Nunani arlalinni tusagassiuutit
kiffaanngissuseqarnerat ajorluinnartumik inissisimavoq. Tusagassiuutitigullu
kiffaanngissutsimik illersuinissamut pissaaneqartut, soorlu naalagaaffiit,
politikkerit inatsisiliortullu, navianartorsiortitsipput.
Naalagaaffiit politikkikkut oqartussaasullu
amerliartuinnartut tusagassiornermut pitsaanerpaamik avatangiiseqarnissamut
innuttaasullu nutaarsiassanik paasissutissaanillu tutsuiginartunik,
pituttorsimanngitsunik assigiinngitsorpassuarnillu pisinnaatitaaffiannik
qulakkeerinnittussatut akisussaaffimminnik eqqortitsinngitsoortarnerat
pissutaavoq.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit taamaallaat atuarneqarsinnaapput.
Atuarluarna.
Nunani arlalinni tusagassiuutit
kiffaanngissuseqarnerat ajorluinnartumik inissisimavoq. Tusagassiuutitigullu
kiffaanngissutsimik illersuinissamut pissaaneqartut, soorlu naalagaaffiit,
politikkerit inatsisiliortullu, navianartorsiortitsipput.
Naalagaaffiit politikkikkut oqartussaasullu
amerliartuinnartut tusagassiornermut pitsaanerpaamik avatangiiseqarnissamut
innuttaasullu nutaarsiassanik paasissutissaanillu tutsuiginartunik,
pituttorsimanngitsunik assigiinngitsorpassuarnillu pisinnaatitaaffiannik
qulakkeerinnittussatut akisussaaffimminnik eqqortitsinngitsoortarnerat
pissutaavoq.
Killeqarfiit Akimorlugit Tusagassiortut
suleqatigiiffiat (RSF) ukioq manna World Press Freedom Indeximut atatillugu,
tassa nunarsuaq tamakkerlugu tusagassiornerup kiffaanngissusianik
misissuinermut, allappoq. Ukiut tamaasa RSF-imit inissisimaffiit taakku
allattorneqartarput.
Killeqarfiit Akimorlugit Tusagassiortut
suleqatigiiffiata maluginiarpaat tusagassiortut nammineersinnaanerannik
tapersersuinerup ataqqinninnerullu annilaarnartumik appariartornera, aamma
naalagaaffinnit politikkikkullu suliaqartunit tatineqarnerulerneq.
Kalaallit Nunaanni tusagassiuutit misissuinermi
ilanngunneqanngitsut aamma tatineqaraluttuinnarput. Taamak oqarpoq Masaana
Egede, tusagassiorfimmi Sermitsiaq-mi pisortaaneq aaqqissuisuunerlu.
Killilersugaanngitsumik tusagassiorneq
oqaaseqarsinnaatitaanerlu
- Killilersugaanngitsumik tusagassiorneq
oqaaseqarsinnaatitaanerlu tatineqaqqapput. Politikerit tusagassiortullu
akornanni attaveqatigiinneq ilungersunarpoq, taamaammat Kalaallit Nunaanni
tusagassiuutit tatineqarput. Siullertut sinaakkutit ullutsinnut
naleqqutinngitsut pissutaapput. Partiit ataasiakkaat tusagassiuutit qanoq
iliuuseqarfigisassanerlugit aalajangersimasut isumaqarpunga, tusagassiuutilli
tamat oqartussaaqataanerannut inuiaqatigiinnullu qanoq inissisimasariaqarnerat
pinnagu. Politikerit tusagassiuutinut ingerlalluartunut sinaakkutinik
tapersersuinissaat pingaaruteqarpoq, oqarpoq.
- Politikerit oqartussaasullu allat
aalajangiineri Sermitsiap AG-mit sakkortuumik isornartorsiorneqarpata qanoq
kinguneqarsinnaava?
