Pinngitsaaliisoqarsimaneranut suliami eqqartuussut sakkortusinissaa unnerluussisussaatitaasup kissaatigaa

Politiiusimasup peqatigiiffimmilu suleqataasarsimasup Nunatsinni Eqqartuussisuuneqarfimmi eqqartuunneqarnerata ullup arfinilissaat kingullersaallu ullup pivoq. Taassuma Eqqartuussisoqarfik Sermersuumi marsimi ukiut arfineq-aappaat avillugu pineqaatissinneqarsimasunut inissiisarfimmiittussanngortinneqarnini pineqaatissinneqarnikuunini suliareqqitassanngortinnikuuaa.

Pineqaatissinneqarnera Nunattali Eqqartuussisuuneqarfiani sakkortusineqassasoq unnerluussisussaatitaasup Anne Meulengrachtip naggataarutaasumik oqaaseqarnermini oqaatigaa. Ukiuni arfineq-marlunni pineqaatissinneqarsimasunut inissiisarfimmiittussanngortinneqarnissaa naleqquttoq taanna isumaqarpoq.Angutip eqqartuunneqartup niviarsiaqqanut ukiukitsunut iliuuserisaqattaartagai ajortuusut taanna isumaqarpoq.

Niviarsiaqqat namminneerlutik angummut attaveqartarsimasut suliami ilisimannittut unnerluussaasullu eqqartuussivimmi nassuiaatigaat. Inersimasup meeqqallu akornanni eqqunngitsumik pisoqartillugu inersimasoq akisussaasuusoq unnerluussisussaatitaasoq isumaqarpoq.

Angut politiiummat meeqqallu kannguttaatsuliorfigineqarsimasut pillugit qanoq iliussanerluni pikkorissarnikuummat taassuma nalunngittussaagaa taanna isumaqarpoq. Malittarisassat ilisimasaqarfigilluarlugillu pinerlineqartut qanoq qisuariartarnerat nalunngilaa, taanna tikkuaavoq.

Inatsit nutaaq atorneqartoq

Unnerluutigineqartoq unnerluussutini assiigiinngitsuni pisuusoq Anne Meulengracht tunngavilersuivoq. Pinngitsaaliinermi, kannguttaatsuliornermi niviarsiaqqanullu ilinniartitsinermik sungiusaanermillu atuuffeqartutut inissisimasup naapertuilluanngitsumik iliuuseqarsimaneranik. Aamma pinngitsaaliisimasutut Eqqartuussisoqarfik Sermersuumi pinngitsuutinneqaraluarnera pisuusuutut nalilerneqarnissaa unnerluussisussaatitaasup attappaa. Pinngitsaaliinani arnerisimanngikkaluaruniluunniimmi akuersissuteqaqqaarnissamik inatsit nutaaq malillugu pinngitsaaliinertut isigineqassasoq taassuma tikkuarpaa.

Niviarsiaqqamut allamut pisimasumut tunngatillugu inatsit nutaaq aamma atuuppoq. Inersimasoq 22-leereersimasoq meeqqamik 15-it inorlugit ukiulimmut arnerippat pinngitsaaliinertut isigineqassasoq inatsimmi allannguutaaqqammerpoq. Pisumi illuatungeriit qanoq pisimanerat apeqqutaanani.

Aamma angutip atuuffia eqqarsaatigalugu niviarsiaqqamut allamut 15-ileereersimasumut arnerisimanera inerteqqutaasoq unnerluussisussaatitaasoq isumaqarpoq.

Kiisalu angutip niviarsiaqqap pingajuanut – ataasinngormat pisimasut pillugit oqaluttuartinneqartumut - isumapiloqarluni tatiginnilersitsiniaasimasutut pisuutinneqassasoq unnerluussisussaatitaasoq isumaqarpoq. Isumapiloqarluni tatiginnilersitsiniaasimanermik Kalaallit Nunaanni suliaq siulliuvoq.

Ilisimaneqareersutut pisimasut pillugit assigiinngitsunik isumaqartoqarpoq. Unnerluunneqartumut illersuisoq Finn Meinel sullitani sinnerlugu oqaaseqartussaavoq. Illersuisup oqaaseqaatai malinnaaffigaavut.