Nutaarmiuni
pisiniarfeqannginnera pissutaalluni innuttaasut ikiliartorput.
Nioqqutissanillu
pisariaqartitaminnik pisiniassagunik, ilaatigut inuunertik
navianartorsiortillugu Tasiusamut niuerniartariaqartartut, pissutsillu
ilungersunartut pissutaallutik nunaqarfiup siunissaa nalorninartorsiorfiusoq
pillugu, ukiup ataatsip matuma siorna Sermitsiaq allaaserisaqarpoq.
Nutaarmiuni
pisiniarfeqannginnera pissutaalluni innuttaasut ikiliartorput.
Nioqqutissanillu
pisariaqartitaminnik pisiniassagunik, ilaatigut inuunertik
navianartorsiortillugu Tasiusamut niuerniartariaqartartut, pissutsillu
ilungersunartut pissutaallutik nunaqarfiup siunissaa nalorninartorsiorfiusoq
pillugu, ukiup ataatsip matuma siorna Sermitsiaq allaaserisaqarpoq.
Pilersuisoq
Nutaarmiuni pisiniarfiliussappat tamanna politikkikkut aalajangigassaammat,
pisiniarfiliortoqarnissaanik maannakkut pilersaaruteqartoqanngitsoq,
Pilersuisup pisortaata Brian Weuge Chemnitzip taamanikkut aamma oqaatigaa.
NUTAARMIUNUT IKIUUTISSAT APUUNNEQALERPUT
Avannaata Kommuniata nittartagaani paasissutissat
naapertorlugit silarlummit sikkorlunneranillu pissuteqartumik Nutaarmiuni
innuttaasut Tasiusamut niuerniarsinnaasimanngillat
Maannali ikiuiartortoqalerpoq.
- Innuttaasut pisiniuppagut. Kissaatigisaat
pisiarivagut, inuussutissat sapaatip akunnerinut marlunnut-pingasunut
naammattut, Ane Marie Jørgensen, Upernavimmi
innuttaasunik sullissinermi immikkoortortaqarfimmi pisortaq oqarpoq.
Tamanna isumagineqareermat nioqqutissat pisiat
Nutaarmiuliaannissaat pillugu Avannaata Kommunia qulimiguulimmik Air
Greenland-imit attartorniarpoq.
- Silali suli unerisimanngilaq, qulimiguulillu
apuussinnaanani, neriuutigivarpulli aqagu aqaguanguluunniit iluatsissasoq, Ane
Marie Jørgensen oqaluttuarpoq.
Ane Marie Jørgensen aamma oqaluttuarpoq iffiat,
ullaakkorsiutissat neqillu kisimik pisiarineqarsimasut, imigassat, sodavandit
sikaritsillu pinnagit.
Qulimiguulik Nutaarmiunut apississangatinneqarpoq
marlunngorpat januarip 14-iani imaluunniit januarip 15-iani, sila
apeqqutaatillugu.
Nutaarmiunilu
pissutsit maanna ima ilungersunartigilersimapput, innuttaasut siorna
48-simagaluartut maannakkullu 30-nnanngorsimasut, nioqqutissanik inuuniarnikkut
pisiariaqartinneqartunik immikkut ittumik qulimiguulik atorlugu Avannaata
Kommunia maannakkut piaarnerpaamik ikiorsiissuteqartariaqalerluni.
Tamannalu
Naalakkersuisut Nutaarmiuni innuttaasunik sumiginnaanerattut
taaneqartariaqartoq, Tasiusami Nutaarmiunilu nunaqarfimmi aqutsisuni
siulittaasoq Regine N. Bidstrup, Inuit Ataqatigiit, aamma Avannaata Kommuniani
kommunalbestyrelsimut ilaasortaq Timotheus Petersen, Siumut, oqarput.
Iliuuseqartoqanngitsoq
Nutaarmiuni
pisiniarfiliortoqarnissaa pillugu Naalakkersuisut arlaleriarlutik
saaffigineqartarsimasut, maannakkumulli ersarissumik
akissuteqartoqartarsimanngitsoq, Nutaarmiuni
Tasiusamilu nunaqarfimmi aqutsisut oqaatigaat. Tamannalu ilungersunartutut
isigineqartariaqartoq, nunaqarfimmi aqutsisut siulittaasuat Regine N. Bidstrup,
Inuit Ataqatigiit, oqarpoq.
