NUTARTIGAQ: Tigummigallarneqarnera sivitsorneqarpoq — unnerluussisulli piumasaqaataanit sivikinnerusumik

Arfernik illersuiniaq, Paul Watson, juulip 21-anili Nuummi tigummigallarneqartoq pillugu ataasinngornermi eqqartuussivimmi tigummigallarneqarnera isummerfigineqassaaq.

Eqqartuussissuserisoq Jannich Isidor illersuisuuvoq, eqqartuussissuserisuusullu Jonas Christoffersen, Julia Stage aamma Finn Meinel videokkut eqqartuussineq malinnaavigissavaat.

Ulluni 28-ni tigummigallarneqarnerata decembarip 30-anut sivitsorneqarnissaanik qinnuteqarnikkut unnerluussisut sinnerlugit unnerluussisussaatitaasup Mariam Khalilip eqqartuussineq aallartippaa.

Unnerluussisup eqqartuussinerni siusinnerusuni oqaatigisimasani uteqqippaa, tassa politiit Watsonimut unnerluussutinik misissuinertik naammassigaat.

Novembarip 30-annit ullut 14-it qaangiutsinnagit tunniussinissaq pillugu aalajangiisoqarnissaanik Inatsisinik Atuutsitsinermut ministereqarfik nalunaarsimasoq, ilanngullugu taassuma ilisimatitsissutigaa.

Watsonip pinerlunnerata peqqarniissusaanut unnerluussisussaatitaasoq aamma innersuussivoq, unnerluussullu pissutigalugu piffissaq pineqaatissiissutigineqartoq sivitsortariaqartoq naliliivoq.

Akornusersorneqarani angalanerit misissorneqartut

Oqaatigineqarportaaq inatsisinik atortitsinermut ministereqarfik suliami aalajangiisinnaajumalluni Japanimit paasissutissanik kingulliusunik pissarsiniarsimasoq.

Paul Watson Japanimi eqqartuunneqarniassanersoq ministereqarfiup aalajangigassaraa.

Illersuisuata Jonas Christoffersenip Paul Watsonip iperagaanissaa piumasarivaa, aamma sivisuallaamik tigummigallarneqarnerarpaa.

Suliap sooq pisoqaavallaarsorineqarnera illersuisut itinerusumik nassuiaasersoqquaat, kingornalu illersuisoq Paul Watsonimik tuluttut apersuilerpoq.

Killisiorneqarnermini Watsonip oqaluttuaraa nunarsuaq tamakkerlugu angalasarsimalluni, ilaatigut USA-mut, Frankrigimut, Monacomut Schweizimullu, tassanilu oqartussaasunit akornusersorneqarani angalasarsimanerarluni.

30-nit amerlanerusunik tigusarinneqqussutit nutarsarneqartut

Unnerluussisup Mariam Khalilip killisiorneqarneranut qisuariarluni Japanip ukiut tamaasa Paul Watsonimut "nalunaarut aappalaartoq" (nunat tamalaat akornanni Interpolip ujarlernera, inuk ujaarineqartoq nassaariniarlugu tunniunnissaalu siunertaralugu tigummigallarneqarnissaanut nunanut ilaasortaasunut qinnuteqaat, aaqq.) aamma tigusarinneqqussutit attatiinnarsimagai erseqqissarpaa, tassami 2010-mi Sikuiuitsumi kujallermi arfannianik Japanimiunik aporaannerup kingorna eqqartuussivimmi unnerluutigineqarnissaa nunap kissaatigaa.

Unnerluussisussaatitaasoq naapertorlugu piffissap ingerlanerani ikinnerpaamik 30-riarluni tigusarinneqqussut nutarterneqarsimavoq.

Nalunaaqutaq qulinut eqqartuussisup Lars-Christian Sinkbækip naggataarutaasumik oqaaseqannginnermi eqqartuussineq unitsikkallarpaa.

Nal. 10.15 eqqartuussineq aallarteqqippoq, unnerluussisullu aallartilluni erseqqissarpaa piffissarititap sivitsorneqarnissaa qinnutigisimallugu, unnerluussisup naliliinera naapertorlugu nammineersinnaajunnaarsitsineq suli pisariaqarmat, tassami Inatsisinik atortitsinermut ministereqarfik suli aalajangiisimanngimmat.

