Pineqaatisseeriaatsip sakkukissorineqartarnera sakkortunerulernissaanik kissaateqalersitsisartoq
Kalaallit Nunaanni innuttaasut eqqartuussivinni sakkortunerusumik pineqaatissiisoqartaraluartoq tamanna sakkussorisarpaat. Ingammik meeqqanut kannguttaatsuliorsimasunut sakkortunerusumik pineqaatissiisoqartalernissaa kissaatigineqarpoq.
Pinerluttulerinermut inatsit ullutsinnut naleqqussarnissaa innuttaasullu naapertuilluartoqarneranik misiginissaat pingaaruteqartoq, inatsisit atuutsinneqarnerannut naalakkersuisoq Naaja H. Nathanielsen (IA) oqarpoq.
Assi: Inuutissarsiornermut, Nukissiutinut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Innuttaasut aalajangiisinnaasuugunik pinerlunnernut, ingammik nakuusernerit kinguaassiuutitigullu innarliinerit, ullumikkuminngarnit sakkortunerusumik pineqaatissiisoqartalissagaluarpoq.
Innuttaasulli ilimagisaanniit sakkortunerupput. Kalaallit Nunaanni pinerluuteqarsimasunut pineqaatissiinernullu sulianut innuttaasut isumaannik misissuinermit nalunaarusiaq nutaaq saqqummeqqammerpoq, tassanilu eqqartuussutit sakkortussusaat ilimagisamiit annertunerusartut paasinarsivoq.
Kalaallit Nunaanni sumiiffinni assigiinngitsuni innuttaasut toqqakkat ataatsimiisinnerannit, internetikkut apersornerannit internetsilu atorlugu immikkut ilisimasalinnik naapitsinerannit misissuinerup inernera naammassineqarpoq.
Nakuuserneq, pinngitsaaliinerit toqutseriarnerillu pillugit eqqartuussutit piviusut saqqummiunneqarput. Eqqartuussisut qanoq aalajangiisimanersut taakku eqqoriarpaat namminnerlu qanoq pineqaatissiissagaluarnerlutik saqqummiullugu.
“Oqaaseqaateqaqqullugit nalileeqqullugillu toqqarneqartutut ataatsimiitsinneqartarnerannit
aamma internetikkut misissuinermit pingaarnertut takuneqarsinnaalersut tassaapput,
ullumikkumut naleqqiullugu qajassuussinerusumik eqqartuussisoqartarnera innuttaasut
ilimagimmassuk aamma pisuni amerlasuuni eqqartuussutigineqartartunut naleqqiullugu
sakkortunerusumik eqqartuussisoqartoqartariaqartoq isumaqarmata” nalunaarusiami allassimavoq.
Innuttaasut meeqqanik atornerluisimasunut sivisunerusumik pineqaatississoqartarnissaa, ilaatigullu pinerluttulerinermi inatsit tunngavigalugu pineqaatissiissutaasinnaasunit sakkortunerusumik, eqqartuussisoqartarnissaanik isumaqarput nalunaarusiami aamma ersersinneqarpoq.
Danmarkimi sakkortunerusumik pineqaatissiisoqartalernera
Danmarkimi Kalaallit Nunaannilu eqqartuussutit sanilliunneqarneranni Kalaallit Nunaanni amerlanertigut eqqartuussinerit sakkukinnerusartut misissuinermi aamma paasineqarpoq.
Toqutsineq, toqutseriarneq pinngitsaaliinerluunniit Danmarkimi pineqaatissiisarnerup sivisussusaanniit maani sivikinnerusarpoq.
Inatsisilli assigiinngissutaat eqqaamaneqassaaq, Danmarkimimi Kalaallit Nunaannit sukannernerusumik pineqaatissiisoqarsinnaanera periarfissaavoq.
Ikiaroornartumik pinerlunnermut tunngatillugu tamanna allaanerulluinnarpoq, tassami Kalaallit Nunaanni pineqaatissiissutit sakkortunerusarput.
Pinerluttulerinermi inatsit inuit naapertuilluarnermut misigissusaannut naapertuuttariaqarpoq
Misissuineq Naalakkersuisut suliassiissutaat Ilisimatusarfimmi professorip Anette Storgaardip inatsisilerituunngorniallu ukiuni kingullerni marlunni suliaraat.
Kalaallit Nunaanni pinerluttulerinermi suliat pillugit politikkikkut aalajangiinerni taanna tunngavileeqataassaaq.
- Pinerluttulerinermi inatsisip ullutsinnut naleqquttuunissaa aamma innuttaasut naapertuilluartoqarneranik misigisimanissaannut naammassinninnissaa, Naalakkersuisunut pingaaruteqarpoq. Siunissami eqqartuussiveqarfimmik qanoq aaqqissuussinissatsinnut isumaliutiginninnissatsinnut nalunaarusiap inerniliussaasa paasissutissanik tunngavittut atugassatsinnik tunivaatigut, Naaja H.
Nathanielsen (IA) tusagassiuutitigut nalunaarummi oqarpoq.
Pineqaatisseeriaatsip ukiunik qulinik sivisunerpaaffeqarnerata ukiunut 16-inut sivitsorneqarnissaanut siunnersuut Inatsisartut ukiaanerani ataatsimiinneranni oqaluuserineqassaaq.
- Eqqartuussiveqarneq pillugu killiliussat nutarterneqarnissaat siunertaralugu, nalunaarusiap inerniliineri inerniliussaalu oqallisiginiarlugit Inatsisartuni partiit tamaasa qaaqqusimavakka. Partiit isumaat tusaassallugit qilanaaraara, tassami eqqartuussiveqarnerput aamma eqqartuussiveqarnitsinni tunngaviusumik malittarisassat tassaasariaqarput tamatta tapersersugassagut, Naaja Nathanielsen oqarpoq.