Nutaarmiormiut
kingullermik decemberip 20-ani Tasiusamut niuerniarput, taassumalu kingorna
sikup atoruminaannera pissutaalluni niuerniaqqissimanatik.
- Nutaarmiormiut
nioqqutissanik amigaateqarmata ikiorserneqartariaqarnerat pillugu januarip
pingajuani Naalakkersuisunut allagarnikuugaluarpunga, kisiannili sulisut
amigarmata sapaatit akunnerisa marluk iluanni aatsaat akineqassasunga
paasitinneqarpunga.
- Tamatuma
kingorna Avannaata Kommuniani kommunalbestyrelsimut ilaasortaq Timotheus
Petersen uannut sianerpoq kommunaldirektørimut saaffiginneqqullunga, taannalu
aallaavigalugu januarip qulingani nunaqarfimmi aqutsisuni immikkut ittumik
ataatsimiippugut, taanna oqarpoq.
Saaffiginnissutigineqartup
kinguninnguatigut Nutaarmiormiut nioqqutissanik inuuniarnikkut
pisariaqartitanik amigaateqarnerat pillugu Avannaata Kommunianiit ikiugasuarneq
aallartinneqarpoq.
Siornatigut
saaffiginnittoqartartoq
Nutaarmiunili
inuuniarnikkut atukkat ilungersunartut pillugit siornatigut arlaleriarluni pisortanut
saaffiginnittoqartarsimagaluartoq, Regine N. Bidstrup erseqqissaavoq.
- Nutaarmiormiut
kommunip akiligaanik Tasiusamut pisiniarfiliartinneqartarnissaat nunaqarfimmi
aqutsisuniit siornatigut kissaatigisarsimagaluarparput, tamannali kommunimiit
itigartitsissutigineqartarsimavoq.
- Taassuma
saniatigut Nutaarmiuni pisiniarfeqannginnerata kingunerisaanik ajornartorsiutit
pillugit siorna Naalakkersuisunut allagaqarpugut, taamanilu Arktisk Kommandop
umiarsuaata nioqqutissanik pajunnissaanik pilersaarut sikuuallaarnera
pissutaalluni piviusunngunngitsoortoq paasitinneqarpugut, taanna oqarpoq.
Suliaq
aallartinneqartoq
Nutaarmiormiut
inuuniarnikkut atugaat ilungersunartut pillugit Facebookkikkut
saqqummiussisoqarmat, sapaatip akunneq kingulleq Naalakkersunut
allagaqarsimalluni, sulili maannamut akissuteqarfigineqarsimanani, Avannaata
Kommuniani kommunalbestyrelsimi ilaasortaq Timotheus Petersen oqarpoq.
- Naalakkersuisuniit
akissuteqarfigineqannginnama Nutaarmiuni piaartumik ikiorsiisoqartariaqartoq
pillugu Avannaata Kommuniani kommunaldirektøri allaffigaara, nunaqarfimmilu
aqutsisut akulerutsinneqarnerisa kingorna ikiorsiigasuarnissamut suliaq
aallartinneqarpoq.
- Nutaarmiuniinnaanngitsoq
aammali nunaqarfinni pisiniarfeqanngitsuni Naajaani Qaanaallu eqqaani Qeqertani
ajornartorsiutit aaqqiviginiarlugit piaartumik iliuuseqartoqartariaqartoq
pillugu Naalakkersuisunut Inatsisartunilu ilaasortanut tamarnut ippassaq allagaqarpunga,
taassumalu saniatigut pineqartoq pillugu kommunalbestyrelsimut
oqaluuserisassanngortitsissallunga pilersaaruteqarpunga, taanna oqarpoq.
Royal
Greenland A/S Nutaarmiuni aalisakkeriviuteqarpoq, Nutaarmiunilu
pisiniarfeqannginnera pissutaalluni innuttaasut ikiliartortut taamaalillunilu
aalisakkat tulaanneqartartut aamma ikiliartortut siusinnerusukkut
suliffeqarfimmiit oqaatigineqarnikuuvoq.
Nutaarmiuni
pisiniarfeqannginnerata kingunerisaanik ajornartorsiutit kiisalu nunaqarfimmi
aqutsisuniit saaffiginnissutaasarsimasut pillugit Nunalerinermut, Imminut
Pilersornermut, Nukissiutinut Avatangiisinullu Naalakkersuisoq Kalistat Lund,
Inuit Ataqatigiit, maannakkut oqaaseqartinneqarsinnaasimanngilaq.
