Pigisanik aalaakkaasunik nunaminertanillu atuisinnaatitaanermut maleruagassat nunani allani politikkikkut pisut pissutigalugit sukaterneqarput
Aalaakkaasunik pigisanut nunaminertanillu atuinermut malittarisassat nutaat malillugit inuit ukiuni marlunni Kalaallit Nunaanni najugaqarsimasut akileraartartullu kisimik pisisinnaalerput.
Nunarsuarmi politikkikkut pissutsit Kalaallit Nunaannik soqutiginninnerulersitsipput. Nunanit allanit nunami maani aalaakkaasunik pisinissaq soqutigineqarluarpoq, pigisanik aalaakkaasunik pisinermi malittarisassat sukaterneqarnerat tunngavilersorlugu Hans Peter Poulsen oqarpoq.
Leiff Josefsen
Naalakkersuisut aamma Inatsisartut Aningaasaqarnermut Akileraartarnermullu Ataatsimiititaliaata inuit suliffeqarfiillu arlaasa pigisanik aalaakkaasunik pisisinnaaneri aammalu nunaminertanik atuisinnaaneri pillugit oqaasertaliussaq akuersissutigaat.
Inuit Danmarkimi innuttaassuseqartut, imaluunniit inuit ukiuni kingullerni marlunni Kalaallit Nunaanni aalajangersimasumik najugaqarsimasut innuttaasullu nalunaarsorsimaffianni allatorsimaffianniittut kisimik Kalaallit Nunaanni aalaakkaasunik pigisanik imaluunniit nunaminertamik atuisinnaassasut oqaasertaliussami maleruagassat nutaat pillugit allassimavoq.
Kalaallit Nunaanni aalaakkaasumik pigisanik pisinermut nunaminertanillu atuisinnaatitaanermut malittarisassat sukaterneqarnissaat ilaatigut Donald Trumpip – USA-llu – Kalaallit Nunaata oqartussaaffigilernissaanik mittarfinnillu nutaanik sanaartornissamut soqutiginninnerata kingunerigaa Attaveqaasersuutinut ineqarnermullu naalakkersuisoq Hans Peter Poulsen (S) ilisimatitsivoq:
- Nuummi Ilulissanilu nunani tamalaani mittarfiit ammarneqarneranni nunatta nunanit tamalaanit soqutigineqarnera annertusivoq.
- Nunami pissutsit atuuttut Kalaallit Nunaata soqutiginninneqarnernik eqqumaffigineqarneranillu sakkortusaataaginnarsimapput. Nunanit allanit nunatsinni pigisanik aalaakkaasunik pisinissamut soqutigineqartoq takutinneqartarpoq, Hans Peter Poulsen oqarpoq, nangillunilu:
Inissianik iluanaarniat pinngitsoortinniarneqartut
- Ilaatigut inissianik iluanaarniutissanik pisiortornissaq pinngitsoortinniarlugu inuit suliffeqarfiillu kikkut Kalaallit Nunaanni pigisanik aalaakkaasunik pisisinnaanersut, kiisalu nunaminertanik atuinissamut akuersissutinik pissarsisinnaanersut pillugu maleruagassanik arlalinnik aalajangersaasoqarnissaa Naalakkersuisunit kissaatigineqarpoq.
Kalaallit pigisanik aalaakkaasunik, taakkununngalu pigisat aalaakkaasut najugaqarfittut atorneqartut ilanngullugit, niueruteqarneranni niuerfik aammalu aningaasalersuinermut periarfissat pioreersut, aningaasaqarnerup annertussusaa kiisalu aningaasarsiat qaffasissusaat tunngavigalugit akinik aalajangersaasarneq neqerooruteqartitsisarnerlu annikitsunnguusut Naalakkersuisut taama nassuiaapput:
- Avataaniit pigisanik aalaakkaasunik, nalinginnaasumik Kalaallit Nunaanni aningaasalersuinermi atorneqartartut avaqqullugit pisisoqartalernissaa pigisanik aalaakkaasunik niueruteqarnermi oqimaaqatigiiffiusunik pioreersumik nikisitsinissamut annertuumik ulorianartorsiortitsisussaavoq, aammalu akit aalajangersarneqartarnerinik neqerooruteqartitsisarnermillu, innuttaasut pigisanik aalaakkaasunik pigisaqalernissamut attartornissamullu periarfissaannik ajorseriartitsisumik pilersitsiviusussaalluni, Naalakkersuisoqarfik tusagassiuutinut nalunaarummi allappoq.
Ukiut marluk piumasaqaatigineqarnerat, Aatsitassanut ikummatissanullu inatsit isumassarsiorfigalugu ilusilersorneqarpoq.
Suliffeqarfiit pioreersut eqqugaassanngitsut
Suliffeqarfiit pioreersut malittarisassat nutaat pissutigalugit aalaakkaasunik pigisanik pisinissamut akornuserneqassanngitsut imaluunniit nunaminertamik qinnuteqaataat itigartinneqassanngitsut naalakkersuisoqarfik tusagassiutinut nalunaarummi allappoq.
- Maleruagassat nutaat suliffeqarfinnut maaniittunut akornusiisussaanngillat, tassami siunnersuut taamaallaat oqaasertaliussap akuerineqarnerata kingorna pisinermut sunniuteqartussaammat kiisalu immikkut ittumik akuersissuteqarnissamut periarfissamik imaqarluni, allassimavoq.
Inuit suliffeqarfiilluunniit tunngavissanik naammassinnissimanngitsut tamatuminnga saneqqutsinissamut Naalakkersuisunut qinnuteqarsinnaassapput. Immikkut ittumik akuersissuteqarnissamik qinnuteqaatip Naalakkersuisunit suliarineqarnera, pisinissap Kalaallit Nunaanni najukkamilu pineqartumi akinik aalajangersaanermut neqerooruteqartitsinermullu qanoq sunniuteqarnissaanik tamakkiisumik naliliineq, kiisalu qinnuteqartumut taassumalu pisinermi siunnerfigisai tunngavigalugit pissaaq. Inuit suliffeqarfiilluunniit tunngavissanik naammassinnissimanngitsut tamatuminnga saneqqutsinissamut Naalakkersuisunut qinnuteqarsinnaassapput. Immikkut ittumik akuersissuteqarnissamik qinnuteqaatsip Naalakkersuisunit suliarineqarnera, pisinissap Kalaallit Nunaanni najukkamilu pineqartumi akinik aalajangersaanermut neqerooruteqartitsinermullu qanoq sunniuteqarnissaanik tamakkiisumik naliliineq, kiisalu qinnuteqartumut taassumalu pisinermi siunnerfigisai tunngavigalugit pissaaq.
Maanna nunami politikkikkut pissutsit eqqarsaatigalugit 2025-mut Aningaasanut Inatsimmut oqaasertaliussassatut siunnersuut suliarineqarpoq. Tamatuma kingorna Inatsisartut inatsisissaannut siunnersuut ukioq manna suliassanngorlugu suliarineqassaaq, naalakkersuisoqarfik paasissutissiivoq.
Inatsissatut siunnersuut alla, Amerikamiut Kalaallit Nunaannik soqutiginninneranut atassuteqartoq inatsisissatut siunnersuut, Inatsisartuni marlunngornermi piaartumik suliarineqassaaq.
