Nuummi mittarfimmut anguniagassanut piviusorsiunngitsunut atorfillit mianersoqqusipput
Greenland Airportsip Nuup mittarfiani One Stop Security 2025-mi aasakkut EU-mit akuerineqarumaartoq naatsorsuutigaa. Tamanna naatsorsuutigineqarsinnaanngitsoq Angallannermut Aqutsisoqarfiup siornali ilisimatitsissutigaa. Ajornartorsiutit tamarmik aaqqinneqareeraluarpataluunniit nakkutilliinissaq pisariaqartoq ukiumi ataatsimi ingerlasinnaasoq EU-mi kommissioni ilisimatitsivoq.
Nuummi mittarfik piumasaqaatinik assigiinngitsunik naammassinninniarluni unammilligassaqarpoq.
Foto: Leiff Josefsen
Nuummi mittarfissuup nutaap 2024-mi novembarip
28-ani atoqqaarfissiorneqarmat nalliuttorsiorfiuvoq. Mittarfilli suli
arlalitsigut amigaateqarpoq. Taakkua ilagaat EU-p One Stop Security-mik (OSS)
taaguutilimmik akuerinninnissaa.
Ataatsimoorussamik Sakkut (OSS)
Mittarfik One Stop Securityqarpat tamanna mittarfik EU-mi piumasaqaatinut naapertuuttumik isumannaallisaaffeqartoq isumaqarpoq.
Angalasut taamaalillutik EU-mut ingerlaqqinnissaminnut sillimaniarnermut nakkutilliivikkooqqittariaqaratillu nassataminnik tunniusseqqaartariaqaratik ingerlaqqissinnaapput.
Aammattaaq OSS timmisartunut pitsaanerusunik atugassaqartitsivoq, taamaattumillu timmisartortitseqatigiiffinnit iluarineqarluni.
Nuummi Ilulissanilu OSS-eqalernissaq pilersaarutaavoq. Kangerlussuaq 2013-imiit 2024-mut OSS-iuvoq, maannali atorunnaarnikuulluni.
OSS-imut akuersissuteqassagaanni mittarfik EU-mi oqartussaasut nakkutilliiaartornissaaq isumaginiarlugu Angallannermut Aqutsisoqarfimmut qinnuteqassaaq.
Greenland Airports 2019-imi qinnuteqareerpoq, EU-llu nakkutilliinissaa septembarip aappaaniit arfernata tungaanut 2024-mi pisussanngortinneqarpoq.
Angallannermut Aqutsisoqarfik marloriarluni isumannaallisaanermut killilersuinermullu tunngatillugu amigaateqartoqarnera paasigamikku Nuummut tikeraareerluni pilersaarut 2024-mili aasakkut taamaatippaa.
Mittarfik OSS-imik akuerisaappat ilaasut EU-mi
sumiiffimmut allamut ingerlaqqittussat, assersuutigalugu Københavnip
mittarfianiit, isumannaallisaanermi nakkutilliisunit misissorneqaqqaaratik
nassataminnillu tunniussqqigatik timmisartumut allamut ikisinnaapput.
Angalasunit timmisartuutileqatigiiffinniillu iluarineqaqisoq.
Greenland Airportsimit OSS 2025-mi aasakkut piareernissaa
naatsorsuutigineqartoq qangali nalunaarutigineqarpoq. Mittarfiup nittartagaani
suli taamatut allassimavoq.
Kikkulli tamarmik taama
isumalluartiginngillat.
2024-mi septembarip 18-ianut uteriarutta.
Qaqortumi kommunalbestyrelsip ataatsimiittarfiani Kalaallit Nunaanni
silaannakkut angallanneq pillugu oqallittoqarpoq.
Tassani OSS-imik akuersissummik
tunniussinissaq Nuummi mittarfissuup atulernissaanut
naammassineqarsinnaanngitsoq paasinarsivoq. Siusinnerusukkut tamanna
neriuutigineqaraluarpoq, EU-mit tikeraartoqarnissaa 2024-milu septembarip aallartinnerani
pilersaarutaasimalluni.
Angallannermut Aqutsisoqarfiup
tikeraarnissartik taamaatiinnarpaat. Siunertaqanngimmat, taamani naliliipput.
Sillimaniarneq amigaateqaqaaq, ilaatigut sulisut sungiusarneqannginnerat
pissutigalugu. Taamani Nuummi mittarfik nunanut allanut timmisartuussinissamut
akuersissummik aamma annaasaqarsimavoq.
Kujataani septembarip qaammataani
ataatsimiinnermi Greenland Airportsip 2025-mi aasaanerani Nuummi OSS-imik
akuersissummik pissarsinissani aamma naatsorsuutigissanngikkaa Angallannermut
Aqutsisoqarfik erseqqissumik oqarpoq.
Greenland Airportsip ingerlatsinermut pisortaa
Niels Grosen peqataavoq, taamaalillunilu oqariartuut qullersanit tusarneqarpoq.
