IA-P NUNA TAMAKKERLUGU ATAATSIMEERSUARNERA 2024
Pipaluk Lynge Aqqaluaq Biilmann Egedemut unammillerpoq
40-nik ukiulik Pipaluk Lynge isumaqarpoq partii Inuit Ataqatigiit aappaluttutut.qorsuttut nukittorsarneqartariaqartoq taamatuttaaq nunat tamalaat akornanni suleqatigiinnermi nukittunerullunili ersarinnerusariaqartoq. - Taakku saniatigut siulittaasorput Múte Bourup Egede 100 procentimik tapersersorpara, aammalu isumaqarpunga suliassaanik politikkikkut siulittaasup tulliatut oqilisaatissallugu nukissaqarluarlunga, Lynge Sermitsiamut oqarpoq.
- Piffissami sivisuumi partiip ilisarnaataanik nukittorsaaniarlunga qanoq iliuuseqarsinnaanera eqqarsaatigisareerlugu, partiimilu ilaasortaqativut arlallit oqaloqatigereerlugit politikkikkut siulittaasup tulliatut sassarnissannik aalajangerpunga, Pipaluk Lynge oqaluttuarpoq.
Assiliisoq: Jensine Berthelsen
Pipaluk Lynge (IA)-mut tunngasut
13. april 1984-imi inunngorpoq marlunnillu qitornaqarpoq.
- Avannaani Ilinniarnertuunngorniarfimmi 2005-imi naammassivoq.
- Kulturimi Inuiaqatigiilerinermilu BA 2011
- Kulturimi Inuiaqatigiilerinermi cand.mag. 2015
- Ilinniarnertuunngorniarfimmi ilinniartitsisoq GUX Nuuk 2015-2016
- Siunnersorti Kommuneqarfik Sermersooq 2016-2018
- Suliniut Plastic Not So Fantastic aallarneeqataaffigaa 2019
- Nordisk Råds Miljøprisimut innersuunneqartoq, Plastic Not So Fantastic 2019
- Meeqqanut Inuusuttunullu tv radio-milu saqqummersitsisoq 2020-2021
Unamminnertoq siulleq nalunaarpoq. Tassaavorlu Inatsisartuni ilaasortaq, Pipaluk Lynge. Taanna partiip politikkikkut siulittaasup tulliatut inissisimalernissamik anguniagaqarpoq, taamaalillunilu politikkikkut siulittaasup tullia maannamut inissisimasoq, Aqqaluaq Biilmann Egede unammillertussanngorlugu, taanna politikkikkut siulittaasup tulliatut qinigassanngorteqqissappat.
- Partiimut unammillernartuuvoq siulittaasoq, politikkikkut siulittaasup tullia aamma aaqqissuussaanikkut siulittaasup tullia tamarmik Naalakkersuisuni issianerat, taakkumi taamatut inissisimanerminni nuna tamakkerlugu sullissinissaminnut pisussaaffeqarput, partiitsinnuinnaanngitsoq. Pisariaqartipparput partiitsinni nammaqatigiinnerup oqimaaqatigiinnerusumik kivinnissaa, pingaartumik partiimi tunuliaquttagut eqqarsaatigalugit, aammali partiitta aappaluttoq-qorsuunera erseqqissassallugu kiisalu nunarsuarmioqatigiinnut samminninnitta nukittorsarneqarnissaa, tamakkununngalu tapertaarusuppunga, Pipaluk Lynge oqarpoq.
Múte Bourup Egede tamakkiisumik tapersersorpaa
Pipaluk Lynge erseqqissaavoq Múte Bourup Egedep partiimi siulittaasutut sassaqqinnerani nammineq tamakkiisumik tapersersuisuulluni:
- Partiitsinni siulittaasorissaarpugut, taassuma partiitsinni naatsorsuutigisagut tamaasa siulittaasutut naammassisinnaalluarpai, uanga ilaasortat amerlasuut assigalugit siulittaasutut ingerlaqqinnissaa kaammattueqataaffigaara. Uangalu kajumissuseqarpunga, piumassuseqarpunga nukissaqarluarlungalu nammaqatigiittumik suliassatsinnik kivitsinissatsinnut akisussaaqataassallunga, taamaalillungalu siulittaasutsinnut akisussaaffinnik pisussaaffinnillu annertuunik nammataqartumut tapertaarusuppunga suliassaanillu oqilisaaqataallunga. Naalakkersuisuni ilaasortaannginnera iluaqutaassaaq, taamaalillunga partiitsinni suliassagut Inatsisartutigullu suliassagut kivitseqataaffigilluarsinnaavakka.
