Partii Qulleq sassartitsinissaminut piareerpoq 

Partii Qulleq maanna piareerpoq atsiornerit piumasaqaataasut 860-it missaanni katersoreerlugit. Partiip siulittaasuata, Karl Ingemannip, Maniitsumi najugaqartup tamanna oqaluttuarivaa.

- Maanna sassarnermi partiitsinnit anguniakkagut inaarutaasumik qimerloorpagut pingaartitagullu ersarissassallugit, taavalu piffissaliussaq februaarip 18-iat nallertinnagu parteerput sinnerlugu sassartussat allattorsimaffii piareersartussaavagut qinersinernut marluusunut. Nunaqarfinni aqutsisunut aamma qinigassanngortitserusukkaluarpugut, kisianni piffissaqannginnatta siunnerfigiinnarparput tulliani qinersinissamut utaqqissutissallugu, Ingemann Sermitsiamut oqarpoq.

- Pingaarnertut anguniagarput tassaavoq inatsisit atuuttut aamma pisortat suliaat nunatsinni innuttaasunut, Nunap inuiinut iluaqutaanerusariaqartut naleqqussagaallutillu, aamma danskit systemiannik ilaarsiinnartarneq unitsinneqassasoq.

Piaarnerpaamik namminiilivinnissaq

Partii Qulleq sinnerlugu sassartussat sammisassaat annertooq tassaavoq namminiilivinnissaq. Partiip kissaatigaa piaarnerpaamik nunarput namminiilivissasoq, aatsaat taamaaliornikkut innuttaasunut atugassarititaasut pitsanngorsarneqarnissaat tassuua anguneqarsinnaasorigamikku:

- Piviusumik isigissagutsigu periarfissat nunaanniippugut, nunarput periarfissarpassuarnik peqarpoq tunniussassaqarlunilu, pisuussutit uumasusillit uumaatsullu iluamik atorneqanngillat. Kisianni kukkusumik atorpavut, allaat atornissaannut nammineq immitsinnut mattuttarluta. Tamanna pivoq nunami innuttaasut amerlasuut inuuniarnermikkut sakkortuumik atugaqartut pisariaqartitsisullu amerlalluinnarnerisa nalaanni, nunallu aningaasanik amigaateqartoq. Taama ingerlasinnaanngilagut.

Karl Ingemannip assersuutigalugu uuliasiorneq gassimillu qalluineq periarfissatut tikkuarpaa:

- Uuliamik gasimillu annertoorujussuarnik piiaaffiusinnaasunik peqarluta ilisimasavarput, aamma ilisimasavarput periutsit nutaaliaasut isumannaannerusullu ineriartortinneqartuartut, kisianni piiaaffiusinnaasut uninngatiinnarnissaat toqqarneqarsimavoq, Qullermit isumaqarpugut tamanna kukkunerusoq, taamaattumik uuliamik gasimillu qalluisoqarsinnaalernissaa ammaanneqassasoq sulissutigissavarput, Karl Ingemann oqarpoq.

Nunat amerlasuut Kalaallit Nunaannut ikiuisinnaapput

Karl Ingemannip erseqqissaatigaa ilisimagitsik namminiilivinnissamik toqqaanermi isertitat ilai annaaneqarsinnaasut:

- Ilimagisinnaavarput namminiilivinnitta aallartinnerani aningaasaqarnikkut unamminarnerulersinnaassasoq, kisianni kingornatigut sukkasuumik angummakkiartulissasugut qularinngilarput, ilaatigut inuussutissarsiutinik ineriartortitsinissamut suliniutit nunatsinni inuiaqatigiinnut nunap inuiinut naleqqussagaasut, danskit aaqqissuussaanerinut naleqqussagaanngitsut aqqutigalugit. Qularinngilara neriuutigalugulu namminiilivinnermi nunarput  sukkasuumik nalimmassassasoq.

- Nunatsinni innuttaasut kissaatigisaannik piumasaqaataannillu eqqortumik pingaartitsinitsigut, aammali nunat arlallit nunallu tamalaat kattuffiisa ikiuukkumasut nalunnginnatsigit, naalagaaffiup sanarfinerani ikiorneqarnissatsinnut pisariaqartitsigutta ikiortissaqarpugut, Karl Ingemann oqarpoq.

Aalisarnermut inatsit allanngortikkusuppaat

Partiip pingaarnersiuinerani aalisarneq piniarnerlu inutoorujussuupput. Partii isumaqarpoq aalisarneq nunatsinni ulorianartorsiortinneqartoq, allannguutissat sukumiisut pinngippata, 1990-ikkut aallartinnerani pisoq kingumut pisasoq aarlerinarnerarpaa.

- Tamanna pinngitsoortinniarlugu, anguniagarput tassaavoq aalisarnermut inatsit nutaaq allanngortinniarlugu, pingaartumik sinerissamut qanittumi aalisarneq annaanniarlugu iliuuseqartoqartariaqarmat. Eqqaamaneqarsimassaaq raajartassanik tuniniaaneq tunisinerlu annertuumik ingerlanneqarnikuummat, aammalu arlaleriarluni tunngavissaqanngitsumik, Eqqaamaneqarsimassaarlu taamani kilisaatinik raajarniutinik annertuumik ikilisaasoqarneranik kinguneqarnikuummat, aammalu naggataatigut allaat eqiterussinikkut aalisartitseqatigiiffissuit marluinnanngornikuullutik.

- Tamanna annertuumik pissuteqarpoq pisassiissutit amerlasuut allaat pinngitsaaliinertut isikkulimmik eqiterneqarnikuummata. Massakkut aamma taamaaleriaannaavoq, tamatumuuna sinerissamut qanittumi aalisarneq eqqarsaatigalugu, massakkummi pisassiissutaatillit pisassaatiminnik ataasiakkaarlutik tunisisariaqalissappata eqiterineq aallarteqqittussaavoq. Tamatuma malitsigisaanik suna pissava piffissap sivikitsup iluani? Pisassiissutaateqartut aningaasaqarnikkut nukittuumik inissisimasut eqiteruffigineqassapput, pinnatassiissutinik aalisarnermut inissaqartitsineq annikilliartorpoq, aalisartut piuneerunneqassapput, aalisarnermut inatsit atuutsinneqassappat, taamaattumik aalisarnermut inatsit allanngortinniarparput, Qullermi siulittaasoq, Karl Ingemann oqarpoq.

Karl Ingemannip saqqummiunnianngikkallarpaa qinigassanngortissinnaasatik qassiunersut, partii suli qinigassanngortittussanik katersimmat, taamaattorli kingusinnerpaamik februaarip 18-iani partiit sassartitaat sassartullu ataasiakkaat qinigassanngortittussaat tamanit takuneqarsinnaalissapput.