Pilersaarummi siunnersuutigineqartunut naapertuuttumik qaleralittassiissutit allanngortinneqassapput

Sinerissap qanittuani qaleralinniarneq ukiuni arlalinni ilisimatuussutsikkut siunnersuutinik qaffasinnerusumik pisassiissutigineqartarsimavoq. Tamanna ilaatigut Pinngortitaleriffimmit, qaleraleqassutsinik malinnaaviginnittartumit, arlaleriarluni mianersoqqussutigineqartarsimavoq.

Qaleralinniarneq pillugu aqutsinermut pilersaarut nutaaq naapertorlugu pisassiissutit piffissap ingerlanerani siunnersuummut naleqqussartinneqassasut pilersaarutip Naalakkersuisunit tusarniaassutigineqaqqammersup takutippaa.

Pilersaarummi siunnersuutigineqarpoq aqutsiveqarfinni pingaarutilinni; Upernavimmi, Uummannami Qeqertarsuullu Tunuani, annertuumik pisassiissutitigut ilisimatuussutsikkullu siunnersuinikkut assigiinngissuteqarfiusuni, pisassiissutit ukiut tamaasa minnerpaamik 5 procentimik nalimmassarniarlugit pisassiissutigineqartussat aalajangersarneqassasut.

Taamaalillutik siunissami pisassiissutit siunnersuinerillu naligiikkiartulissapput. Pisassiissutit ukiumut annerpaamik 10 procentimik allanngortinneqarsinnaapput.

Tamatuma saniatigut aqutsinissamut pilersaarut naapertorlugu qaleralinniarneq pillugu ukiumoortumik nalunaarusiortoqartassaaq, tassanilu ilaatigut aalisarnermit paasissutissat ilanngunneqassapput, ilaatigut agguaqatigiissillugu takissutsip allanngoriartornera aamma atuisut ilisimasaat katersorneqartut ilanngullugit, allassimavoq.

Pisassiissutilli aatsaat 2026-mit naleqqussarneqalissapput, pilersaarummi Aalisarnermut Siunnersuisoqatigiinnit, ilaatigut oqartussanit, aalisarnermit Pinngortitaleriffimmillu sinniisunit ilaasortaqartumit, suliarineqartumi allassimavoq.

Aalisartut 1.510-t eqqorneqarsinnaapput

Qaleralittassat aalisartorpassuarnut attuumassuteqarput. Pilersaarummi allassimavoq 2023-mi sinerissap qanittuani qaleralinniartut 1.510-usut, taamaattumillu aamma qaleraleqassutsip illersorneqarnissaa pingaaruteqartoq, aqutsinissamut pilersaarutip aallarniutaani allassimavoq:

- Aqutsinissamut pilersaarummi uani Kalaallit Nunaanni tamarmi sinerissap qanittuani qalerallit aalajaatsumik, inuiaqatigiit aningaasaqarniarnerat aammalu siunissaq eqqarsaatigalugu uummassusilinnik piujuartitsinissaq tunngavigalugit aalajangersaanissamik siunertaqarpoq, allassimavoq.

Pilersaarummi aalisartut tunisinermi paasissutissanik, angallatip ingerlarnanik nalunaarsuiffiit, pisat pillugit nalunaarutit kiisalu pisat annertussusaat atorlugit ilisimasaat ilanngunneqassapput, aamma illuatungeriit oqaloqatigiinnerat siuarsarneqassaaq:

- Aalisartut, uumassusilerisut, aqutsisut suliffissuillu paaseqatigiinnerat oqaloqatigiittoqarnerulissaaq tassungalu tunngaviusut aqutsinermut pilersaarutip pilersissavai kiisalu oqaloqatigiinnermut aallaavittut atorneqassapput.