Pele: Trump oqallisaasut artornartut pillugit toqqaannartumik oqaaseqartarlunilu iliuuseqartarpoq

Donald Trumpip 2019-imi Kalaallit Nunaat pisiariniarlugu neqeroormat, Naleqqap siulittaasua Pele Broberg politikerinit amerlanernit allaanerulaartumik qisuariarpoq.

Kalaallit Nunaata illersorneqarnissaa aamma nunap pituttorsimanngitsumik isumaqatigiissuteqarfigineqarsinnaanera pillugit USA-mik pimoorussisumik isumaqatiginninniartoqarnissaanik neqeroorut tunngavigalugu Brobergip kissaatigaa.

Taamatullu isumaqarnini Naleqqap siulittaasuata suli aalajangiusimallugu, USA-mi præsidentimut qinersineq pillugu Sermitsiamut oqarpoq.

Pituttorsimanngitsumik isumaqatigiissuteqarnikkut nunami maani Naleraq naleqartitaminik, soorlu akeqanngitsumik peqqinnissaqarnermik, ilinniartitaanermik, aamma Kalaallit Nunaata eqqissinermik illersuineranik allanngortitsinavianngitsoq erseqqissaavoq.

Pele: Trump piviusunngortitsipallassinnaavoq

- USA-p Kalaallit Nunaatalu akornanni assigiinngissuteqaqaaq, minnerunngitsumik nammineq timimut aalajangiisinnaatitaaneq qineqqusaarnermi sammineqarmat. Pituttorsimanngitsumik isumaqatigiissuteqarnikkut nunatsinni pisinnaatitaaffiit tunngaviusut taakkua Naleqqap naleqartikkunnaarnavianngilai, Pele Broberg oqarpoq.

Præsidentinngorniuttut taakkua marluk, Harris Trumpiluunniit, eqqarsaatigalugit Donald Trumpip Kalaallit Nunaata kissaatigisaatut iliuuseqarsinnaalluni præsidentitut takutereeraa naliliivoq, assersuutigalugu suleqatigiinnermik niuernermillu annertusaanissamik Kalaallit Nunaannit kissaatigisaanik pipallatsitsisinnaasoq, kiisalu Kalaallit Nunaata namminiilivinnissaanut iluaqutaasinnaasumik pituttorsimanngitsumik isumaqatigiissuteqarnissaq isumaqatiginninniutigineqarsinnaanerarpaa.

Harris, Kalaallit Nunaata naleqartitaanik naleqartitalik soqutiginartippaa, Kalaallit Nunaat eqqarsaatigalugu misilittagaqanngimmat. Tamatumunnga atatillugu præsident Bidenip nunap inoqqaavinut utoqqatsernera aamma Harrisip naalakkersuisuutitaqalernissaanut iluaqutaassaaq, Naleqqami siulittaasoq naliliivoq.

Harrisip kissaatai Naleqqap naleqartitaanut naapertuunnerupput

Pele Brobergip maluginiarpaa Trump oqaatsinik nalinginnaanngitsunik diplomatiimillu toqqaannartorujussuarmik atuisorujussuusoq, soorlu tamanna Kalaallit Nunaannik pisinissamut neqeroorummini ersersikkaa.

- Oqallisaasut artornartut pillugit toqqaannartumik oqaaseqartarlunilu iliuuseqartarpoq, Pele Broberg oqarpoq.

Taakku tamarmik immikkut iluaqutissartaqarlutillu ajoqutissartaqarsinnaasut erseqqissaavoq:

- Marlunnut aveqqavoq, tassami qinigassanngortittut tamarmik immikkut iluaqutissartaqarlutillu ajoqutissartaqarput. Erseqqippoq Harrisip arnat namminneq timertik pillugu aalajangiisinnaassuseqarnerannik qulakkeerinninnissamik kissaateqarnera Naleqqap pingaartitaanut naapertuunnerusoq. Aammattaaq pituttorsimanngitsumik isumaqatigiissuteqarneq pillugu oqallinneq Trumpip politikkianik akuerinninnermik isumaqanngilaq.

