Nutartigaq: Ikuallarujussuartoqarnera innaallagiaarutsitsisoq - atortorissaarutinut imermik pumpereq ikuallattoq

Aasianni Nukissiorfiit eqqaani ataasinngornermi unnukkut ikuallattoorpoq. 

Ikuallanneq pujuliortitsingaatsiarpoq, innuttaasullu Facebookimi assinik aamma videonik arlalinnik siammartiteripput, ikuallannerullu sakkortunerujussua assini takuneqarsinnaavoq.

Nukissiorfiit Facebookikkut nal. 18.00 missaani allapput, ajutoortoqarnera pissutigalugu illoqarfimmi tamarmi innaallagiaqanngitsoq, aaqqinniarlugu sulissutigineqartoq.

Illoqarfik innaallagiaaruttoq

Nutartigaq: Nukissiorfiit illuutaata eqqaani ikuallattoqarnera pissutaalluni innaallagiaaruttoq Nukissiorfiit uppernarsarlugu paasissutissiipput.

Qatserisartut politiillu ikuallattoq qamisaraat. Kalaallit Nunaanni Politiit nalunaaqutaq 19.00 missaani nalunaarput. Ikuallattoq qaminneqareeraluartoq suli pujuliorpoq.

Katersortarfiit ammarneqartoq

Nutartigaq: Nukissiorfimmi innaallagissamik pilersueqqilernissaq ilungersuutigalugu suliaqartoqarpoq, unnukkullu nalunaaqutaq 23.30-p missaani illoqarfik tamarmi innaallagiaqaqqilertoq nalunaarutigineqarpoq.

Atortorissaarummut imaaniit nillusaat ikuallannermik ajoquserneqasimasoq Nukissiorfinniit paasissutissiissutigineqarpoq.

Innaallagiaarummat katersortarfik ammarneqassasoq Kommune Qeqertalimmiit aalajangerneqarpoq. Katersortarfik kiassarneqarpoq, qaammaqqusersorneqarluni imeqarlunilu, aamma perusuersartarfiit imaartakkat atorneqarsinnaapput.

Tusassip datamik atuisinnaaneq killileraa

Tusassimi atuisut suli sianersinnaallutillu SMS-ersinnaasut, Innaallagiaaruteqqammertoq Tusassimiit nalunaarput. Datamilli atuisinnaaneq innaallagiamik sipaarniarluni killilerneqarpoq.

- Atortorissaarutitta ilaat akunnerit marluk pingasullu akornanni qaangiuppata innaallagiaarutissapput, taamaattoqarpallu Politiit Upalungaarsimasullu attaveqaataannut sunniuteqassaaq, Tusassimiit allapput.

Tusassimiit nalunaaqutaq 23.27 attaveqaatit aaqqeqqittut nalunaarutigineqarpoq:

- Attaveqaatit suli nakkutigaavut. Internetsikkut attaviit nammineq aallarteqqinngikkunik modemmit qameriarlugu ikeqqissavat. Resetissanngilat, Tusassimiit paasissutissiipput.

Pigaartut pisortaat: Ikuallanneq atortorissaarumiit meterit 50-it missaannik ungasitsigisumiippoq

Nukissiorfiit atortorissaarutaannut nillusaatit imermut pumperit ilaat ikuallassimasoq pigaartut pisortaat Thomas Jeppesen marlunngornermi ullaakkut paasissutissiivoq.

- Suna pissutaalluni ikuallalersimanersoq suli paasinngilarput, ullumili aqaguluunniit ikuallannermik misissuisoqassasoq naatsorsuutigaarput, Thomas Jeppesen Sermitsiamut marlunngornermi ullaakkut oqarpoq.

Sermitsiamiit Nukissiorfimmiit oqaaseqartitsinissaq sulissutigaarput.