Oqalutsit nutserisullu ineriartorneq nuannaarutigaat

Nunani avannarlerni piginnaasumik oqaluttaanerup pingaaruteqassusia pillugu nalunaarummut ONIP atsiorsimavoq, aamma Google Translatep kalaallisut saqqummersinneqarnissaa peqatigiiffiup nuannaarutigaa.

Nunani avannarlerni pisortat suliffeqarfiini oqalutseqarneq unammillernarpoq.

- Inuiaqatigiinni oqaatsit assigiinngitsorpassuit atorneqartartillugit, oqalutsinik ilisimasalinnik pisariaqartitsineq annertusarpoq. Pingaartumik inuiaqatigiinni minnerusuni innuttaasut oqalutseqarumallutik ilaquttaminnik isumalluuteqannginnissaat qulakkeerniarlugu, oqalutsit ilisimasallit aalajangiisuupput pingaarutillit, Nunani Tamalaani Nutserisut Ulluannut atatillugu septembarip 30-ani tusagassiuutinut nalunaarummi, qallunaatut allassimasumi, ONIP allappoq.

Kalaallit Nunaanni oqaatsit assigiinngitsut marluk

- Ajoraluartumik ilisimasalinnik oqalutseqarnerup pingaaruteqassusia nunani avannarlerni arlalinni akuerineqarpianngilaq. Amerlanertigut oqalutsinngorniarfiit aningaasalersorneqarpiartarnatilluunniit piuneq ajorput. Kalaallit Nunaannili pissutsit pitsaanerujussuartut misigaavut, oqaatsimmi marluusut atugaanerat pissutigalugu nutserineq oqalutseqarnerlu pingaarnerutinneqalermata, tamannalu ilinniartitsinerup pitsaalluinnartup qulakkeerneqarneranik kinguneqarpoq, taama Oqalutsit Nutserisullu Ilinniagartuut Peqatigiiffiat qiimmannartumik oqariartuuteqarpoq.

Google Translatep kalaallisut atorneqarsinnaalernera peqatigiiffiup nuannaarutigaa, tamannami “kalaallisut oqaatsit tikikkuminarnerulernissaannut alloriarnerummat pingaarutilik, taamaalillutillu inuppassuit kalaallisut paasiuminarnerulersitsissammata”.

Maskinali atorlugu nutserisut kukkujuitsuunngimmata taamaattumillu nutserisunik taarsiisinnaanngimmata, isornartorsiueqqaarnani atornissaannut peqatigiiffik mianersoqqusivoq:

- Oqalutsit Nutserisullu Ilinniagartuut Peqatigiiffiat naapertorlugu maskiinat atorlugit nutserutit, pitsaanerpaanik periaaseqaraluarpataluunniit, oqaatsit atorneqarfii, kulturikkut assigiinngissutit oqaatsilluunniit allaassutaalaassusaat nutserisunit ilisimasalinnit paasilluarnerusinnaanngikkaat eqqaamassallugu pingaaruteqarpoq.

Paasissutissat isumannaatsuunissaat

Paasissutissat inummut tunngasut mianernartullu qarasaasianut ikkunneqartarmata paasissutissat isumannaatsuunissaat apeqqusernartoq, peqatigiiffik aamma allappoq.

- Naammassiortuinermut sakkussatut maskiina atorlugu nutserineq pitsaanerpaasoq ONIP-ip erseqqissarpaa, tassami nutserisut ilisimasallit tapersersortarpai, taarsersinnaanngilaali. Eqqoqqissaartumimmi paasinartumillu nutserisoqarnissaa qulakkeerniarlugu ingammik allagaatit attaveqaqatigiinnerillu pingaarutillit pineqartillugit nutserisut ilisimasallit peqataatinneqartuartariaqarput, peqatigiiffik allappoq, taannalu oqalutsit nutserisullu akissarsiaannut, atorfinitsitaanissaannut aaqqissuussaanermullu tunngasunik soqutigisaannik isumaginninnermik siunertaqarpoq.