AVANNAATA KOMMUNIA AAMMA GIF
Peqqinnerulernissaq peqataanerulernissarlu pillugit suliniut nutaaq
Avannaata Kommunia aamma Grønlands Idrætsforbund suleqatigiipput peqqissuunissamut inuunermillu aalassarinnerusumik periarfissanik pilersitsinissamut.
Kommunalbestyrelsemi ilaasortaq Lene Ravn Davidsen (D) aamma GIF-ip siulittaasua, Claus Nielsen, Avannaata Kommunia aamma Kalaallit Nunaanni Timersoqatigiit Kattuffiat sinnerlugit isumaqatigiissummik atsioqatigiipput.
Assiliisoq: Kalaallit Nunaanni Timersoqatigiit Kattuffiat
Suliniutip
nutaap aallartinneqalersup Avannaata Kommuniani peqqinnarnerusumik
avatangiisigissaartumillu inuuneqalernissaq atugaanerulersissavaa – Avannaata
Kommunea Timersoqatigiit Kattuffiallu suleqatigiilluarnermikkut innuttaasunik
aalatitsinerulernissaq peqatigiiffilerinerlu kajuminnartuunissaa
pitsanngorsaaffiginialerpaat.
Ataatsimoornerup inuunerissaarneq siuarsassavaa
Isumaqatigiissusiortut ilisimatitsissutigaat suliniummi
anguniagaqataaffiginiagaasoq una: Peqataatitsilluartunik ataatsimoorfinnik
pilersitsinissaq inuunerissaarnerulersitsisoqarnissarlu. Pinngortitalllu
peqqinnermut inuunerissaarnermullu pingaaruteqassusia suliniummi aamma
qitiutinneqartussaassaaq.
– Timimik aalatitsinissamut timersornermilu
pitsaanerpaanik toqqissisimanartumillu avatangiiseqartitsilluni
atugassaqartitsinissat pilersitsinissallu matumani pineqarput. Amerlanerit
timersortalernissaat kissaatigaarput tarnikkut timikkullu peqqinnartuummat, Claus
Nielsen, Timersoqatigiit Kattuffianni siulittaasoq taama nassuiaateqarpoq.
Kajumissutsimik suleqataasarneq siuarsarneqassaaq
-Tamatigoortumik peqqinnerulernissaq
eqqumaffigaarput, Timersoqatigiit Kattuffiannik suleqateqarnikkut
kajumissutsimik ikiuuttarnerit atuunnerulersinniarneqarput. Ilisimatusarnikkut
paasinarsereerpoq ataatsimoorfinni peqataasarneq eqqarsartaatsikkut tarnikkullu
peqqinnerulersitsisartoq, taamaattumik siammasissumik inuiaqatigiinni
peqqissuunissap siuarsaaffigineqarnissaa aallunneqarnerulernissaalu
eqqumaffigaarput, Lena Ravn Davidsen (D), Avannaata Kommuniani Inerisaanermut
Ataatsimiitsitaliami siulittaasoq oqarpoq.
Suliniummi iliuuseqarfissat pingasut
pineqassapput:
- Amerlanerit
aalanerulersinneqarnissaat – meeqqat inuusuttullu timersuutinut
peqataanerulersinneqarnissaat.
- Ilaasortat kattuffiat –
ilaasortaqarnerulerlunilu kajumissutsiminnik suliaqartut ingerlatsiinnarsinnaanissaat.
- Suleqatigiinneq nukittooq –
kommunep peqatigiiffiillu akornganni suleqatigiinnerulersitsinissaq.
ISUMAQATIGIISSUTIP PAASISSUTISSARTAI
Piffissaliussaasoq: Suliniut ukiuni sisamani
ingerlanneqartussaavoq
Annertussusaa: Avannaata Kommunia 10.600nik
innuttaassuseqarpoq.
Iliuseqarfissat: ”Atuarfimmi aalanerulernissaq”-miit
kajumissutsiminnik ikiuuttartussanik pissarsinerulernissamut.
Pinngortitaq avatangiisitut atorluarlugu: Nunatta
pinngortitaa immikkuullarilluinnartoq suliniummi qitiutilluinnarneqarpoq.
Anguniagaq: Timersorneq peqatigiinnerlu aqqutigalugit
kommunemi innuttaasut tamarmik peqqinnarnerusumik inuuneqalersinneqarnissaat.
Kommunep
aqutsiviani Timersoqatigiit Kattuffiatalu akornganni suleqatigiinneq
atassuserneqartussaavoq, ingerlatassat tamarmik ineriartortinneqarnissaat,
peqatigiittullu akornganni atuutsilluarneqalernissaat, innuttaasullu
peqataatinneqarluarnissaat qulakkeerniarneqartussaalluni.
– Timersorneq timigissarnerinnaanngilaq.
Ataatsimooqatigiiffiuvoq, pinnguarneruvoq ineriartornerullunilu, kikkunnillu
tamanit peqataaffigiuminartuusussaavoq, Claus Nielsen
atsioqatigiissutaasimasoq nuannersoq pillugu taamak oqarpoq.
-Suleqatigiinnissamut qilanaaqaagut,
Timersoqatigiit Kattuffiatalu misilittagai attaveqaataasalu
iluaqutigilernissaannut qilanaarluta, Lena Ravn Davidsen oqarpoq.
Suliniut
immikkoortunut sisamanut avinneqarsimavoq, tassa pilersaarusiorneraniit
nalilersuiffigineqarnissaanut. Nunatsinnilu innuttaasut timimik atuilluarlutik
peqqinnartumik inuuneqarnissaannik eqqumaffiginnilluni
ingerlanneqartussaalluni.
