– Piariilerpugut

Sisimiuni ulluni kingullerni nuialluni sialleqattaarpoq, ataasinngornermilu aamma allaanerunngilaq. Borgmesteri Malik Berthelsen oqalugiaatini suliarileruttoraa Sermitsiamiit allaffianut iserfigaarput.

-Soorunami qilanaarpugut aamma kunngikkut Sisimiuni angallannissaannut takutitassatinnut qilanaaqaagut. Neriuppugut sila ajorpallaassanngitsoq, illarlunilu.

Piareersarnerit kingulliit

Qeqqata Kommuniani borgmesterip allaffianut gangi takivoq, Qeqqatalu Kommuniani ulapaarfiuleruttorpoq. Oqalugiaatip saniatigut aqagu kunngikkut tikeraarnissaanut suli piareersaatissaqarpoq.

-Piareersaatit kingulliit inaarsagassat ulapputigivagut. Aqagu ullueqqasioqatigiinnermi ilasseqatigiinnissamut piareersaatit, ullaaq aamma Taseralik naapeqatigineqarpoq. Pisussat sinneri tamarmik ajunngitsumik ingerlanersut qulakkeerniarlugit ulapputigineqarlutik, Malik Berthelsen Sermitsiamut oqarpoq.

Ataqqinartorsuup Kunngip Frederikip Dronning Maryllu Kalaallit Nunaannut tikeraarnissaat februaarimi Kunngikkormiut nittartagaatigut nalunaarutigineqarpoq, borgmesterilu tamatuma kingorna piareersaatinik ulapputeqalereersimavoq.

-Taamanikkut nalunaarfigineqarattali kunngikkut nunatsinnut angalanissaminnut sisimiut ilanngullugu tikittussaagaat, taamaniminngaanniilli piareersaatit assigiinngitsut aallartippagut.

Borgmesteritut kunngikkormiunik tikeraartoqarnera siulleq

Kingullermik kunngikkormiut tikeraarput 2021-mi, dronningiusimasoq Margrethe II ulluni sisamani tikeraarmat, taamanikkulli dronningi Sisimiunut tikeraanngilaq. 

Malik Berthelsenip, 2017-imiilli Qeqqata Kommuniani borgmesteriusup, siullermeerluni kunngikkormiut Sisimiunut tikilluaqqussavai.

-Piffissaq qanilleriarmat pissangakujulerpunga, tassami ukiuni arfineq marlunni borgmesteriuninni aatsaat kunngikkormiunik tikeraartoqalerpunga borgmesteriullunga. Taamaammat soorunami pissangavunga.

Borgmester Malik Berthelsen kommunalbestyrelsimut ilaasortallu kunngikkormiut Sisimiunut tikittut tikilluaqqussavaat, tikilluaqqusinermilu borgmesteri oqalugiassaaq. 

Tamatuma kingorna arlalinnik sammisassaqartitsisoqassaaq, kulturip illorsuani Taseralimmi nal. 13:20 kommuni qaaqqusisutut peqataaffigineqarluni ilassinninnissaq pissaaq, tassanilu borgmesteri aamma oqalugiassaaq. Malik Berthelsen oqalugiaatit sunik imaqarsinnaanersut aperineqarami ima akivoq.

-Aqagu tusarumaarparsi, illarlunilu.

Kunngikkormiut pilersaarut malillugu juulip aappaani nalunaaqutaq 09.45 Sisimiunut tikipput.