NALERAQ WATSONIMUT SULIAQ PILLUGU
Paul Watson Danmarkimut nuunneqarli
Partiiip Naleqqap siulittaasua, Pele Broberg piumasaqaateqarpoq avatangiisinik illersuiniaq Paul Watson nunatsinniit Danmarkimut "anisinneqassasoq".
Assi: Leiff Josefsen
NAALAKKERSUISUT SULIAQ WATSONIMUT TUNNGASOQ PILLUGU OQAASEQAATAAT
- Suliaq Naalakkersuisut saneraanit malinnaaffigaat, kisianni suliaq pillugu erseqqinnerusumik oqaaseqarsinnaanngilagut. Suliami akuunnginnatta, suliap takussutissartaanik takunnissinnaannginnerput siullertut tassunga pissutaavoq.
- Eqqartuussiviit sulinerisa politikkikkut sunnerneqarnissaat aappaatut kissaatiginngilarput.
- Kalaallit Nunaat nunaavoq inatsisitigut illersugaanermik pingaartitsisoq aamma nunap eqqartuussiviinut Naalakkersuisut tunngaviusumik tatiginnipput, nunallu inatsisaasa aalajangigaannik inerniliussiumaartut naatsorsuutigalugu. Kalaallit Nunaata nunat tamat akornanni inatsisit ataqqivai.
/Inatsisit atuutsinneqarnerannut Naalakkersuisoq, Naaja H. Nathanielsen ulloq 1. aggusti 2024
Nunatsinnit politikkikkut qisuariaatit ikittuinnaapput Paul Watsonip Nuummi juuli-p 21-ani tigusarineqarnerata kingunerisaanik.
Naalakkersuisulli, pingaartumik nunani tamalaani tusagassiorfinnit saaffiginnissutit imaaginnalivimmata, erseqqissaateqarnikuupput suliaq Watsonimut tunngasoq Danmarkimi inatsisinik atortitsinermut ministereqarfimmi akisussaaffigineqartoq. (Takuuk erseqqissaat sinaaniittoq)
Naleraq: anisissiuk!
Maanna, Kalaallit Nunaanni Eqqartuussiviup aalajangerpaa avatangiisinik illersuiniuteqartup Paul Watsonip tigummigallarneqarnera sivitsorneqassasoq, tamannalu aallaavigalugu partiip Naleqqap piumasaraa angut taanna Danmarkimut anisitaassasoq:
- Danskit akisussaaffiannut Inuiaat Kalaallit akunnermiliuttunngortinneqarput. Politiit danskiupput. Inatsisit atuutsinneqarnerannut ministeriaqarfik danskiuvoq. Paul Watson qanoq pineqassaneranut danskit
aalajangigassaraat, Pele Broberg poortuinani piumasaqarpoq.
Sermitsiap paasissutissat pissarsiai naapertorlugit Paul Watson imaaliallaannaq Danmarkimi paarnaarussivimmut nuuginnarneqarsinnaanngilaq. Watson Kalaallit Nunaanni tigusarineqarpoq, taamaammallu Kalaallit Nunaanni Eqqartussivimmut sassartinneqartussaavoq, aamma naggataatigut inatsisit atuutsinneqarnerannut ministeriaqarfik tunniunneqarnissaa pillugu aalajangiisuusussaagaluarpalluunniit.
Kalaallit Nunaanni inatsit atuutsinneqarnerannut suliassaqarfik kinguussaaqqavoq
Apeqqutigineqarmat politikkikkut akuliunnerunnginnersoq taamatut piumasaqarneq, pissaanerup pingasunngorlugu avinneqarsimanera innersuussutigalugu, Pele Broberg akivoq, maanna Danmarkip Kalaallit Nunaat atorlugu suliaq ingerlakkaa, nalunngikkaluarlugu Kalaallit Nunaannut attuumassuteqanngitsoq nunamullu ajoqusiisinnaasoq:
- Inatsisit atuutsinneqarnerannut suliassaqarfik Kalaallit Nunaanni sivisuumik kinguussaaqqavoq, takuinnarneqarsinnaapput pineqaatissinneqarsimasunut inissiisarfinni kommunefogedinullu atugassaritinneqartut qanoq kinguussaaqqatiginersut kiisalu inatsisit atuutsinneqarnerannik isumaginnittussat ikippallaarlutik, sanilliutissagaannilu inuk ataaseq, minnerpaamilluunniit Nunatsinnut attuumassuteqanngitsoq pillugu nukippassuarnik piffissamillu maanna atuisitsisoqartoq.
Broberg aamma innersuussivoq nunarsuarmi Kalaallit Nunaata sammineqarnera nunamut ajoqusiisinnaasoq suliaq nunatsinnut attuumassuteqanngitsoq nunattalu sunniuteqarfigisinnaanngisaa pillugu.
Sapaatip akunnerani matumani nunanut allanut ministeri, Lars Løkke Rasmussen oqaaseqarpoq, ajornakusoortorujussuussasoq Watsonip Japanimut tunniunneqannginnissaa, Danmarkip nammineerluni inatsisinik unioqqutitsisimasut ujaarineqartullu tunniunneqarnissaanik noqqaassuteqarsinnaaneq iluaqutigisarmagu.
Japanimut tunniunneqarnerata kingunerisinnaasai ernummatigai
Brobergip ernummatigaa, inatsisit atuutsinneqarneranut ministeriaqarfiup aalajangiutissappagu Watson Japanimut tunniunneqassasoq, tamanna Kalaallit Nunaata inissisimaneranut sunniuteqarnerlussasoq aamma Kalaallit Nunaat pineqartumi pisuutinneqassasoq, tassami pineqartoq Kalaallit Nunaannut attuumassuteqanngimmat:
- Kalaallit Nunaat avatangiisinut illersuiniaqatigiiffinnit ajortunik misilittagaqarpoq, siullermik Greenpeacep puisinniarnermut tunngatillugu innarlernikuuaatigut aamma kingusinnerusukkut arfanniartarnermut tunngatillugu ajoquserneqarnikuulluta. Pisimasut tamakku kingumut utertinneqariaannaapput, aarlerinarporlu Nunarput kingumut eqqugaaqqissasoq, taamaammat pingaaruteqarpoq suliap Paul Watsonimut tunngasup Danmarkimit Danmarkimilu suliarineqarnissaa, Naleqqap siulittaasua Pele Broberg Sermitsiamut oqarpoq.
Sermitsiamit Kalaallit Nunaanni Politiit suliaq pillugu oqaaseqartinniaraluarpagut, Politiilli tungaannit Naleqqap nalunaarutaa oqaaseqarfigiumaneqanngilaq.