- Trumpip taassumalu atorfilittaasa nalinginnaanngitsumik diplomatiimut periuseqarnermikkut nunarsuarmi tusaamasaanerulersippaatigut, Pele Broberg oqarpoq nangillunilu:

- Paasivarpulli Amerikami atorfillit oqaloqatigisimasavut Danmarki piumanngikkaangat USA-p pituttorsimanngitsumik suleqatigilersinnaanera pillugu eqqarsaat eqqartornerulertaraat.

- Taamaattumik kinaluunniit præsidentinngoraluarpat tamanna pillugu oqallittoqassaaq, Pele Broberg oqarpoq.

USA sunik neqeroorsinnaava?

Qinersinermi kinaluunniit ajugaagaluarpat USA-p Kalaallit Nunaannut neqeroorutigisinnaasaasa misissornissaat iluaqutaangaassasoq taanna isumaqarpoq, taamaalilluni Kalaallit Nunaat Danmarkip neqeroorutigisinnaasaanut sanilliullugu amerlanerusunik periarfissaqalissaaq:

- Namminiilivinnissaq kissaatiginngikkutsigu præsidentimut qinersinissaq eqqarsaatigissallugu pissutissaqanngilaq, taamaassappammi Kalaallit Nunaata nunarsuarmi politikkikkut inissisimaffia Danmarkip iluaqutigiuassavaa.

- Ammaffigigutsigu USA-mik suleqateqarnerup iluaqutissartai ajoqutissartaalu oqimaaqatigiissaarsinnaavavut.

- Qinersinerup kingorna Naleraq oqaasissaqassappat USA-mik toqqaannartumik illersornissamut isumaqatigiissuteqarneq, ullormi Kunngeqarfimmit anisoqarpat atuutilersinnaasumik, isumaqatigiinniuteqarnissaq Naleqqap kissaatigaa. Taamaaliornikkut aatsaat siumut pilersaarusiorluarsinnaavugut.

- Kisiartaallunga Danmarkimut pituttorsimanngitsumik isumaqatigiissuteqarnissaq tapersersornikuuara, partiilli arlaannaalluunniit Danmarkiluunniit soqutiginnissimanngilaq, taava tamatuminnga mattusitinnata periarfissat allat misissortariaqarpavut, Pele Broberg oqarpoq.

Amerikamiut sakkutuuisa Kalaallit Nunaanni amerlinissaat ernumaginngilaa, marloqiusamik atuuffilimmik ingerlanneqassappat - tassa sakkutuunut sakkutuujunngitsunullu atorneqarsinnaappat:

- Amerikamiunik oqaloqateqarnitta Kalaallit Nunaanni sakkutooqarfinnik amerlanerusunik pilersitsinissap akerlerluinnaanik kinguneqarpoq. Kalaallit Nunaanni sakkutooqarfinnik amerlanerusunik pilersitsineq silatusaarnerunngilaq, pisariaqartinneqanngilarmi.

- Atortunilli tamanik neqeroorfigineqarpugut, soorlu umiarsuarnik alapernaarsuutinik, radarinik allanillu, nunamilu maani 500-nit 1000-nut suliffissaqartitsisinnaasunik, Pele Broberg oqarpoq.

Harris Trumpiluunniit præsidentinngussappat Naleqqap politikkia allanngortinneqarsinnaanngitsoq, taanna oqarpoq.

- Politikkikkut pingaarutillit eqqarsaatigalugit isumaqatiginngisavut oqaloqatigisinnaasariaqarpavut. Tamanna tuniniagaanitsinnik isumaqanngilaq, suleqatiginnikkusunnitsinnilli isumaqarpoq, Pele Broberg oqarpoq.