Kisianni politikkikkut siulittaasup tulliatut sassaruit, Naalakkersuisuni ilaasortanngorsinnaanissannut piareersimasussaassaatit, parteersi qinersinermi tulliani kingumut ajugaassappat (kingusinnerpaamik 2025-mi apriilip 6-ani, aaqq.) siulittaasussilu aperissappatit?
- Tamanna piffissami tassani qaqinneqassappat nalilersoqqikkumaarparput, kisianni maannakkut aallaaviga tassaavoq partiitta politikkikkut nukittorsarneqarnissaa ersarissarneqarnissaalu, uangalu amerlasuunik pitsaasunik isumassarsiaqarpunga qanoq ililluta parti nukittunerusumik aappaluttoq-qorsuttut inissinniarlugu sulissutiginninnissatinnut, Pipaluk Lynge akivoq.
Nunarsuarmioqatigiit unammilligaannut samminninnerit
Pipaluk Lynge nunatsinni partiip sulinerani nukittorsaaqataanissami aammalu ersarissaaqataanissami saniatigut pilersaaruteqarpoq Kalaallit Nunaata nunarsuarmioqatigiit akornanni inissisimanerata nukittorsarneqarnissaanut, pingaartumik silap pissusaanut tunngasunik:
- Qinigaaffimmi matumani uranimut apeqqut sammineqarluarpoq. Maanna taanna suliassaq naammassivarput, aamma suna tamarmi uranimut tunngassuteqanngilaq, sulimi suliassarpassuaqarpugut Kalaallit Nunaata nunarsuarmi inissisimaneranut tunngasunik, tassanilu ersarissumik pisariaqarparput partitta aappaluttoq-qorsuttut inissisimanerara ersarissarneqarnissaa partimi politikkikkut ingerlatsinerput tunngavigalugu. Tamanna pingaartumik atuuppoq silap pissusaanut tunngasunik, uumassusilinnut assigiinngisitaarnermut tunngasuni, nunarsuarmi kissakkiartorneranut tunngasumi, nunarsuarmi imissaaleqisoqarneranut tunngasuni, allarpassuarnullu unammilligassanut, tassani suli peqataasariaqarpugut aaqqiissutissanik nassaarniarnissatsinnut, Pipaluk Lynge nassuiaavoq.
Nukissiuutinut minguitsunut ikaarsaarneq
Pipaluk Lynge erseqqissaavoq Kalaallit Nunaanni nukissiuutinut minguitsunut ikaarsaarnermik sulissutiginninneq immini ajunngitsuusoq, taamaattorli nammineq angusat naammagisimaaginnarnissaat naammanngitsoq suliassarpassuaqarmammi:
- Maanna Parisimi isumaqatigiiffimmi ilanngutereernikuuvugut, taannalu isumaqarpoq nunatsinni pisussaaffeqartugut silap kissakkiartorneranut akiuiniarnermi drivhusgassinillu aniatitsinermik annikillisitsiniarnermi peqataalluta, tamannalu pisussaaffiliivoq. Taamaattumik nunatta nunarsuarmioqativut peqatigalugit iliuuserisinnaasaanik isumassarsiaqarlungalu sulissutigisassatsinnik politikkikkut siulittaasup tulliatut sassarninni siunertaqarpunga siuarsaaqataanissannut, Pipaluk Lynge nassuiaavoq nangillunilu:
- Partiinittaaq oqareernittut pisariaqartipparput partiitut aappaluttutut-qorsuttut ersarissaallutalu nukittorsaasariaqarpugut, assersuutigiinnarlugumi nunamo avannarlerni nunarsuarmilumi nunanii tamalaani apartiit appaluttoq-qorsuuneq suunersoq qanorlu isumaqarnersoq ilisimalluarneqarpoq, nunatsinnili oqallisiginerullugulu siunnerfilersornerusariaqartugut isumaqarpunga.
