Nunarsuaq tamakkerlugu ujaarineqartoq Nuummi tigusarineqartoq
Canadamiusut amerikamiusullu innuttaassusilik, nunarsuaq tamakkerlugu ujaarineqartoq Kalaallit Nunaata Politiivisa Nuummi sapaatip ullaavani tigusaraat, nunarsuaq tamakkerlugu tigusarinninnissamik piumasaqarneq atuutsinneqartoq malillugu.
Politiit
Leiff Josefsen
Kalaallit Nunaanni Politiit sapaammi ullaakkut Nuup umiarsualivianiipput Captain Paul Watson Foundationip pilersitsisuanik Paul Watsonimik tigusarinnissallutik.
Angut nunanit tamalaanit ujaarineqartoq nunani tamalaani tigusarineqarnissaanik peqqussut tunngavigalugu tigusarineqarpoq.
- Kalaallit Nunaanni Politiit ullumi Nuummi umiarsualivimmiipput. Politiit umiarsualivimmiinnerannut pissutaavoq peqatigiiffimmik Captain Paul Watson Foundationimik pilersitsisup, Amerikamiusut Canadamiusullu innuttaassuseqartup Paul Watsonip, tigusarineqarnissaa, nunani tamalaani tigusarineqarnissaanik peqqussuteqarnera pissutigalugu, Kalaallit Nunaanni Politiit tusagassiuutinut nalunaarummi allapput.
- Paul Watsonip umiarsuaq John Paul Dejoria ilaaffigalugu Nuummut tikinnerata kinguninngua tigusarinninneq ajornartorsiuteqarani pivoq, politiillu suliaat maanna naammassivoq.
Japanimi oqartussaasut tigusarinninnissamik peqqussuteqartut
Kalaallit Nunaanni Politiit ilisimatitsipput Japanimi oqartussaasut Paul Watsonip nunani tamalaani tamani tigusarineqarnissaanik peqqussuteqarsimasut, tamannalu Kalaallit Nunaanni Politiit qisuariarfigigaat.
Sapaammi ullaakkut politiit umiarsualivimmut takkussimapput, Paul Watsonilu Nuummut tikinniariartoq tigusaralugu.
- Paul Watson ullumi kingusinnerusukkut Sermersuup Eqqartuussiviani sassartinneqassaaq, tassanilu tigummigallarneqarnissaa piumasarineqassalluni, Japanimut tunniunneqassanersoq aalajangiiffigineqannginnerani. Danskit inatsisinik atortitsinermut ministereqarfiata aalajangiiffigisarpaa inuk nunani allani eqqartuussivimmit eqqartuunneqarnissaa tunngavissaqarnersoq, politiit ilisimatitsipput.
Kalaallit Nunaanni Politiit suliamut tunngatillugu allanik oqaaseqarsinnaanngillat.
