Nutartigaq: Arnamik toqutsisoqarneranut atatillugu angut tigummigallagassanngortinneqarpoq
Politiit Nuummi arnaq 36-nik ukiulik savimmik kapineqarsimasoq tallimanngornermi orniguffigaat. Arnaq kingorna toquvoq. Suliamullu atatillugu angut tigummigallagassanngortinneqarpoq.
Politiit
Assiliisoq: Leiff Josefsen
Nutartigaq: Killisiuinermi inernerit ilanngunneqarput — tigusarineqartoq eqqartuussivimmit ulluni 28-ni tigummigallagassanngortinneqarpoq.
Kalaallit Nunaanni Politiit tallimanngornermi unnukkut nal. 21.52 nalunaarfigineqaramik Nuummi najugaqarfimmut aalajangersimasumut ornigussimapput.
Najukkami tassani arnaq 36-nik ukiulik savimmik kaporneqarsimasoq nassaarineqartoq Politiit tusagassiuutinut nalunaarummi allapput.
Arnaq ikiueqqaarneq atorlugu uummarsarneqarpoq, napparsimmavimmulli apuuteqqammerluni toquvoq.
Kalaallit Nunaanni Politiit ilisimatitsipput angut nal. 23.30 missaani tigusarineqartoq. Angut 28-nik ukiulik Nuummiu pineqarpoq, politiillu pinerluttutut pasivaat.
- Angut 28-nik ukiulik arfininngornermi juunip aallaqqaataani 2024-mi nalunaaqutaq 14.00 Nuummi Eqqartuussivimmut Sermersuumut sassartinneqassaaq, politiit allapput.
Angut 28-nik ukiulik ulluni 28-ni eqqartuussivimmi tigummigallarneqarnissaa aalajangiunneqartoq politiini Preben Kleist arfininngornermi paasissitissiivoq.
Suliaq pillugu misissuisoqarmat Kalaallit Nunaanni Politiit suliamut atatillugu maannamut annertunerusumik paasissutissiisinnaanngillat.