Nuummi mittarfimmi isumannaallisaanikkut aamma
ajornartorsiuteqartoqarpoq, tamanna januaarimi misissuinerup takutippaa. Suup
ajornartorsiutaaneranik suli paasititsiisoqanngilaq. Nuummiilli nunap avataanut
allakkanik nassiussanillu assartuussisoqarsinnaajunnaarneranik piffissami
sivikitsumi kingunearpoq.
EU piffissamik pisariaqartitsisoq
2025-mi aasakkut OSS-imik akuersissummik tunineqassagaanni isumannaallisaanerup pitsaasuunissaata saniatigut aamma allamik unammilligassaqarpoq. Ajornartorsiutilli aaqqinnissaat kisimik naammanngillat. Aaqqissimanerat aamma misissorneqaqqaartussaapput.
EU-Kommissionip siorna OSS-imik misissuinissamut juulimi taamaatiinnarneqartumut atatillugu attaveqatigiinneq Sermitsiap allagaatinik takunnissinnaaneq aqqutigalugu pissarsiaraa. Nuummi pissutsit iluarsineqarnissaata tungaanut tusaqqinnissaq pisariaqanngitsoq Komissioni Angallannermut Aqutsisoqarfimmut allappoq.
Pingaarnertut, EU-mit nakkutilliiartortoqaqqinnissanut ukiup ataatsip missaa utaqqisoqarsinnaasoq, aamma nakkutilliisut piffissaq sivikitsoq atorlugu Kalaallit Nunaannut tikissinnaanavianngitsoq paasissutissiissutigineqarpoq.
Allatut oqaatigalugu: Angallannermut Aqutsisoqarfik naapertorlugu EU-mit aggersaasoqartinnagu Nuummi mittarfik piareersimalluinnartariaqarpoq. Aamma ingerlaannaq aaqqiisoqaraluarpalluunnit OSS-ip aasarumut atuutilertinnissaa kingusinaarpoq.
Oqartussaasut nalunaarutaat eqqarsaatigalugit sooq Greenland Airports OSS-imut tunngatillugu taama isumalluartiginersoq Greenland Airportsip pisortaa Jens Lauridsen nassuiaateqartikkusukkaluarparput. Attaveqatigiinnermulli pisortap Mikkel Bjarnø Lundip allakkatigut akissutaa kisiat pissarsiaraarput.
– Nalunngisatsitut Nuummi One Stop Securitymik akuersissuteqalernissaq sulissutigaarput. Suliaq ingerlaarpoq assigiinngitsorpassuarnik ilaqarluni. Malinnaatitsissaagut, tunngavissaqarluarpallu nalunaaruteqassalluta, allappoq.
GA: Nutaarsiassaqarpallaanngilaq
Aamma Greenland Airportsimi qullersanit paaserusupparput sooq suliffeqarfik taama annertutigisunik anguniagaqartarnersoq, amerlanertigut kinguaattoorfiusartunik (assersuutigalugu OSS-imut akuersissummik pissarsinissaq) imaluunniit piffissaq kingulleq atorlugu aatsaat angusaqartoqarsinnaasunik (Nuup mittarfiata ammarnissaa).
Attaveqaqatigiinnermut pisortap ima akivoq:
- Nunanit tamalaanit mittarfiliorneq taassumalu atulersinnissaa – soorlu illit aamma nalunngikkit – suliniutaavoq annertooq suliassarpassuaqarsiusoq. Suliat amerlasuut imminnut ataqatigiipput, suliallu naammassiuminaatsut allanut sunniuteqarsinnaasarlutik.
– Suli periutsit misilittakkatillu inissinneqartussaapput, taakkualu ilaat arlallit mittarfik aatsaat tamakkiisumik atulereerpat periutsit atortullu misilittarneqarsinnaallutik. Piffissap killiliussap tungaanut sulisarneq nalinginnaasuuvoq, tamatumalu kingorna alloriaqqinnissat pilersaarusiorneqareertarlutik.
Kiisalu pisortaaneq apeqqutit makku pillugit sooq apersorneqarusunnginnersoq, attaveqaqatigiinnermullu immikkoortortaqarfimmit akissutisinissaq naammagiinnartariaqarneripput Sermitsiap apeqqutigaa. Ima akissutisivugut:
– Apeqqutinnut atatillugu maannakkut nutaanik nutaarsiassaateqarpallaanngilagut. Tamatuma saniatigut pisortavut tusagassiuutitigut, aamma Sermitsiami/Tusagassiorfimmi, saqqummertarput. Taamaattumik ilaannikkut pingaarnersiuisariaqartarpugut, taamaattumillu maannakkut uanga akissuteqarpunga – tamannami aamma suliassama ilagaat, attaveqaqatigiinnermut pisortaq Mikkel Bjarnø Lund allappoq.
