Nutaarsiassaqartitsiviit nunanit tamalaaneersut Nuuk alapernaappaat

Kalaallit Nunaat Nuullu nunanit tamalaanit qaammatini kingullerni soqutigineqarneruleriartorpoq. Tusagassiuuterpassuit Kalaallit Nunaat allaaseraat – kikkullu tamarmik Kalaallit Nunaannukarusupput.

Atuagassiami nunani tamalaani ataqqineqarluartumi National Geographic-imi sulisut Kalaallit Nunaat 2025-mi angalaffissat pitsaanerpaat 25-t ilaattut toqqarsimavaat.

- Siornatigut Kalaallit Nunaannukarnissaq ajornakusoortarpoq, maannali illoqarfiit pingaarnersaanni Nuummi nunanit tamalaanit tikikkuminartumik timmisartoqarfittaarneq pissutigalugu ajornannginnerulersimavoq, National Geographic allappoq, Air Greenlandillu Iqalunnut timmisartuussisarnissaa aamma United Airlinesip New Yorkimit timmisartuussisarnissaa Amerikap avannaani atuartartunut periarfissatsialattut eqqaallugit.

Ingasalluinnartoq

- Qaammatini kingullerni ingasalluinnarpoq, Greenland Airportsimi attaveqaqatigiinnermut pisortaq Hans Henrik Lichtenberg oqaluttuarpoq.

- Nunani tamalaani tusagassiuutit paasissutissiivii qanittukkunni misissorpagut, allaaserisallu hundredelikkaat arlallit Greenland Airportsip pisortaa Jens Lauridsen issuarsimavaat. Nunarsuaq tamakkerlugu tusagassiuutit, aviisit atuagassiallu takornariaqarnermut mittarfinnullu tunngasut mittarfissaq nutaaq eqqaasimavaat. Ingasalluinnarpoq.

- Greenland Airportsip suliassariinnanngilaa Kalaallit Nunaata takornariarfissatut nittarsaannissaa, taamaattumik paasissutissiineq Visit Greenland aamma Air Greenland qanimut suleqatigalugit ingerlapparput.

- Tusagassiorfiit uagutsinnut saaffiginneqqaartarnerat soorunami mittarfissap ammarnissaanut atatillugu suliassanik suliarinnittuunitsinnut pissuteqarpoq. Aallaqqaammut saaffiginnittut tusagassiuutinut nalunaarummik tuluttut allaqqasumik paasissutissanillu akisarpagut. Tamatuma saniatigut pisortaq Jens Lauridsen aamma niuernermut pisortaq René Von Ahm Laursen kiisalu Visit Greenlandimi pisortaq Anne Nivika Grødem oqaaseqaasiortissimavagutt tusagassiuutit toqqaannartumik atorsinnaasaannik peqalerluta.

-Tusagassiortorpassuit paasissutissat naammagisarpaat, namminneq sammisartik aallaavigalugu paasissutissat suliaminnut atorsinnaagamikkit ilassutissanillu namminneq suliaqartarlutik, allalli suli apeqqutissaqarlutik saaffiginneqqittarput. Taamaaligaangata apeqqutaat akiniartarpagut - aammali tusagassiorfiit apersuinissamut periarfissinniartarpagut.

Ammaanersiorneq ulapaarnartoq

Mittarfik ammarpat Greenland Airportsip attaveqaqatigiinnermut immikkoortortaqarfiani soorunami ulapiffiussaaq, aammali ammaanersiornissaq sioqqullugu tusagassiortut Nuummiittut sullinneqassapput.

Ilaatigut Danmarks Radio, ammaanersiorneq sapaatip akunnera sioqqullugu Nuummiileriissalluni nalunaarpoq, Hans Henrik Lichtenberg oqaluttuarpoq.

- Ulloq ammaanersiorfimmi tusagassiortut attaveqatigiiffinnilu sunniuteqarniartutut arlallit Air Greenlandip Københavnimiit Nuummut toqqaannartumik timmisartuussinerani siullermi ilaassapput.

- Tusagassiortut attaveqatigiittarfinnilu sunniuteqarniartutut suliaqartut 20-t Nuummut 28. november tikittussaasut ilisimavagut. Taakkunannga sivisunerpaamik angalasussaq tassaavoq tusagassiortoq Australiami "The Weekend"-imi suliaqartoq.

Greenland Airportsip attaveqaqatigiinnermut pisortaata Mikkel Bjørnø Lundip Mittarfeqarfinni attaveqaqatigiinnermut pisortaasimasoq Hans Henrik Lichtenberg tusagassiortorlu Michael Svendsen immikkut ikiortigai.