Peqqissaasut Kattuffiat nutaamik siulittaasortaartoq

Navarana Helena Johansen Peqqissaasut Kattuffianni (PK) siulittaasutut ilaasortanit amerlanerussuteqartunit qinerneqarpoq.

Sapaatit-akunnerini marlunni qineqqusaartoqarpoq, tassani nuna tamakkerlugu peqqissaasut tarrarsuisartullu Peqqissaanermik Kattuffiup siunissaa unammilligassaalu pillugit oqallillutik. Navarana Helena Johansenillu kattuffik sinnerlugu ukiuni tulliuttuni siuttuunissaa maanna aalajangerneqarpoq.

Peqqissaasut pisinnaatitaaffiinik sukataarutiginnittuunini tusaamaneqaatigaa, Peqqissaasut Kattuffiat tusagassiuutitigut nalunaarumminni allapput.

- Siulersuisut sinnerlugit Navaranap qinerneqarnerani pilluaqqungaarpara. PK-p siunissaa pillugu qanoq takorluugaqarnerata tusarfiginissaa suliassanilu pingaarutilinni suleqatiginissaa qilanaaraarput, siulittaasup tullia Tania Vodstrup oqarpoq.

Siulersuisut qinersinerup eqqissisimasumik ingerlanera aamma qujamasuutigaat, tassanilu Peqqissaasut Kattuffiannut amerlasuut aallussilluarnerat erseqqissoq takuneqarpoq. Siulittaasunngorusullutik qinigassanngortitut pingasut aamma qutsavigaat.

Maniguulluni akisussaaffimmik tigusisoq

Navarana Helen Johansenip ukiuni aggersuni suliassani qilanaarai, aamma siulittaasutut sullissinissaminut piareersimavoq.

- Siuttuuninni peqqissaasutut atukkavut pitsanngorsarnissaannut sapinngisara tamaat iliuuseqassaanga. Suliassavut qilanaaraakka. Siulittaasutut akisussaafferujussuaq maniguulllunga tiguara. Angusaq pitsaanerpaaq anguniarlugu siulersuisut qanimut suleqatigissavakka, Navarana Helena Johansen oqarpoq.

Taanna siulittaasutut qinigaammat Ken Jensenip siulittaasuujunnaarneranik kinguneqarpoq, siulersuisullu taanna ukiuni kingullerni qulingiluani tunniusimalluinnarsimanera sulilluarsimaneralu pillugit qutsavigaat.

- Ken ilaasortatsinnut iliuuseqangaatsiarsimavoq. Pingaarutilinnik angusaqarsimavoq minnerunngitsumillu PK-p unammilligassai isumannaatsumik siulersorsimallugit. Suliamut tunniusimanera sunniuteqarneratigut takuneqarsinnaavoq, tamannalu siunissami sulinitsinni tunngavigissavarput, Tania Vodstrup oqarpoq.

Navarana Helena Johansen ataatsimeersuarnermi novembarip 27-ani pisortatigoortumik siulittaasutut ivertinneqassaaq.