POLITIIT DØGNRAPPORT
Nuummi 230 gram hash kiisalu aningaasat arsaarinnissutigineqarput biilimik unitsitsinermi Aasiannilu savilersortoqarluni
Kalaallit Nunaanni Politiit nakkutilliisuutitaasa pisortaat, Aputsiaq Hansen oqaluttuarpoq politiit sumiiffinni tamani immikkut ittumik tallimanngornermiit arfininngornermi ullaap tungaa ilanngullugu assut ulapputtut. Biilertoq Nuummi unitsinneqarpoq tassanilu nassaarineqarpoq hash 230 grammit missaaniittoq aningaasallu. Aasianni napparsimmavik politiinut nalunaarutiginnittoqarpoq, nakorsiaq aarasattuinnaammat, paasineqarpoq savimmik arlaleriarluni kapineqarsimasoq.
Tallimanngorneq akissarsiffik Kalaallit Nunaanni Politiinut nuna tamakkerlugu annertuumik ulapaartitsivoq.
Assiliisoq: Leiff Josefsen
Tallimanngorneq 12:01 politiit Narsami ATV-mik unitsitsipput, ATV-mik ingerlatsisoq marlunnik ilaasoqarmat, angallassissutit taakku aquttup saniatigut ataasinnaarmik ilaasoqarsinnaatitaagaluartut. Misissuinermi aamma paasinarsivoq aquttoq allagartaqanngitsoq. Taassumalu akiliisitaanissani naatsorsuutigisinnaavaa.
- Pingaaruteqarpoq ATV-mik ingerlatsisinnaanermi maleruagassat inatsillu suut atuunnersut inuit ilisimassagaat. Assersuutigalugu ATV-mik ingerlatsiniaraanni atuuttumik allagartaqartoqartussaavoq ataasiinnarmillu ilaasoqartoqaqqusaavoq, Kalaallit Nunaanni Politiit nakkutilliisuutitaasa pisortaat, Aputsiaq Hansen, erseqqissaavoq.
Taamatuttaaq assingusumik Sisimiuni ATV-mik unitsitsisoqarpoq, tamanna pivoq tallimanngorneq nal. 21:02.
Aputsiaq Hansenip ilanngullugu erseqqissaatigaa ATV-mik ingerlatsisinnaanermut maleruagassat unioqqutinneqartillugit, ukiullu pingasut iluanni pingasoriarluni unioqqutitsisoqarsimappat, ATV arsaarinnissutigineqarsinnaasoq.
Nuummi biilimi unitsinneqartumi 230 gram hash aningaasallu nassaarineqarput
Nuummi poliiit tallimanngornermi nalunaaqutaq 18:00, biilimiit hashimik tuniniaasoqarsoralugu pasinartoqarmat biili pineqartoq unitsippaat. Tassani hash 230 gram missiliorlugu annertussusilik aningaasallu arsaarinnissutigineqarput. Nakkutilliisut pisortaata Aputsiaq Hansenip oqaatigiumanngilaa aningaasat qanoq amerlatigisut arsaarinnissutigineqarsimanersut, misissuineq suli ingerlammat.
Taannali oqaluttuarpoq politiit tigusarinnereernerup kingorna aamma Nuummi sumiiffinni adressini arlalinni misissuinermik aallartittoqarsimasoq.
Aasianni nakorsiaq savimmik arlaleriarluni kapineqarsimasoq
Tallimanngornermi nalunaaqutaq Aasianni politiit nalunaaqutaq 19:58 napparsimmavimmit attavigineqarput. Nakorsiap timaani atisaanilu aarasattuinnaammat pasinarmallu pinerluffigitissimassasoq. Taamaammat napparsimavimmit pasitsaassaqartoqarmat politiit attavigineqarput.
Paasineqarpoq nakorsiaq pineqartoq savimmik arlaleriarluni timaatigut savimmik kapoorneqarsimasoq. Politiit suliaq misissuiffigaat, nakkutilliisullu pisortaata oqaluttuaraa tassunga atatillugu inummik pasineqartumik tigusarinnittoqarsimasoq, aammalu pineqartoq eqqartuussivimmut sassartinneqassasoq tigummigallagassanngortinneqarnissaa siunertaralugu.
Maqaasineqartoq ajunngitsoq nassaarineqarpoq
Qaqortumi politiinut inummik maqaasineqartumik nalunaarutiginnittoqarpoq. Pineqartoq Nanortalimmit Qaqortumut aallarsimavoq. Kisianni ilaqutaasut ernumasut maqaasisartik suli tikissimanngimmat nalunaarutigaat arfininngornermi ullaassakkut nal. 01:51.
Politiit Issittumilu Sakkutuut nalilersuereernerup kingorna ujaasilerput politiit umiatsiaannik Issittumilu Sakkutuut qulimiguuliannik.
Ujaasinerup nalunaaquttap akunnerit arlallit ingerlareernerani inuk sikup qaavaniittoq nassaarineqarpoq umiatsiaalu kivisimatilluni. Pineqartoq ajunngitsoq nassaarineqarsimasoq oqaatigineqarpoq.
Taamatuttaaq tallimanngormat Nanortalimmi umiatsiamik angalasut illoqarfiup eqqaani motoorimik unittarput. Nanortalimmi politiit ikiuupput inunnillu angallamminnik ajutoorsimasut nunamut isumannaatsumut pissunneqarlutik.
Savimmik toqumut sioorasaarineq
Arfininngornermi ullaakkut nal. 06:19 Nuummi taxamik ingerlatsisoq savimmik toqumut navianartorsiortinneqarsimassasoq Nuummi politiinut nalunaarutiginnittoqarpoq, ilaasoq pineqartoq taxamik akiliinani taxamit qimagussimasoq ilanngullugu nalunaarutigineqarluni.
Kalaallit Nunaanni Politiini nakkutilliisut pisortaat, Aputsiaq Hansen oqaluttuarpoq maanna suliaq misissuiffigineqartoq, nangillunilu oqaluttuarpoq politiit pasineqartumik tigusarinnissimasut.
Biilimik tillittup biili tillitani sequmikkaa
Nuummi biilinut tunngatillugu allamik nalunaaruteqartoqarsimavoq arfininngornermi ullaakkut nal. 06:34. Tassani biili tillinneqarsimasoq nalunaarutigineqarpoq, tillittorlu biilimut allamut aporsimalluni
Biili tillinneqarsimasoq atorsinnaajunnaarlugu sequminneqarpoq aporneqartorlu biili annikitsuinnarnik ajoquserneqarsimalluni, apornermi inunnik ajoqusertoqanngilaq. Biilimik tillittoq ajutoorfimmit qimaasinnaasimavoq, politiillu piaarnerpaamik iliuuseqarnerisigut tigusarineqapallassimalluni.
Taassuma biilimik tillittup naatsorsuutigissavaa biilimik tillinniarneq, biilernermut allagartaqarani biilerneq kiisalu apornermik nalunaaruteqannginneq pillugu pineqaatissinneqarnissi naatsorsuutigissavaa.
Vagtchefi Aputsiaq Hansen naggasiullugu oqaluttuarpoq politiit nuna tamakkerlugu assut ulappussimasut suliarisimasaasalu amerlanersaat aalakoornartutorsimanermut attuumassuteqartut tassa aqqusinermi eqqissiviilliornerit, angerlarsimaffimmi eqqissiviilliornerit, nakuuserluni pinerlunnerit allatullu suliat.
