Nuummi pineqaatissinneqarsimasunut inissiisarfiup ulikkaaqqavallaarnera isornartorsiorneqartoq

Nuummi pineqaatissinneqarsimasunut inissiisarfik nutaaq 76-inut inissalik 2019-imi atoqqaarfissiorneqarmat illorsuup ilusilersugaanera nersualaarneqarpoq.

Maanna ukiut arfinillit qaangiussimalersut inissiisarfik ima tattoqisaaffiutigilersimavoq allaat Europap Siunnersuisoqatigiivisa Naalliutsitsinermik pinaveersaartitsinermut Ataatsimiititaliaata isornartorsiorlugu.

Pineqaatissinneqarsimasunut inissiisarfimmiittut ima amerlatigilersimapput allaat ineeqqami ataatsimi marlukkaalersimallutik, ataatsimiititaliami ilaasortat januaarimi tikeraareerlutik nalunaarusiaminni nutaami allapput.

Tamanna Inuit Ataqatigiit sinnerlugit folketingimut ilaasortap Aaja Chemnitzip isornartorsiorpaa.

- Ineqatigiiaarneq pissutaalluni inissiisarfimmiittup inuusuttup ineqatini ukioqqortuneq innarleraa ataasiarluta nalaapparput, oqarpoq.

Isornartorsiut: Pineqaatissinneqarsimasut pisinnaatitaaffitik pisinnaanngikkaat

Piffissami killiligaanngitsumi inissiisarfimmiittussassanngortinneqarsimasut tassaniittut amerlasuut sakkortuumik pinerluuteqarsimasuupput.

Inissiisarfiup tattoqiffiunera pissutaalluni pineqaatissinneqarsimasut allanik tigummigallarneqartunik ineqateqartinneqartartut Europap naalliutsitsinerup pinaveersaartinnissaa siunertaralugu ataatsimiititaliaata allaaseraa. Inissiisarfimmiittummi tunngaviusumik pisinnaatitaaffitik pilliutigisinnaasarmassuk tamanna ajornartorsiutaasinnaavoq.

Aaja Chemnitzip Kalaallit Nunaanni eqqartuussiveqarnikkut amigaateqartoqarnera pillugu inatsisinik atortitsinermut ministeri Peter Hummelgaard arlaleriarluni ataatsimeeqatigisarlugu oqaatigaa.

- Inissap allilertariaqarnerata pisariaqartinneqarmat aningaasaliiffigineqarnissaata pingaarnersiortariaqarneranik qallunaat naalakkersuisuinut tatisinerulerpoq, Aaja Chemnitz oqarpoq.

Aamma nersualaarneqartut

Nuummi pineqaatissinneqarsimasunut inissiisarfimmi atugassarititaasut ajunngitsut Europami naalliutsitsinerup pinaveersaartinnissaa siunertaralugu ataatsimiititaliap nalunaarusiaani aamma eqqaaneqarpoq. Illorsuaq nersualaarneqarpoq, pineqaatissinneqarsimasullu sammisassaqartinneqarluartarlutik.

Inissaqarniarnermillu ajornartorsiutit aaqqinniarlugit iliuuseqarfigineqarnerusariaqartut Danskit naalakkersuisuinut ersarissumik inassutigineqarput.

Kalaallit Nunaanni eqqartuussiveqarneq Danmarkimit aqunneqarpoq, unammilligassallu inatsisinik atortitsinermut ministerip Peter Hummelgaardip ilisimavai.

Danmarkimi Kalaallit Nunaannilu pineqaatissinneqarsimasut inissiisarfiit annertussusaat ajornartorsitaasut taanna oqarpoq.

Ajornartorsiut aaqqinniarneqassasoq Peter Hummelgaard oqarpoq.

- Taamaattumik pillaasarneq pillugu aaqqissuusseqqinnermut atatillugu - Danmarkimi Pinerluttunik Isumaginnittoqarfiup angissusaata saniatigut - Kalaallit Nunaanni Pinerluttunik Isumaginnittoqarfiup maanna ajornartorsiutaa siunissaq ungasinnerusoq eqqarsaatigalugu aaqqiviginiarlugu Kalaallit Nunaanni pineqaatissinneqarsimasunut inissiisarfiit inissakilliorfionerat aamma iliuuseqarfigineqassaaq, Peter Hummelgaard oqarpoq.

Naalakkersuisut suliamut peqataatinneqassapput.