Partiimi siulittaasutut ministeriunertullu Sunak tunuarpoq

Aatsaat taama partiip qinigaanngitsiginerata kingorna Rishi Sunak partiimi siulittaasutut ministeriunertullu tunuarpoq.

Rishi Sunak ministeriunertut Konservativinilu siulittaasutut tunuarpoq, Downing Street 10-p silataani tallimanngornermi ullaap tungaani oqalugiarnermini oqarpoq.

Labourimut qinersinermi ajorsarnerup kingorna Rishi Sunak Konservativit siulittaasuattut ministeriunertullu tunuarpoq.

Downing Street 10-p silataani oqalugiarnermini taama oqarpoq, ministeriunertut pisortatigoortumik tunuarniarluni Buckingham Palacemi kunngi Charlesip naapinnginnerani.

- Ajuusaarpunga. Suliassaq manna naammassiniarlugu sapinngisara tamaat iliuuseqarnikuuvunga, Tuluit Nunaannili naalakkersuisunik nutaanik kissaateqarnersi ersarissumik takutipparsi. Ilissi eqqartuussutersi pingaaruteqartutuaavoq.

- Kamannersi pakatsinersilu tusaasimavakka, qinersinermilu ajorsarnerput akisussaaffittut tiguara.

- Qinersinerup inernerata malitsigisaanik partiimi siulittaasutut tunuassaanga. Ingerlaannaanngitsoq, kingoraartissarali kinaanersoq aalajangerneqareerpat, oqarpoq.

Sisamanngormat Tuluit Inatsisartuinut qinersisoqarpoq.

Qinersiviit tamarmik tallimanngormat ullup-qeqqanut suli kisinneqanngillat, taamaakkaluartorli Konservativit Partiiat oqaluttuarisaanermini aatsaat taama ajorsartigilersoq ersarippoq.

Sulisartut partiiat Labour Inatsisartuni amerlanerussuteqarluinnartoq qinersinerit kingulliit takutippaat. Maannamut partiip Inatsisartuni issiaviit 412-it qulakkeerpaat.

Konservativit 121-nik ilaasortaatitaqalerput. Inatsisartuni katillugit 650-inik issiaveqarpoq.

Tallimanngormat ullup-qeqqanut qinersiviit marluk suli inerneri ilisimaneqanngillat.

Tuluit Nunaanni inatsisartuni ilaasortat Sunak-ip naalakkersuisuinut ilaasortaasut arlallit ilaasortaaffimminnik annaasaqarput.

Ilaatigut taakkua ilagaat inatsisartut naalakkersuisooqatigiivini siulittaasoq, Penny Mordaunt, illersornissamut ministeri Grant Shapps aamma ilinniartitaanermut ministeri Gillian Keegan.

Rishi Sunakip siulia ministeriunertut atorfilik Liz Truss aamma inatsisartut ataanni ilaasortaajunnaarpoq.

Ministeriuneq tunuartoq Rishi Sunak kunngimik Charlesimik ataatsimeeqateqareermat, sulisartut partiianni siulittaasoq Keir Starmer Buckingham Palace-miippoq.

Tassani Starmer Tuluit Nunaanni ministeriunertut kunngip pisortatigoortumik toqqassavaa.

Nalunaaqutaq 13.20-p missaani Labourip siulittaasua Downing Street 10-mi oqalugiartussaavoq.

/ritzau/

Powered by Labrador CMS