Nuummi uumasuutinut iliveqarfik ammalerpoq

Nuummi innuttaasut uumasuutiminnik ataqqinnittumik ilisinissaminnut periarfissaqalissapput. Kommuneqarfik Sermersooq nittartakkamini ilisimatitsivoq innuttaasut siunnersuutaat maanna piviusunngulersoq.

Nuummi innuttaasut asasaminnik naggataasumik inuulluaqqusisinnaanngulerput, tassami uumasuusutik iliversinnaanngulermatigit, oqarsinnaanngussagunarlutillu "Eqqaaneqarnerit ataqqinartuuli". 

Uumasut eqqissivissaminnut ilineqartalernissaannut piareersaatit kingulliit naammassingajalerput. Maanna amigaataaginnarpoq nunamik assaanissaq.

Iliveqarfittaassap ammarnissaa suli ullulerneqanngilaq.  Kommuneqarfik Sermersuup sanaartornermi pisortaa Rudi Birkedal paasissutissiivoq iliveqarfik aasaq manna naanerata missaani ammarneqassasoq.

Uumasunut 100-nut inissaqartoq

Uumasuutinut iliveqarfik Pisissip aamma Ukkusissap sivingarngata akornanni inissisimavoq. Uumasuutinut iliveqarfik uumasunut 100-nut inissaqarpoq, taakkunanngalu siulliit qulit inniminnerneqareerput, Rudi Birkedal paasissutissiivoq.

Illoqarfimmik ineriartortitsinermut Sanaartornermullu Ataatsimiititami siulittaasup, Justus Hansenip, innuttaasunit siunnersuutip massakkut piviusunngortinneqarnera assut nuannaarutigivaa. Tamanna innuttaasut oqartussaaqataanerannik pitsaasutut takutitsisutut isigalugu.

Tom Amtoft, qimminut nakkutilliisoq, iliveqarfimmi inissanik ilisimasalik oqaluttuarpoq: 

- Kiisami tassunga killikkatta nuannaarutigivara, uumasuutit siulliit ilisinnaannguliivippagut. Uumasuutinut iliveqarfiup ammarneqarnissaanut sila assut apeqqutaasimavoq. Ukiup issinera annerusumik minnerusumilluunniit qaangiuppoq, taamaalillutalu nuna assassinnaanngorparput. Tamanna aamma siunissami uumasuutinik ilisiniartarnitsinnut apeqqutaasussaavoq, uumasuutit ilineqarsinnaanerat eqqarsaatigalugu, naak inissaqaraluartoq, oqarpoq nangillunilu:

- Suliniummik tapersersuillutik nukippassuit nammineq piumassutsiminnik atorneqartut assut tupigusuutigivakka. Taakkoqanngippat maani Nuummi uumasuutinut iliveqarfik pilersinneqarsimanavianngikkaluarpoq.

Uumasunut iliveqarfik Donnas Dyreklinikimit aqunneqassaaq. Uumasuutigisap ilineqarnissaa kissaatigineqarpat imaluunniit apeqqutissaqartoqarpat, taava Donna Dyreklinik attavigeqquneqarpoq, Kommuneqarfik Sermersooq nittartakkamini allappoq.

Powered by Labrador CMS