- Inuiaqatigiinni mikisuni Kalaallit
Nunaanniittutut ittuni tusagassiortut qajannarnerupput, inuimmi allaaserisavut
ullut tamaasa naapittaratsigit. Isornartorsiorluarsimatillugillu
kinguneqarsinnaasarput.
- Assersuutigalugu tusagassiortut
apersorsimasaminnik Brugsenimi Pisiffimmiluunniit naapitsisaramik
pisiniarfinnukarsinnaanerat unammillernarsinnaavoq.
- Politikerit naammagittaalliortut
tusagassiortunut tusagassiivimmulluunniit sianertarnerat allaaserisallu
pillugit naammagittaalliortarnerat qaqutigoortuunngilaq. Politikerit
tusagassiortunut uannullu pisortamut sianeraangata nipaat saamasuinnaaneq ajorput,
sakkortuumik nipeqartarput.
- Qanoq akulikitsigisumik taama
pisoqartarpa?
- Qujanartumik akulikinngilaq.
- Allanik assersuutissaqarpit?
- Kalaallit Nunaanni ilaquttanut ikinngutinulluunniit
kaffisoriartoqquneqarneq assigisaanulluunniit qaaqqusaaneq ulluinnarsiutaavoq. Tusagassiortulli
isornartorsiuisarnertik pissutigalugu qaaqqusaanngeriataarsinnaasarput,
tamannalu ilaquttanit ikinngutinilluunniit ungasillineqarnermik inuttut
atugarisanut sunniuteqarpoq, Masaana Egede oqarpoq.
- Kalaallit Nunaanni killiligaanngitsumik
tusagassiorsinnaaneq oqaaseqarsinnaanerlu ajornakusoornerua?
- Aappi naamilu. Qujanartumik tamat
oqartussaaqataanerat ingerlalluarpoq, tusagassiuutilli
pingaarnersiorneqanngillat. Tusagassiuutinut isumaqatigiissut nutaajunngilaq.
Tusagassiuutinut sinaakkutit ullutsinnut malinnaanngillat, taanna isumaqarpoq.
Masaana Egede isumaqarpoq tusagassiortutut
ilinniarsimasut taama ikitsiginerat ajornartorsiutaangaartoq.
- Politikerit tusagassiortunik oqaluuserinninnerat
tusagassiornerlu pillugu isummersornerat tusagassiortuunerup ataqqineqarneranik
inuit isumaannut sunniuteqartarput. Aammali tusagassiuutitut
pissanganartuunissarput, kajungernartuunissarput ineriartornartuunissarpullu
akisussaaffigaarput.
- Politikerit tusagassiortut pillugit ajortumik
oqaluttarpat?
- Politikerit assigiimmik anguniagaqanngitsut,
tusagassiornerup inuiaqatigiinni inissisimaffianik ataqqinninngitsut
paasinninngitsullu isumaqarpunga. Tamanna soorunami ajortumik sunniuteqarpoq.
Soorunami tusagassiorluartariaqarpugut suliffippullu pikkoriffigalugu, inuillu
uagutsinnik naammaginninnginnerat ajortuunngilaq. Politikerilli aalisartut
tusagassiortunik eqqartuisarnermittut oqaluuserigunikkit, Inatsisartunut
tulliani qinersinermi ajornartorsiuteqassagaluarput, oqarpoq.
Isertitat ikiliartortut
Killilersugaanngitsumik tusagassiorneq
oqaaseqarsinnaatitaanerullu unammillernartuata saniatigut allanik annertuunik
unammilligassaqartoq Masaana Egede isumaqarpoq.
- Tusagassiuutit namminersortunit
pisortanillu pigineqartut nunarsuarmiut allat assigalugit aningaasarsiornerup
appariartorneranik teknologiillu ineriartupallanneranik unammilligassaqarput.
- Tusagassiorfiit namminersortut
pisortallu politikkikkut sinaakkutissaat ilungersunarluinnarput teknologiillu
ineriartorneranut naleqqukkunnaarsimapput, Masaana Egede oqarpoq.
