INATSISISSATUT SIUNNERSUUT
Pisortanut akiitsoqarneq akiorniarlugu iliuuseqarnerusoqalersoq
Pisortanut akiitsut akilersinneqarnissaat pillugit aaqqissuussinermik nutarterinissamik pisariillisaanissamillu Inatsisissatut siunnersuut siunertaqartoq Inatsisartuni ullumi siullermeerneqassaaq.
Pisortanut akiitsut akilersinneqarnissaat pisariillisarneqassaaq, tamanna inatsisissatut siunnersuummi ullumi marlunngornermi Inatsisartuni oqaluuserineqartussami siunniunneqarpoq.
Assiliisoq: Leiff Josefsen
Naalakkersuisut inatsisissatut siunnersuut nutaaq aqqutigalugu pisortanut akiitsut akilersinneqarnissaat pitsanngorsarniarlugulu nukittorsarniaraat, Aningaasaqarnermut Akileraartarnermullu Naalakkersuisup Erik Jensenip ullumi Inatsisartunut siullermeerinnilluni saqqummiussassaani allakkiami allassimavoq.
Inatsisissatut siunnersuummi nutaarpassuarnik suliniutissaqarpoq.
Akiitsut ullumikkut eqqartuussivinni akilersinneqartartut, siunissami akileraartarnermut aqutsisoqarfimmit akilersinneqartassapput.
- Taamatut allannguinermi, aalajangersimasumillu iliuuseqartarnissamut akileraartarnermut ingerlatsivik, pitsaanerusunik kinguneqartussamik sakkussaqalissaaq, siullermeerinninnermi saqqummiussissummi Erik Jensen oqarpoq, nangipporlu:
- Akiliisinnaajunnaartoqarnera akiliisitsiniartarnerup annertusinera siunnersuummi aamma ilanngunneqarpoq, taamaalilluni akileraarutinut akilikkat amerlanerussutaasa saniatigut akilerneqartuni allani ilanngaasoqarsinnaalluni. Tamassumani pisortat eqaannerusumik ingerlatsilersinnaapput, akiitsullu assigiinngitsut iliuuseqarfiginissaanut periarfissinneqarlutik.
Annikitsualuit pillugit killiliineq atuutilissaaq
Aamma pisassat annikitsut annikitsuaqqatut isigineqarsinnaasutut
killigitinneqartut, ukiumoortumik aningaasanit inatsimmit inatsimmut aalajangersimasumut nuunneqassasut siunnersuutigineqarpoq, Naalakkersuisup oqarneratut taamatut "inatsimmi toqqaannartumik inissinnerisigut patajaannerusumik paasiuminarnerusumillu sinaakkuteqarnissaq qulakkeerneqassammat".
Aamma inatsisissatut siunnersuut naapertorlugu allakkat aalajangersimasut atsiorneqartariaqarunnaarsinneqassapput.
- Taamaaliornikkut akileraartarfimmi isumalluutit allanut atorneqarsinnaassapput, aammalu inatsisitigut isumannaatsuuneq ajoqusinngikkaluarlugu innuttaasunut ilitsersuinerunissamik periarfissiissalluni, Erik Jensen ullumi Inatsisartuni oqaluttarfimmit taama oqarumaarpoq.
Inatsimmut siunnersuut pillugu oqaaseqaatit tamarmiusut uani atuarneqarsinnaapput.
