamma inuussutissalerinermut inatsit allanngortinniarlugu siunnersuuteqartoqarpoq, angerlarsimaffinni neriartoqqusisoqarsinnaalersillugulu kaffillertoqarsinnaasunngorlugu. Suliniutit allattorsimaffianni aamma eqqaaneqarpoq, meeqqat atuarfianni takornariaqarnerup fagitut atulersinneqarnissaa, aamma 10. klassimik nutaamik takornariartitsinermik sammisaqarfiusumik pilersitsisoqassasoq. Aamma nunap immikkoortuanik allanngutsaaliukkamik nutaamik pilersitsisoqarnissaa aamma eqqaaneqarpoq.

Aqqusinikkut angallannermut malittarisassat

Aqqusinikkut angallannermi isumannaatsuunissaq qulakkeerniarlugu inatsisit aamma allatigut allanngortinneqarsinnaapput:

- Takornariat tikitaminni pissutsit ulorianartullu ilisimaneq ajorpaat. Ilaatigut aqqusernit nalunaaqutsersorneqarsimasanngimmata. Taamaattumik aqqusernit aqqusinernilu angallannermi malittarisassat takornarianut paasiuminartuunissaat qulakkeertariaqarparput, pilersaarummi allassimavoq, tassanilu siunnersuutigineqarluni, sumiiffimmi aqqusinikkut angallannermi malittarisassat ilaat nunani allani pissutsinut naleqqussarneqartariaqartut.

Nunani allani najukkani innuttaasut takornariallu akornanni eqqissiviilliortitsisartut ilagaat takornarianut piffissami sivikitsumi ininik attartortitsisarneq.

- Takornariat allatut misigisaqarniarlutik inuinnaat angerlarsimaffiini najugaqarniarlutik aalajangerajuttarput. Inuinnaat inissianik attartortitsisarnerat innuttaasunut isertitaqarfiulluarsinnaasarpoq, piffissamili sivikitsumi inissianik attartortitsisarneq, pingaartumik internetikkut, malittarisassalerneqartariaqarpoq innuttaasut inissianik attartorniartut tunulliutitaannginniassammata, pineqartumut pilersaarummi, januaarip 16-iata tungaanut tusarniaassutigineqartumi erseqqissarneqarpoq.

Pilersaarut 2025-mit 2035-mut atuuppoq, isumalluartumillu anguniarneqarluni ukiut qulit qaangiuppata nunap avammut tunisartagaasa nalingisa tamarmiusut 40 procentii takornariartitsinermit pissarsiarineqartarumaartut, takornariartitsinerlu marloriaatinngortinneqassalluni, inuillu 2.000-it takornariartitsinermik suliaqassasut. Anguniakkat angisuut piviusunngortinneqarsinnaanersut, siunissap takutikkumaarpaa.

inuiaqatigiit turisme erhverv sektorplan naaja nathanielsen naalakkersuisut

ATORFIIT Se alle jobs

Powered by Labrador CMS