AQQUSINERMI ANGALLANNEQ
Nuussuarmi aqqusinermi ajutoortoqartoq
Kalaallit Nunaanni Politiit sapaatip-akunnerata naanerani suliassakinnerusimapput. Inuit amerlanngitsut imigassartorsimatillutik eqqissiviilliortitsisut tigusarineqarsimapput. Politiilli maanna biilit aqqusinermi ajutoorsimanerat pillugu misissuipput.
Nuummi politiit aqqusinermi angallannermi ajutoortoqarsimaneranik maanna misissuipput.
Leiff Josefsen
Nuummi aqqusinermi ajutoortoqarnera politiinit maanna misissorneqarpoq.
- Biilertoq aqqusinermi qullermut aporsimavoq. Takusinnaasanni inunnik ajoqusertoqanngilaq, qullilerfiullu ajoqusernera Nukissiorfiit iluarsaatereerpaat, pigaartut pisortaat Gedion Quist Sermitsiamut oqarpoq.
Politiit biilertoq aalakoorluni biilertutut pasivaat.
- Aaversippoq, aaversinneralu misissorneqassaaq, akissutissaa sapaatit-akunneri sisamat missaanni utaqqissavarput, Gedion Quist oqarpoq.
Angallannermi ajutoortoqarneraniit sapaatip-akunnerata naanerani politiit eqqissisimanerusimapput. Inuit ataasiakkaat aalakoorsimasutut aqqusinermilu eqqissiviilliorsimasutut tigummigallarneqarput. Taakku sapaatip ingerlanerani iperagaassasut, politiit ilisimatitsissutigaat.
