Pinngitsaaliisoqarsimaneranut suliami ilisimannittut kingulliit nassuiaatinneqarput
Politiiusimasup niviarsiaqqanut inuusuttunut peqatigiiffilerinermini naapittakkaminut arlaleriarluni pinerlussimaneranut unnerluutigineqartumut eqqartussinermi ilisimannittut kingulliit nassuiaatinneqarput. Unnerluussisup illersuisuillu naggataarutaasumik oqaaseqaataat tallimanngonermi pissapput.
Suliaq Nuummi ingerlavoq. Pisimasulli amerlanersaat illoqarfinni allani pisimapput.
Assi: Morten Okkels
Politiiusimasup niviarsiaqqanut pingasunut 20-riarluni kinguaassiuutitigut kannguttaatsuliorsimasutut unnerluutigineqartumut suliaq Eqqartuussisoqarfik Sermersuumi tallimanngornermi ullaap tungaani nangeqqinneqarpoq. Suliamut atatillugu atermik saqqummiussisoqaqqusaanngilaq.
Angut pinngitsaaliisimasutut ilaatigut unnerluutigineqarpoq, tassani inatsit nutaaq atuutileqqammersoq atorneqarsinnaalluni. Tassa 22-nik ukioqalereersimasoq meeqqamik 15-it inorlugit ukiulimmik atoqateqarsimaguni pinngitsaaliilluni atoqateqarsimasutut pillarneqarsinnaavoq.
Ilisimannittut arlallit suliami inunnik pingaarnernik ilisarisimasallit tallimanngornerup ingerlanerani nassuiaatinneqarput. Ilaat, politiiusimasup illoqarfigisimasaani peqatigiiffimmik meeqqanik inuusuttunillu sammisassaqartitsisumik ingerlatsisuuffigisaanit, internetsikkut videokkut attaveqarlutik.
Niviarsiaqqap nassuiaatinneqartup, pinerluffigineqarsimasup ukioqataa, unnerluutigineqartup kinguaassiuutinut tunngasunik oqaaseqarsimasoq oqaluttuaraa. Taamaaleriarluni niviarsiaraq qanittuararsuanngorlugu tunuanut nikuissimalluni, taanna niviarsiaraq pinngitsaalisimagaa maanna unnerluutigineqarpoq. Ilisimannittorli piffissami sivikitsuinnarmi najuussimavoq.
Isumapiloqarluni tatiginnilersitsiniaaneq atorneqarsinnaasoq
Unnerluutigineqartup niviarsiaqqamut isumapiloqarluni tatiginnialersinniarsimasaa aamma tusarfigaarput. Taanna attorsimanngilaa tatiginnilersinniarsarisimalluguli kingorna kinguaassiutitigut atornerlunnissaa siunertaralugu.
Niviarsiaraq taanna, niviarsiaqqani pingasuni pineqartuni, kisiartaalluni ammasumi nassuiaateqartinneqarpoq. Politiip illoqarfigisaanut tikeraarsimavoq, tassanilu politeeq peqatigiiffimmut atatillugu naapissimallugu. Piffissap ilaani angutip quinassaarsimagaani oqaluttuarpoq. Aamma allaffigisimavaa kiserliukkullugu namminerlu illoqarfigisaminut nooqqullugu kajumissaarlugu.
Angut niviarsiaqqamut attaveqartarnermini politiitut sulinera aamma eqqaaneqarpoq. Tassa politiit tatiginartuummata angutip tatiginissaa ajornannginnerusimasoq niviarsiaraq oqarpoq. Ilisimannittut allat assigalugit taanna illoqarfimminiit internetsi aqqutigalugu videokkut nassuiaatinneqarpoq.
Maanna unnerluutiginnittup illersuisullu naggataarutaasumik oqaaseqartussaapput. Suliaq sapaatip-akunnerata tulliata aallartinnerani naammassineqassasoq naatsorsuutigineqaraluarpoq.
