Pineqaatissinneqarsimasunut inissiisarfimmi nakkutilliisut akissarsiaat qaffariarput

Kalaallit Nunaanni pineqaatissinneqarsimasunut inissiisarfimmi nakkutilliisut aningaasarsiaat qaffariassapput.

2020-mi apriilip aallaqqaataanit 2026-mi marsip 31-ata tungaanut qaangiutereersunut atuuttussamik ukiuni arfinilinni atuuttussamik isumaqatigiissuteqartoqarsimasoq, Parnaarussivinni sulisut Kattuffiat tusagassiuutinut nalunaarummi ilisimatitsivoq.

- Aningaasarsiassat ikaarsaarnermilu tapiissutit isumaqatigiissutip nalinginnaasumik nalimmassassavai, taamaalillutik pineqaatissinneqarsimasunut inissiisarfimmi nakkutilliisut tamarmik immikkut 60.000 koruunit angullugit saniatigut aningaasarsissapput, Parnaarussivinni sulisut Kattuffiat allappoq.

- Suliaq sivisuallaarsimavoq

Kalaallit Nunaanni pineqaatissinneqarsimasunut inissiisarfimmi nakkutilliisut siornatigut qallunaanit suleqatiminnit qaammammut 4.500 koruunit missaannik akissarsiakinnerupput, isumaqatigiissullu nutaaq naligiissaarinermut tapiissuteqartarneq pillugu isumaqatigiissummut atuuttumut ilassutitut atuuppoq. Isumaqatigiissut tamanna 2026-mi marsip tungaanut atuuppoq.

Parnaarussivimmi Sulisut Kattuffianni allatsip René Larsenip isumaqatigiissut nuannaarutigaa.

- Suliaq sivisuallaarsimavoq, maannali kiisami isumaqatigiissuteqarnerput naammagisimaarpara, tamannalu Kalaallit Nunaata Danmarkillu akornanni akissarsiat naligiinnerulernerannik kinguneqassaaq, oqarpoq.

Kalaallit Nunaanni akissarsiat pillugit isumaqatigiissut nutaaq pillugu Pinerluuteqarsimasunik Isumaginnittoqarfik kattuffiup isumaqatigiinniarfigerusukkaa, Parnaarussivinni sulisut Kattuffiat ilisimatitsivoq:

- Najukkami isumaqatigiissut nutaaq akissarsianut tapiissutinik nalimmassaaviullunilu isumaqatigiinniutigineqaqqittussaq sivisuumik piumasarinikuuarput, isumaqatigiissutilli inissinnissaa utaqqisimavarput, René Larsen oqarpoq.

Naartunermut erninermullu atatillugu akissarsiaqarluni sulinngiffeqarneq sivitsorneqarpoq

Aamma isumaqatigiissuteqarfigineqarnerata nalaani Kalaallit Nunaanni Danmarkimilu naalagaaffiup atorfilittaasa akissarsiaasa atorfeqarnermilu atugassarisaasa ataavartumik naligiilernissaat aallartinneqassaaq.

Nakkutilliisut 2020-mi apriilip aallaqqaataaniilli pineqaatissinneqarsimasunut inissiisarfimmi nakkutilliisutut sulilersimasut, 2024-mi apriilip aallaqqaataanit 47.600 koruuninik saniatigut akissarsisinneqarnissartik naatsorsuutigisinnaagaat, kattuffik ilisimatitsivoq.

- Piffissami tassanili sulisimaguit, 2026 angugutsigu 59.900 koruuninik saniatigut akissarsisinneqarnissat naatsorsuutigisinnaavat, kattuffik allappoq.

Aammattaaq naartunermut erninermullu atatillugu akissarsiaqarluni sulinngiffeqarneq 2024-mi apriilip aallaqqaataanit sapaatip-akunnerinut 17-inut sivitsorneqassaaq.