ISUMAQATIGIINNIARNERIT:
Peqqissaasut kattuffiat: Sivisuumik ingerlaneq tatiginninnginnermik toqqissisimannginnermillu pilersitsivoq
Nunatsinni peqqinnissaqarfimmi sulisut sivisuumik nukissaajarnartumillu isumaqatigiinniarnerni utaqqisitaaqqammerput. - Tamanna immini annertuumik pakatsisimanermik tatiginninnginnermillu pilersitsivoq, aamma minnerunngitsumik isumaqatigiinniarnerni angusat apeqqusersorneqalerlutik. Kisianni qularutiginngilara angusagut timitalerneqarpata eqqissiallannermik pilersitsisoqassasoq, nunatsinni peqqinnissaqarfimmi sulisut kattuffiisa siulittaasuat, Ken Jensen oqarpoq.
- Isumaga malillugu naammaginninnginneq aallaaveqarpoq isumaqatigiinniarnerit sivisuallaamik ingerlasimanerannik, tamannalu toqqissisimannginnermik narrujuummernermillu pilersitsisimavoq, tassami isumaqatigiissut nutaanngitsoq tunngavigalugu sulineq ingerlanneqarmat, aammalu aaqqissuussaanermut tatiginninnginneq pilersinneqarsimavoq, tunngaviusumik naatsorsuutigisinnaasussaagaluaratsigu pissutsit ajunngitsut aallaavigalugit sulissalluta, tamannalu uagutsinnut assut ilungersuatitsisimavoq, PK-p aamma PPK-p siulittaasua Ken Jensen oqarpoq.
Assiliisoq: Oscar Scott Carl
Piffissami aggersumi peqqinnissaqarfimmi sulisut kattuffiisa ataatsimoorfiat ulapittussaagunaannaavoq isumaqatigiinniarnerni angusat pillugit ilaasortaminik oqaloqateqarluni, minnerunngitsumik peqqissaasut eqqarsaatigalugit, ilisimaneqalereersutummi peqqissaasut angusat pillugit taasinerminni naligiillutik inissisimasimapput, sulisullu sinnerisa isumaqatigiissut akuersissutigigaat.
Peqqissaasut taasinerminni naligiimmik taasisimanerat Peqqissaasut Kattuffianni ilaasortanit apeqqusernartinneqarsimavoq, ilaatigut taasineq eqqortumik ingerlanneqarsimanersoq, ilaasortammi ilai naapertorlugit "taasinissamut linki" ilaasortat ilaasa tigusimanngimmassuk. Taamatuttaaq apeqqutigineqarsimavoq kattuffiup inatsisilerituua attuumassuteqarpallaarsimannginnersoq naliliinissaminut naligiimmik taasinerup inernera tunngavigalugu qanoq ingerlariaqqittoqassanersoq.
Peqqissaasut allat, tassa aqutsisutut atorfeqartut, naammaginngilaat angusanut, taakku ilaatigut naammaginngilaat ukiumut agguagassarsisinnaalinnginnertik, aqutsisutut suliassat allat akissarsiaqaatiginagu isumagineqartarnerat, minnerunngitsumillu akissarsiat qaffanneqarnissaat aatsaat 2028-mi atuutilissammata, taamanikkussamut aqutsisut arlallit soraarninngoreersimammata.
Ken Jensen: Peqqissaasut narrujuummeqqanerat paasisinnaavarput
Peqqinnissaqarfimmi sulisut ataatsimut isumaqatigiinniartartuisa siulittaasuat aamma Peqqissaasut Kattuffianni siulittaasoq, Ken Jensen, isumaqarpoq narrujuummisimanermik pinngortoqartoq isumaqatigiissut nutaaq sivisuumik utaqqineqartariaqarsimammat, tamannalu aamma aaqqissuussaanermut tatiginninnginnermik pilersitsisimasoq:
- Isumaga malillugu naammaginninnginneq aallaaveqarpoq isumaqatigiinniarnerit sivisuallaamik ingerlasimanerannik, tamannalu toqqissisimannginnermik narrujuummernermillu pilersitsisimavoq, tassami isumaqatigiissut nutaanngitsoq tunngavigalugu sulineq ingerlanneqarmat, aammalu aaqqissuussaanermut tatiginninnginneq pilersinneqarsimavoq, tunngaviusumik naatsorsuutigisinnaasussaagaluaratsigu pissutsit ajunngitsut aallaavigalugit sulissalluta, tamannalu uagutsinnut assut ilungersuatitsisimavoq.
Ken Jensenip oqaatigaa tamanna pissuteqartoq isumaqatigiinniarnerit sivisuallaamik ingerlasimanerannik, tassanilu aamma peqqinnissaqarfimmi sulisut kattuffiisa isumaqatigiinniartitaat utaqqisaqattaarujussuartitaasimammat, illuatungerisallu (Namminersorlutik Oqartussat) ilaatigut isumaqatigiinniarnerit allat ingerlanneqarnissaat naammassisullu naammassineqarnissaat salliuttaqattaarsimammatigit, taakkumi aamma kinguaattoorutaasimammata imaluunniit naammassisimasut naammassineqartariaqarsimallutik.
Sulisitsisup sivisuallaamik ingerlatsinera inuiaqatigiinnut akisoorujussuuvoq
- Uagutsinnit iliuuseqarfigisassagut tamaasa isumagisarpagut. Isumaqatigiinniarnernut piareersimalluta takkuttarpugut, piumasaqaatigut piffissaagallartillugu nassiuttarpagut, 2024 aallartinnerani ingerlariaqqinnissamut isumaqatigiissusiorniarsarivugut, pilertortumik isumaqatigiinniarnerit ingerlaniassammata isumaqarpummi naapertorlugu sivisuallaamik ingerlaneqarsimammat.
