Pisortat ingerlataannik angalatitsiviit meeqqanut akikilliliisarnissaat misissorneqassasoq Naleqqap piumasaraa
Inatsisartuni ilaasortaq, Jens NapãtôK meeqqat 18-inik ukioqalernissami tungaanut pisortat ingerlataannik angalatitsiviit aqqutigalugit angalasussaatillutik meeqqatut akeqalernisssaat, aningaasatigut qanoq naleqassanersoq
Naalakkersuisut misissuinissaannik Inatsisartut aalajangiiffigisassatut siunnersuuteqarpoq.
Leiff Josefsen
Jens NapãtôK meeqqat 12-it sinnerlugit ukioqartut angalasussaatillutik meeqqatut akeqalernissaat kissaatigaa.
Meeraq 12-inik ukioqartoq Qaaanaamiit Nuummut ilaquttani tikeraarniarunigit 25.ooo koruunit tungaanut siumut utimullu akiliissaaq.
Meerarlu 12-inik ukioqarmat angalanermini inersimasumik ingiaqateqartussaassaaq, taamaattumik anaanaasoq ataataasorluunniit angalaqataappat katillugit 50.000 koruunit tungaanut angalaneq akeqassaaq.
- Nunatsinni angalaninarneq akisoorujussuusoq tamaavitta ilisimavarput, Jens NapãtôK siunnersuutini saqqummiullugu aallartikkamiuk Inatsisartuni oqaluttarfimmi taama oqarpoq.
Taanna isumaqarpoq meeqqat 12-it sinnerlugit ukioqartut inersimasutut akiliisinneqartassammata pissusissamisuunngitsoq.
Jens NapãtôK oqaaseqarnermini isiginngitsuusaaginnarsinnaannginnerarpaa nunatsinni isertitakittut inuuniarnermikkullu ilungersortut amerlaqimmata, Air Greenland ukiut tamaasa millioninik taamannanik sinneqartoortuartoq nuannaarutigineqartuartoq, soorlu ukioq kingulleq 83,4 mio. Kr-inik sinneqartoortarmat.
Siunnersuut upernaami oqallisigineqarnissaa kissaatigaa
- Nunatsinni angalaninarneq akisoorujussuusoq tamaavitta ilisimavarput, Jens NapãtôK oqarpoq nangillunilu:
- Air Greenland aammalu Arctic Umiaq Line nunatta tamakkiisumik pigivaat, taamaattumik Naleqqamiit akuerisinnaanngilluinnarparput Naalakkersuisut akinik taamak amiilaarnartigisunik akuersaaginnartut.
Misissuineq meeqqat akikillisaaffigineqartarnerannut malittarisassat allanngortinneqarnissaannut tunngaviliissaaq kingusinnerpaamillu 2025-mi upernaakkut ataatsimiinnissamut piareerneqassalluni.Siunnersuummik tamatuminnga Naleqqap qulakkeerusuppaa meeqqat inuusuttullu 18-it inorlugit ukiullit akikinnerusumik angalasinnaanissaat taamaalillunilu ilaqutariit nunap iluani angalanernut aningaasarpassuarnik akiliuteqartartut aningaasaqarnikkut oqilisaallugit.
Misissuineq AC-fuldmægtigip ukumut akissarsiassaasa affaanik naleqassaaq, tassa 250.000 koruunit
Siunnersuut partiit tamarmik ilalerpaat
Inuit Ataqatigiit, Siumut, Naleraq, Demokraatit aamma Atassut tamarmik isumaqatigiissutigaat, siunnersuutillu piaartumik sukumiisumillu suliarineqarnissaa qulakkeerniarlugu. siunnersuut ataatsimiititaliani suliarineqaqqissasoq innersuussutigaat.
- Siunnersuuteqartoq uuminnga siunnersuuteqarnermigut kissaatigaa aningaasatigut kingunissaasa misissorneqarnissai meeqqanut soraarnernullu akikillisaatit pioreersut siammasinninngortinnissaannut pitsanngorsarnissaannullu.
- Taanna misissuinissaq Demokraatiniit taperserparput, oqareernitsitut kissaatigigatsigu, innuttaasut tamarmik pitsaasumik periarfissinneqassasut angalanissamut misigisaqarnissaminnullu.
Siunnersuutit taakku marluk ataatsimiititaliami attuumassuteqartumi suliarineqarnissaat innersuussutigineqarpoq, Demokraatit oqarput.
