Nuup mittarfiani nassiussanik inerteqquteqarnerup Kalaallit Nunaannit nassiussat unitsikkai
Trafikstyrelsip Nuummit nunatsinnit timmisartukkut nassiussuinermik inerteqquteqarnerata kingorna, Tusass aaqqigasuarnissamik kissaateqartunut ilaavoq.
Air Greenlandip timmisartua Tuukkaq nalinginnaasumik Nuup Københavnillu akornanni silaannakkut allakkerisutut atuuppoq. Tamannalu maannakkut ingerlanneqarsinnaanngilaq.
Assi: Leiff Josefsen
12.00
Air Greenlandip oqaaseqaataanik nutartigaq.
Sapaatip akunnerani kingullermi Greenland Airportsip Nuup Mittarfianit Danmarkimut nunanullu allanut silaannakkut nassiussanik passussisinnaanermut akuersissutini annaavaa.
Tamanna Nuummi mittarfiup silaannakkut nassiussanik passussisinnaanermik screenerisinnaanermillu pisariaqartumik piumasaqaatinik naammassinnissinnaannginneranik patsiseqarpoq.
Tamatuma ilaatigut Tusassimit nassiussat piffissami sivisussusilerneqanngikkallartumi utaqqinissaannik kinguneqarpoq, Air Greenlandimmi taakku Københavnimut usisinnaanngilai.
– Nassiussanik nunatsinnit nassiussisinnaajunnaarnerput uggorisorujussuuarput. Pissutsit qanimut malinnaavigaagut, erniinnarlu ammaqqissinnaanerat kissaatigaarput, Tusassimi niuernermi pisortaq Nikolaj Christoffersen oqarpoq.
GA isumalluartoq
Nalinginnaasumik allakkat 150 aamma 200 kiilut sapaatip akunnerani ingerlaarfinnut agguarlugit Danmarkimut nassiunneqartarnerat, Tusassip ilisimatitsissutigaa.
Tusassi suli timmisartukkut nassiussanik tigusisinnaavoq, taamaallaalli qaqugu nassiussat nalinginnaasumik ingerlaqqilernissaat sillimmartaarutigineqartarpoq. Tamatumani Mittarfiup, naggataagullu qaqugu Trafikstyrelsip akuersissuteqarumaarnera apeqqutaavoq.
Tallimanngormat nalunaarut malillugu Greenland Airportsip pisut pilersortumik paasinarsinissaat aallaavigaa. Timmisartukkut nassiussat “ullualuit qaangiuppata” ingerlaqqilissasut tassannga nalunarutigineqarpoq.
Ataasinngornermi
Greenland Airportsimit malitseqataasumik oqaaseqartitsinissaq
pisinnaanngilaq.
– Air Greenlandip
pisisartuni pissutsit pillugit ilisimatippai. Greenland Airportsip avammut
nassiussanik passusseqqilersinnaanermut piareerluni nalunaarnissaata tungaanut,
terminalitsinnut usinik allakkanillu tunniussinissap utaqqinneqarnissaa
tamatuma kinguneraa, assartuinermi pisortaq Søren Støvhase Nørsø oqarpoq.
Air Greenlandip suli
minnerusunik utaqqisinneqarsinnaanngitsunillu nunatsinnit nassiusisinnaaneq
ammasoq erseqqissaatigaa. Taamaammat assersuutigalugu peqqinnissaqarfik
aaviinernik assigisaannullu misissugassanik Danmarkimut nassiusisinnaavoq.
Inerteqqut Nuummuinnaq atuuttoq
Trafikstyrelsip aalajangernerminut kinguneqartumik Nuup mittarfiani sorpiaat ajornartorsiutaanersut itisilerusunngilaa.
– Mittarfimmi isumannaallisaaneq annertuumik isertuussaammat ataasiakkaanik oqaatigisaqarsinnaanngilagut, vicedirektør Christian Vesterager nakkutilleereernermi oqarpoq.
Oqaatigineqareersutut inerteqquteqarnermi taamaallaat usit Nuummeersut pineqarput. Taamaalilluni allakkat assigisaallu Kalaallit Nunaannit avammut nunattaluunniit sinneranut nassiunneqartut pineqanngillat.
