NUUK
Pasinartumik toqusimasumik Nuummi nassaartoqartoq
Sisamanngornerup ullaassaani Nuummi inummik toqungasumik naammattoorsisoqarsimavoq. Politiit pigaartuisa pisortaat Aputsiaq Hansen tusagassiuutitigut nalunaaruteqarluni ilisimatitsivoq tassunga tunngatillugu angummik 29-nik ukiulimmik politiit tigusarinnissimasut, taannalu inatsit tunngaviusoq naapertorlugu killisiorneqareerluni ulluni 28-ni tigummigallagassanngortinneqarsimasoq.
Nuup qiterpasissuani Kalaallit Nunaanni Politiit sisamanngornerup ullaavaniit unnukkua tikillugu sumiiffimmi Nuup qiterpasissuani assiaqutsiillutik misissuipput. Maanna paasinarsivoq inummik toqungasumik naammattoorsisoqarsimanerata kingunerisaanik misissuineq ingerlanneqarsimasoq.
Assiliisoq: Morten Okkels
Kalaallit Nunaanni Politiit sisamanngornerup ullaassaani Nuummi najugaqarfimmi inuk toqungasoq pillugu nalunaarfigineqarput, Kalaallit Nunaanni Politiit tusagassiuutinut nalunaaruteqarlutik taamak ilisimatitsipput.
Killiffik tunngavigalugu misissuinerillu siulliit tunngavigalugit, toqusoqarsimaneranut atatillugu suliaq pasitsannartutut politiit misissugarileraat tusagassiuutitigut nalunaarummi oqaatigineqarpoq.
Suliamut atatillugu politiit angummik 29-nik ukiulimmik tigusarinnipput, sisamanngornermi unnukkut eqqartuussivimmi taanna sassartinneqarpoq ullunilu 28-ni tigummigallagassanngortinneqarluni.
Sermitsiamit Kalaallit Nunaanni Politiit attavigaagut paasissutissanik sukumiinerusunik pissarsiniarluta, taamatuttaaq paasiniarlugu toqungasoq nassaarineqarsimasoq arnaanersoq angutaanersorluunniit.
Politiit pigaartuisa pisortaat Aputsiaq Hansen ilisimatitsivoq, Kalaallit Nunaanni Politiit maannakkut paasissutissanik allanik tunniussisinnaanngikkallartut, misissuinerup suli naammassineqannginnera pissutigalugu.
