Nunatta imartaani aalisarneq EU-mit aningaasaliiffigineqartoq: Aalisariutit 19-it 2024-mi tapiiffigineqarput
EU'p Kalaallit Nunaannut tapiissuteqartarnera sinerissap qanittuani aalisarnermut iluaqutaavoq. Nunatsinni aalisariutit 19-it - matumani umiatsiaaqqat aalisariutillu anginerit 6 meteriniit takinerusut - aalisarneq pillugu EU-mik isumaqatigiissut aqqutigalugu 2024-mi aningaasaliiffigineqarput.
Assi: Leiff Josefsen
EU sinerissap qanittuani aalisariutit 6 meteriniit naannerullutillu takinerit tapersersorpai. Nunatsinni aalisariutit katillugit 19-it aalisarneq pillugu EU-lu isumaqatigiissut malillugu 2024-mi aningaasaliiffigineqarput, Aalisarnermut, Piniarnermut, Nunalerinermut Imminut Pilersornermullu Naalakkersuisoqarfik tusagassiutitigut nalunaarummi ilisimatitsivoq.
- Aningaasaliissutit Naalakkersuisoqarfimmut tunniunneqartartut ilaatigut Aalisarnermut Aningaasaliissutinut aalisariutinik sinerissap qanittuani atorneqartussanik 6 meterinit anginerusunik umiatsiaaqqanilluunniit pisinermi tapiissutaasartunut aammalu inuussutissarsiummik siuarsaanermut atugassanngortinneqartarput.
- Angallatinut 6 meterinit anginerusunut nutaanut sisamanut, motooritaartunut marlunnut angallatigisallu nutaanik atortulersornissaanut kiisalu nutaanik umiatsiaarartaartunut atortui ilanngullugit 12-inut 2024-mi tapiissuteqartoqarpoq.
Aningaasaliissutit Kalaallit Nunaata EU-llu pingaarnertut isumaqatigiissutaanut ilaammata Kalaallit Nunaat aalisarnerup siuarsarnissaanut 2021-miit 2024 ilanngullugu ukiumut 22 mio. koruuninik taperneqartarpoq.
Tapiissutit Kalaallit Nunaanni aalisarnermik Piniarnermillu Nakkutilliisoqarfimmit, PInngortitaleriffimmik kiisalu Aalisarnermut, Piniarnermut, Nunalerinermut Imminut Pilersornermullu Naalakkersuisoqarfimmit avinneqartarput.
Tapiissutit tamatuma saniatigut ilaatigut aqutsinissamut pilersaarutinut, aalisariutinik nakkutilliinermut, ERS-inik atulersitsinermut aamma qarasaasiatigut nalunaarsuinemrut, misissuinermut Pinngortitaleriffimmilu ilisimatusarnermut atorneqarput.
