Nunatta Eqqartuussisuuneqarfiata arnaq 27-nik ukiulik toqutsisimasutut Danmarkimi inissinneqartussatut eqqartuuppaa

Arnaq 55-inik ukiulik Sisimiuni Tuapannguani siorna savimmik kapineqarluni toquvoq. Nunatta Eqqartuussisuuneqarfiata Qeqqata Eqqartuussiveqarfiata aalajangersagaa atuuttussanngortippaa.

Arnap toqutsisinera pillugu, februaarip 8-ani 2023-mi pisimasoq pillugu Danmarkimi tarnikkut innarluutilinnut angerlarsimaffimmut inissinneqarnissaa eqqartuussivimmit aalajangerneqarpoq.

Tamanna arnap illersuisuata Nunatta Eqqartuussisuuneqarfianut suliassanngortippaa, tassani pineqaatissinneqarneranut tunngatillugu suliassanngortitseqqiilluni.

Qeqqata Eqqartuussiveqarfiata februaarip ulluisa 26-ani suliaralugu naammassisaa Nunatta Eqqartuussisuuneqarfiata suliaraa. Eqqartuussiviullu aalajangigaa eqqartuussisuuneqarfiup atuuttussanngortippaa. Arnap maanna 27-inik ukioqartup toqutsisimanini pillugu Danmarkimi tarnimikkut innarluutilinnut angerlarsimaffinnut inissinneqassasoq aalajangersarneqarpoq.

LÆS OGSÅ

Knivdrab på kvinde: Dømt til anbringelse på institution for mennesker med handicap i Danmark

Arnaq 55-inik ukiulik arnamit 26-inik ukiulimmit siorna februaarip arfineq-pinganiannit savimmik kapineqarluni toqunneqarpoq. Arnaq kingorna tigummigallagaavoq, Nunattalu Eqqartuussisuuneqarfiata ataasinngornermi aalajangersaavoq.

Nunatsinni naleqquttumik angerlarsimaffeqanngilaq

Arnap illersuisuata arnaq pineqaatissinneqartoq Danmarkimi inissinneqarnani nunatsinni inissinneqarnissaa anguniarlugu suliaq suliassanngorteqqinnikuuaa.

Nunatta Eqqartuussiviani suliaq suliarineqarmat Isumaginninnermut Aqutsisoqarfimmit, ulloq unnuarlu innarluutilinnut paaqqinnittarfinnut akisussaasoq nassuiaasinneqarpoq.

Akisussaasoq naliliilluni nassuiaavoq unnerluutigineqartoq nunatsinni angerlarsimaffimmi naleqquttumi inissinneqarsinnaanngitsoq, taamaattumillu  Danmarkimi angerlarsimaffimmi inissinneqartariaqartoq, politiit tusagassiuutinut nalunaarummi allapput.

Isumaginninnermi aqutsisoqarfimmiit nassuiaanermi peqqutaatinneqarluni innersuussutigineqarpoq nunatsinni ulloq unnuarlu angerlarsimaffiit ulloq unnuarlu nakkutigineqanngitsut, taakkulu angerlarsimaffiit unnerluunneqartup pisariaqartitaanut immikkut ittumik perorsaanermik ikorfartuisinnaanngitsut.

Unnerluussisoq  Alexander Stürup suliamik suliaqartoq oqaaseqarpoq:

- Pinerlussimasup angerlarsimaffimminit ungasissumi pineqaatissinneqarnera sakkortusinnaagaluartoq, pinerluuteqaqqinnginnissaali qulakkeerniarlugu toqqissisimanissaa tapersersorneqarnissaalu pingaaruteqarpoq.

Eqqartuussisuuneqarfiup aamma aalajangiinerminut pingaartutut naqissuserpaa eqqartuussinermi tarnip pissusaanik ilisimasallit naliliineri naapertorlugit unnerluutigineqartoq pisariaqartitaanik matussusiisumik paaqqinnittarfimmut inissinneqanngikkuni inunnut allanut navianartorsiortuassasoq.