Peqquserlunnermut suliaq ataasinngornermi ualikkut suliarineqassaaq
Politikeriusimasumut Lars-Emil Johansenimut atorfilittaasimasumullu Lars Møller-Sørensenimut eqqartuussinissaq pilersaarutit malillugit aallartissinnaasimanngilaq. Nalunaaqutaq ataatsimut aallartinnissaa naatsorsuutigineqarpoq.
Ataasinngornerup ullaava pisoqarfiuvallaanngilaq, Nuummili Eqqartuussiveqarfik Sermersuumut ataasinngornermili ualikkut uteqqissaagut.
Assiliisoq: Morten Okkels
Naalakkersuisut siulittaasorisimasaannut Lars-Emil Johansenimut aamma kommunaldirektøriusimasumut Lars Møller-Sørensenimut peqquserluttuliorsimasutut oqartussaassutsimillu atornerluisimasutut unnerluussut Eqqartuussisoqarfik Sermersuumi ulluni makkunani aalajangiiffigineqassaaq.
Lars Møller-Sørensenip illersuisua timmisartumik kinguaattoornera pissutigalugu ataasinngornermi ullaakkut eqqartuussinissaraluaq kinguartinneqarpoq.
Eqqartuussineq ataasinngornermi ualikkut nalunaaqutaq ataatsimut aallartissasoq paasitinneqarpugut.
Pilersaarutit malillugit eqqartuussineq ataasinngornermiit pingasunngorneq ilanngullugu pissaaq. Ullaakkut kinguaattoornerup kingunerisaanik eqqartuussinissat sivitsorneqassanersut suli ilisimaneqanngilaq.
Sermitsiap ullut eqqartuussiffiusut tamaasa malinnaaffigissavai.
