Nunatta karsia 2024-mi 250 millionit koruuninik amigartooruteqartoq

Nunatta karsiata 2024-mut naatsorsuutai tamanut saqqummiunneqarput, taakkulu naapertorlugit 257 million koruuninik amigartooruteqarpoq.

Tamanna 2023-mi 421 million koruuninik sinneqartoorummit allaanerulluinnarpoq.

Kisitsisit takussutissat ataani takussutissiami takuneqarsinnaapput (Malugiuk, minus tassaavoq sinneqartoorutit/isertitat):

Takussutissaq naapertorlugu isertitat annikitsuinnarmik qaffassimapput, tamannalu Danmarkimit tapiissutit qaffannerannik pissuteqarpoq.

Ingerlatsinermut aningaasartuutit 411 million koruuninik qaffariarput, tamannalu sulisunut taartaasunullu aningaasartuutit qaffakkiartornerannik, kommuninut tapiissutit qaffakkiartornerannik kiisalu peqatigiiffinnut suliffeqarfinnullu tapiissutit qaffakkiartornerannik pissuteqarpoq, naatsorsuutini taama allassimavoq.

Sanaartornermut aningaasalersuinermullu aningaasartuutit 2023-mut sanilliullugit aamma 187 mio. kr.-nik qaffapput. KNI A/S-ip Royal Greenlandillu 2024-mi iluanaarutinik tunniussisimannginnerat, kiisalu 2024-mi sanaartornermut aningaasaliissutit annertunerusut tunniunneqarnerat tamatumunnga pissutaanerpaasoq allassimavoq.

2025-mi amigartooruteqaqqinnissaq ilimagineqartoq

Siorna amigartooruteqarsimaneq pillugu nutaarsiassaq Aningaasaqarnermut Naalakkersuisoqarfiup missingersuusiornermut malittareqqiinerup kingorna naliliineq naapertorlugu nunatta karsia 2025-mi aamma 347 millionit koruuninik amigartooruteqarnissaanik nalileereersoq saqqummiunneqarpoq.

Pissutsit ilungersunartutut isigineqartut Namminersorlutillu Oqartussat aningaasartuutaannik nalilersuisoqaleruttortoq Aningaasaqarnermut naalakkersuisoq Múte B. Egede (IA) Sermitsiamit apersorneqarnermini oqarpoq. Aammattaaq aningaasaqarneq ilorraap tungaanut saateqinniarlugu aaqqssuusseqqinnerit ataqatigiissut pisariaqartut erseqqissarpaa.