Nunarsuarmi tamarmi qarasaasiatigut ajutoorneq annertooq
Qarasaasiatigut ajutoorneq annertooq nunarsuarmi nunani assigiinngitsuni arlalinni pisimavoq.
Qarasaasiat ajutooqqanerat pissutigalugu Berlinimi Brandenburgip mittarfiani timmisartuussinerit tamarmik unitsinneqarput. Nunarsuaq tamakkerlugu mittarfiit allat arlallit aamma eqqorneqarput.
Assi: John Macdougall/AFP/Ritzau Scanpix
Politiit, mittarfiit, pisiniarfiit tv-qarfiillu nunanit assigiinngitsuneersut tallimanngornermi ullaakkut qarasaasiatigut attaveerupput. Kalaallit Nunaanni suliffeqarfiit eqqugaasimanersut suli nalunarpoq.
Australiami politiit, pisiniarfiit aamma Canberrami Sydneymilu mittarfiit eqqugaasimasut siullertut nalunaarutigineqarput. Kingusinnerusukkut nunat allat aamma eqqugaasimasut nalunaarutigineqarput.
Taamatuttaaq Tysklandimi Berlinimi timmisartuussinerit tamarmik unitsinneqarput.
Aammattaaq Amsterdamimi mittarfik Schipol aamma Spaniami mittarfiit tamarmik eqqorneqarput. BBC naapertorlugu USA-mi timmisartortitseqatigiiffiit Londonimilu aktianik niuerneq aamma eqqorneqarput.
Qarasaasiat ajoquteqarnerat pissutigalugu Danmarkimi ikuallattoqartillugu nammineerluni kalerrisaarisartut ajoquteqarput, illoqarfiit pingaarnersaanni upalungaarsimasunit nalunaarutigineqarpoq, ikuallattoqartillugulu kalerrisaarummik tusaasaqartoqartillugu 112-imut sianertoqarnissaanik innuttaasut kajumissaarneqarput. Københavnip mittarfiani maannamut nalinginnaasumik ingerlatsisoqarpoq, ilaasulli ilaat nammineq nassatanik tunniussisariaqarput, nalunaarutigineqarpoq.
Qarasaasianut programmi nutarterneqartoq
Virusinut illersuutip CrowdStrike-p nutarterneqarnera nunarsuaq tamakkerlugu attaveerunnermut pissutaagunarpoq.
Nutarterineq tamanna Microsoftip ingerlatsivianik Windows 10-mik atuisunut attaveerutsitsivoq, Ritzau allappoq.
Ajutoornerup nalaani CrowdStrikemik atuisut qarasaasiaasa skærmii tungujortunngortarput, aamma qarasaasiamik ajornartorsiuteqartoqarneranik nalunaaruteqartoqalertarput.
- Atortorissaarutit ajornartorsiuteqarpoq aallartinneqaqqittariaqarlunilu, nunami sumi tamaani qarasaasiat skærmiini tungujortumik tunuliaqutalinni allassimavoq.
Nutaarsiassaqartitsivik AFP naapertorlugu qarasaasiani ajornartorsiuteqartoq Microsoftip uppernarsarpaa.
Ajornartorsiutit nunarsuaq tamakkerlugu atuisartunut sunniuteqartut aaqqinniarlugit suliniuteqartoqartoq, Microsoft nalunaarpoq.
Inoqatinut attaveqaammi X-imi ingerlatseqatigiiffik allappoq kiffartuussinertik „pitsaaneruleriartuinnartoq“.