Unnerluussisup illersuisut tunngavilersuutigisaat, pingaartumik naapertuilluanngitsuliornerunerarlugit, suliarlu siumukannginnerarlugu pisoqaavallaarnerarlugulu, itigartippai.

Unnerluut: Nunat allat iliuuseqannginnerat Japanip pisuussutiginngilaa

Mariam Khalil naapertorlugu suliaq ima peqqarniitsigaaq allaat Paul Watson ukioq ataaseq sinnerlugu pineqaatissinneqarsimasunut inissiisarfimmiittussanngorlugu eqqartuunneqarsinnaalluni. Nangilluni oqarpoq suliap qanoq ingerlasimanera eqqarsaatigalugu nunat tamalaat akornanni suliaq attuumassuteqartoq, taamaalillunilu allagartanik paasissutissanillu pissarsinissaq sivisunerusoq.

Suliap pisoqaavallaarsimanera pillugu illersuisut tunngavilersuutaannut tunngatillugu unnerluussisussaatitaasoq oqarpoq Inatsisinik Atortitsinermut Ministereqarfiup Japanimit tigusarinneqqussutit tamaasa pigigai, red noticemilli nalunaarut ataasiaannarnikkut ulluni 14-ini apuutinngitsoorsimasinnaanerarpaa:

- Tupaallannanngilaq nunat ingerlaannaq qisuariarsimanngimmata, nunami tunniussinissamik qinnuteqannginnerani tigusarinnittoqaqqaartariaqarpoq, Mariam Khalil oqarpoq nangillunilu:

- Aamma nunat ilaat red noticemik qisuariarfiginnissimannginnerat Japanip pisuussutiginngilaa.

Japanimik isornartorsiuisoq

Inaarutaasumik oqaaseqarnermini illersuisup Jonas Christoffersenip Japan isornartorsiorpaa:

- Qaartartumik tippassaasumik milorsineq ukiut 14-it matuma siorna pivoq, Japanimiullu PW-mik tunniussinissamik qinnuteqaraluarput, kingornali iliuuseqanngillat, oqarpoq nangillunilu:

- Japanimi oqartussaasut pissutigalugit suliami piffissaq sivisooq atorneqarpoq, Japanilu pissutigalugu ullumikkut eqqartuussivimmi issiavugut, illersuisoq oqarpoq, taannalu isumaqarpoq Watsonip tigummigallarneqarnissaa tunngavissaqanngitsoq.

Aamma Paul Watsonip oqaaseqarnissaminut periarfissaqarpoq:

- Juulimi eqqarsaatigisimanngilara ullumi inuuissiorlunga Kalaallit Nunaanni eqqartuussivimmi issiajumaarlunga, Watson oqarpoq, aamma oqarpoq ernini inuuissiormata peqataasinnaasimanani.

Pinngitsuunngilluinnarnini erseqqissaqqippaa:

- Politikkikkut suliatut uannut suliassiissutigineqarsimavoq. Suliaq annikitsunnguaq angisuuliutigineqarpoq.

- Danmark inatsisinik maleruaasutut tatiginartutut ilisimaneqarpoq, kisianni qanoq pisoqarsimasoq takusiuk, Paul Watson eqqartuussivimmi oqarpoq.

Tigummigallarneqarnera sivitsorneqarpoq — decembarilli 18-iata tungaannaanut

Eqqartuussisoq Lars-Christian Sinkbæk nalunaaqutaq 11.00 aalajangiivoq. Tigummigallarneqarnera sivitsorneqarpoq, unnerluussisulli kissaatigisaatut sivisutiginngitsumik.

Unnerluussisussaatitaasoq decembarip 30-ata tungaanut tigummigallarneqarnissaanik qinnuteqareersoq tigummigallarneqarnera decembarip 18-ata tungaanut sivitsorneqarpoq.

Inatsisinik atortitsinermut ministereqarfiup ullut 14-it qaangiutsinnagit aalajangiinissaanik nalunaaruteqarnera pissutaavoq.

Watsonip illersuisuata eqqartuussut ingerlaannaq suliareqqitassanngortippaa.