- Isumaqarpunga inuiaqatigiinnut suliassaasoq kinguarsagassaasussaanngitsoq, eqqortuusinnaanngilarmi kattuffiit tamarmik sivisuallaamik ingerlasoqarnissaanik misigititaasarnerat. Taamaakkaluartoq isumaqatigiinniarnerit aqqutaanni angusagut ilaasortatsinnut pitsanngorsaasinnaasutut isigigatsigit, taamaattumik sivisuallaamik ingerlaneqaraluartoq utaqqisinnaassuseqartariaqarsimavugut, isumaqarpungalu angusarput tassaasoq oqaluttuarisaanermi angusat pitsaanersaasa tullerigaat.
- Arriitsuinnarmik ingerlasoqarnera pisimanngikkaluarpat sukkasuumillu naammassineqarsimasuuppat april 2024-mi atuutilersimagaluarpat, naammagisimaarinninneq atuussimassagaluarpoq, kisianni piffissap ingerlanerani sivitsoriartorneranilu, toqqissisimannginneq tatiginninnginnerlu annertusiartuinnarsimapput.
Ken Jensen tassunga tunngatillujgu oqarpoq politikerit aalajangiisartullu oqaloqatigineqartariaqartut isumaqatigiinniartarnernut tunngatillugu. Peqqinnissaqarfimmimi sulisut kattuffiisa isumaqatigiinniartitaasa oqarnerat naapertorlugu namminersorlutik oqartussat sivisuallaamik isumaqatigiissusiornerit naammassiniartaraat, tamannalu aamma pissutigalugu inuit, atorfininniarlutik soqutiginnikkaluartut tunuarteqqiinnartartut, tamatumalu kingunerigajukkaa paarlattaasartut akisoorujussuit tikisillugit sulisinneqartarnerat, innuttaasut peqqinnissaqarfimmit sullinneqarnerat qulakeersimajumallugu.
Angusat pitsaasut amerlasuut - kisianni suli sorsuutigisariaqarput
Ken Jensenip upperilluinnarpaa isumaqatigiissut, sivisuumik naammassiniarneqarsimagaluartoq, angusaqarfiulluartoq, peqqinnissaqarfimmilu sulisut iluaqutigilissagaat, tassa isumaqatigiissut atuutilerpat:
- Utoqqalilersunut ullut, sulineq tamarmi soraarnerussutisiaqarnissamut ilanngunneqassaaq, taanna siusinnerusukkut pigineqarsimanngilaq, unnukkut unnuakkullu sulinermi akissarsiat qaffassapput, aammalu piareersimasuutitat ajunngitsorsiaqarnerulissapput, piffissaq tamaat piareersimasuugamik, sineriammi peqqinnissaqarfimmi sulisut immikkut isiginiarneqarsimapput, Nuummut atorfinitsitsinissaq ajornakusoorsimappat, suli sinerissap sinnerani atorfinitsitsinissaq ajornakusoornerujussuusarpoq, peqqissaasut nunap immikkoortuiniinnerminni tapisiaat qaffanneqarnissaat isumaqatigiissutaavoq, tamakkuupput pitsanngoriaaterpassuit ilamerngi Ken Jensenip oqaatigisai.
Taamaakkaluartoq taassuma paasisinnaavaa peqqissaasut aqutsisutut atorfeqartut akuerineqartutut ataqqineqartutullu misigisimanngitsoqartoq. Tassami pisortani allani aqutsisutut atorfeqartunut assingusumik atugassaqartitaanngillat:
- Aallaqqaataaniilli piumasarivarput aqutsisutut isumaqatigiissummik peqalissasoq, aamma namminersorluni oqartussani pisortanut isumaqatigiissut kommuninilu atorfeqartunut assingusumik isumaqatigiissusiornissarput piumasaraarput, taakkunanimi pisortat qaffasinnerusumik akissarsiaqartinneqarmata, aamma pissutissaqanngitsumik soraarsitaagunik akissarsiaqartinneqarnissaannik isumaqatigiissuteqarmata, ilaasortatsinnut tamanna aamma atuutissasoq piumasaraarput. Isumaqaraluarpugullu isumaqatigiissusiorluta, kisianni piffissaq sivisooq qaangiummagt ilisimatinneqarpugut tamanna pisinnaanngikkipput.
Namminersorlutik Oqartussat tungaanniit aqutsisutut isumaqatigiissummik isumaqatigiinniarnerniit tunuartitsinerat isumaqarpoq isumaqatigiissut tamarmi naqqaneeqqittariaqalissasoq, taamaattumik isumaqatigiinniartartut aqutsisut nalinginnaasumik peqqissaasutut assingusumik akissarsiamikkut qaffaavigineqarnissaat siunnerfigissallugu aalajangerpaat, aamma qaangiuttoornermi tapisiaqartinneqarsinnaalernissaat.
Ataatsimut tamaat katikkaanni Peqqissaasut Kattuffianni siulittaasoq aamma peqqinnissaqarfimmi sulisut kattuffiisa isumaqatigiinniartartuisa siulittaasuat Ken Jensen naliliivoq, naak namminersorlutik Oqartussat tungaannit utaqqisitserujussuartarluni isumaqatigiinniarnerup ingerlanneqarnera naammaginngikkaluarlugu, taamaattoq pitsaasunik angusaqartoqartoq.
