Nuuk: Nipilersornermik isiginnaartitsinermillu sceneqalersinnaasoq
Nuup qeqqani Aqqaluup aneerasaartarfiani silami tusarnaartitsivissamik isiginnaartitsivimillu pilersitsinissamik aalajangiiffigisassatut siunnersuut ukiut qulit sinnerlugit pisoqaassusilik Kommuneqarfik Sermersuumi kommunalbestyrelsimi oqaluuserineqaqqippoq.
Kommunalbestyrelsimi ilaasortaq kisimiittoq Kommuneqarfik Sermersuumi, Storm Ludvigsen, tapersersorneqarpoq siunnersuutigalugu Nuuk-mi sapaatip akunneranut nipilersornermik takutitsiviliornissamut.
Leiff Josefsen
Illoqarfiit pingaarnersaanni aasaanerani sammisassaqartitsineq annertusarniarlugu kommunalbestyrelsimut ilaasortaq Storm Ludvigsen aalajangiiffigisassatut siunnersuuteqarpoq. Tassa Aqqaluup aneerasaartarfiani, Nuutoqqamut aqqutip eqqaaniittumi, nipilersornermik sceneqalissasoq.
-2013-mi siunnersuutiginikuuara silami tusarnaartitsisarnissamut isiginnaartitsisinnaanermullu
scene pillugu, ajoraluartumilli suliaq akuerisaq tammaannarsimagunarmat maanna
saqqummiuteqqippara, Storm Ludvigsen siunnersuuteqarnermini kommunalbestyrelsip kingullermik juunip naanerani ataatsimiinnerani suliarineqartumi allappoq.
- Nuummiorpassuit Nuuk qimanneq ajorpaat annerusumillu illoqarfitsinni ilaqutariittut
sammisassaqarpallaartaratik, nipilersornermik scenemik peqalernissaanik siunnersuummi ilaatigut tunngavilersuutigineqarpoq.
- Nipilersornermik scene Aqqaluup Aneerasaartarfiani inissinneqarsinnaasuuppat ilimagilluarpara
Nuummi innuttaasorpassuarnit ornigaalluassasoq. Una siunnersuut innuttaasunut tunissutitut
isigineqarsinnaavoq, Storm Ludvigsen allappoq. Siunnersuut ukioq manna piviusunngortinneqarsinnaasoq taanna isumaqarpoq.
Aalajangiussassatut siunnersuut kommunalbestyrelsimit tigulluarneqarpoq, siunnersuullu illoqarfimmik ineriartortitsinermut sanaartornermullu ataatsimiititaliamut aamma aningaasaqarnermut inuussutissarsiornermullu ataatsimiititaliamut suliareqqitassanngorlugu taakku aalajangerpaat.
