Pikialasorsuaq pillugu innersuussutit oqallisigineqaqqilerput
Kalaallit Nunaannit Canadamillu kattuffiit soqutigisaqaqatigiillu Pikialasorsuup ataatsimut qanoq aqunneqarnissaa ulluni tulliuttuni oqaluuserissavaat. Peqataasut ullut marluk ingerlanerini innersuussutinik suliaqassapput.
ICC
PIKIALASORSUAQ
Sumiiffik: Issittoq, Kalaallit Nunaata Canadallu akornanni
Suussuseq: Sikusartoq
Pinngortitap ataqatigiiaarnera: Uumasorpassuit, ilaatigut puisit, arferit issittumilu timmissat, najugaqarfigisaat
Kulturikkut isumaa: Nunap inoqqaavinut oqaluttuarisaanermikkut kulturikkullu immamut attuumassuteqartunut pingaarutilik
- Pinngortitap qanoq innera: Silap pissusiata allanngoriartornera avatangiisinullu tunngasut unammilligassat pissutigalugit piujuartitsilluni aqutsineq pinngortitallu qanoq inneranik illersuineq
Immikkuullarissusaa: Imaani uumasoqarluarnera Issittumilu pinngortitap ataqatigiiaarnerani pisuussuteqarluatoq
Pikialasorsuaq taassumalu pisuussutai Hotel Hans Egedemi septembarip 11-anni 12-iannilu ataatsimiinnermi sammineqaqqilerput.
Tassani Kalaallit Nunaannit Canadamiillu aallartitat Pikialasorsuup aqutseqatigiiffiunissaa aamma taanna pillugu siunnerfinnut nalunaarut oqaluuserissavaat, nunallu taakkua imartaa pillugu qanoq suleqatigiittoqarsinnaanernersoq ataatsimut innersuussusiussallugu.
ICC aamma Qiqiktani Inuit Association (QIA) Pikialasorsuaq pillugu ataatsimeersuartitsissapput, tassanilu sammineqassaaq nunap immikkoortuisa ataatsimut aqunneqarnissaa, ICC tusagassiuutinut nalunaarummi naatsumi allappoq.
Qanoq ililluta ingerlariaqqissaagut
ICC, QIA, Naalakkersuisut avatangiisinut naalakkersuisoqarfiat, Canadamiut aalisarnermut imarsiornermullu naalakkersuisoqarfiat, KNAPK, WWF aamma Kalaallit Nunaat Oceans North kiisalu Pikialasorsuaq pillugu ataatsimiititaliarsuarmi ilaasortaasimasut siunissami immap immikkoortuata, sumiiffinni taakkunani innuttaasunut pingaaruteqarsimasup sulilu pingaaruteqartup, ataatsimut qanoq aqunneqarnissaa oqaloqatigiissutigissavaat.
Inatsisartut ataatsimiititaliaanneersut soqutigisaqaqatigiinniillu allaneeersut ataatsimiinnermi peqataassapput.
- Ataatsimiinnerup siunnertarai
Pikialasorsuaq pillugu Siunnerfinnut Nalunaarut
ingerlateqqinneqarnissaanut eqqartueqatigiinneq, Naalakkersuinikkut
ingerlatsisunut innersuussanik eqqartueqatigiinnissaq kiisalu Inuit
siuttuuffigisaannik Pikialasorsuarmi aqutseqatigiinnissamik
ineriartortitsinissamut eqqartueqatigiinnissaq, ICC allappoq.
Tassani ataatsimiititaliarsuup siuliata innersuussutai taavalu Canadap Kalaallit Nunaatalu suleqatigiinneranni siunnerfiit pillugit nalunaarut sammineqarluassasut allassimavoq.
