Peqatigiiffik Illorsuarmiut matuvoq: Illorsuit ammaqqinnissaanut sulinerit unipput

Illorsuit qaqqap sisoornerani tassaarsuarmut eqqugaavoq, taamaattoqarnerani nunaqarfimmi innuttaasut nunaqarfimminniit qimagussorneqartariaqalersimapput, nunalu tamakkerlugu siaruaallutik.

Nunaqarfimmiut nunaqarfimminnut uternissartik taamanili sulissutigilerpaat. Dorthe Qvist Jerimiassen 2017-mili nunaqarfimmut uternissartik sorsuutigilerpaa. Maannakkullu pisortatigoortumik nalunaarutigaa, peqatigiiffik matusoq.

- Peqatigiiffiup ingerlannissaa ajornakusoorsimavoq, nunaqqatigiit avissaartuussimagatta. Suleqatigiinniarsimagaluarpugut, kisianni aporfeqartuaannarluta, Dorthe Qvist Jerimiassen Sermitsiamut oqarpoq.

Illorsuit ammaqqinnissaanut assannik sulisoqanngilaq

Dorthe Qvist Jerimiassen siulittaasutut paarlatsissaqarsimanngilaq, taamaattumillu peqatigiiffik Illorsuarmiut matusariaqalerpaa. Peqatigiiffimmi siunertaagaluarpoq nunaqarfiup angerlarfigeqqinnissaa. Peqatigiiffilli maanna matuneqarmat nunaqarfiup ammaqqinnissaanut sulisoqanngilaq.

- Oqarusunngilangga Illorsuit ammaqqinnissaanut sulisoqarunnaartoq, neriuppunga arlaata isumaa allanngussasoq, nunaqarfiullu ammaqqinnissaanut sulisoqaqqilerluni. Nalunngilara suli peqartoq nukissaqartunik. Maannakkorpiaq nunaqarfiup ammaqqinnissaanut sulisoqanngilaq.

Dorthe Qvist Jerimiassen aamma oqaluttuarpoq peqatigiiffiup ingerlanniarnera nukinik misigissutsinillu atuiffiungaatsiarsimasoq, naggataatigut oqimaappallaalerluni. Taamattunik ingerlariaqqittariaqalerami peqatigiiffik iperartariaqalersimavaa. Ilaquttanimi tunulliuttariaqarsimavai peqatigiiffik aallunniarlugu.

- Isumaqanngilaq nunaqarfiup matunera qaangeriga, suli oqimaaqaaq. Kisianni nunaqarfik uterfigeqqissagutsigu aaqqissuuteqqiittariaqassaaq suliffeqarfillu nutarsartariaqassalluni.

- Tusaaneqanngilagut

Karrat kangerluanni 2022-mili alapernaarsuutinik nutaanik peqalerpoq. Illorsuarmiullu isumaqarput nunaqarfimmut uteqqinnissamut ernumanartueruttoq.

Naalakkersuisulli suli ernumapput. Qaqqap sisooqqissinnaanera suli annertoorujussuarmik aarlerinaateqartoq, Naalakkersuisut itigartitsinerminnut tunngavilersuutigaat. Taamaattumik Kalaallit Nunaanni Upalungaarsimanermut ataatsimiititaliap upalungaarsimanikkut naliliivoq, Nuugaatsiaq aamma Illorsuit, kiisalu kangerluup ilaa taakkununnga atasoq suli navianartorsiorfiusutut isigineqartariaqartut. Tamanna malillugu Kalaallit Nunaanni Upalungaarsimanermut ataatsimiititaliaq naliliivoq innuttaasut tunngavissat pigineqartut tunngavigalugit Nuugaatsiamut Illorsuamullu suli utertariaqanngikkaluartut, aammalu navianartorsiorfiusut taakkua qanitaanni angalaartoqartariaq anngikkaluartoq.

Dorthe Qvist Jerimiassen isumaqarpoq oqariartuutitik tusaangeqanngisaannartut, nutaarsiassallu taakkuujuaannartut.

- Tusaaneqanngilagut, nutaarsiassat taakkuujuaannarput. Oqimaappoq, tamaviaarlutami suligaluarpugut, oqarpoq.