Politiinut eqqartuussiveqarnermullu pitsanngorsaanerit nuannaarutigineqartut
Kalaallit Nunaanni politiinut eqqartuussiveqarnermullu aningaasaliisoqarneranit siunissamut piarfissanik nutaanik pilersinneqarnerat politikerit, oqartussat politiillu kattuffiata nuannaarutigaat.
Aningaasaliinermut tunngasut inatsisinik atortitsinermut ministerip Peter Hummelgaardip naalakkersuisullu Naaja H. Nathanielsenip saqqummiuppaat.
Assi: Christian Klindt Sølbeck/Ritzau Scanpix
Danmarkimi inatsisinik atuutsitsinermut ministerip Peter Hummelgaardip (S) aamma inatsisit atuutsinneqarnerannut naalakkersuisup Naaja H. Nathanielsenip (IA) Kalaallit Nunaanni inatsisinik atuutsitsinermut suliassaqarfimmi suliniutit arlallit ataasinngormat saqqummiuppaat. Piffissami 2026-2030 850 millionit koruuninik aningaasaliisoqarpoq.
Aningaasat taakku eqqartuussiveqarnikkut pitsanngorsaanernut atorneqarsinnaapput, soorlu Kalaallit Nunaanni Savalimmiunilu eqqartuussivinni qarasaasiatigut atortorissaarutit pitsaanerulersillugit:
– Innuttaasut, suliffeqarfiit kattuffiillu pisariinnerisumik sullinneqarsinnaalerlutillu imminnut kiffartuussinnaanngorsinnaapput. Eqqartuussisoqarfinnilu digitaliusumik sulisoqarsinnaanngorluni, Danmarkimi Eqqartuussioqarnermut aqutsisoqarfimmi pisortaq Kristian Hertz oqarpoq.
Nutaarsiassaq alla tassaavoq Datatilsynip Kalaallit Nunaanni ukiumut suliffiit pingasut amerlassusissaannik sulisoqarsinnaalernera.
– Kalaallit Nunaanni allaffimmik ammaaneq Datatilsynimut alloriarneruvoq pingaarutilik. Nalunngilarput Kalaallit Nunaanni paasissutissanik illersuiniaqatigiiffiup malittarisassai pillugit siunnersuinissamik pisariaqartitsisoqartorujuusoq, taamaattumik Kalaallit Nunaanni aamma allaffimmik ammaasinnaalernerput nuannaarutigaarput, pisortaq Cristina Angela Gulisano oqarpoq.
Peqatigiiffiup siuariarneq nuannaarutigaa
Politiit kattuffiata aamma politiit eqqartuussisullu pitsanngorsaavigineqarnerat nuannaarutigaa. Kalaallit Nunaanni Politiit peqatigiiffianni siulittaasoq oqarpoq.
– Kalaallit Nunaanni Politiit politiinik amerlanerusunik pisariaqartitsimmata siuariartornerup malugilernissaa qilanaaraarput. Aamma Nuummi politeeqarfimmik nutaamik angisuumik aningaasaliisoqarnissaa naammagisimaarpara. Maannami sumiiffinni assigiinngitsuni sisamani agguataaqqammata, tamannalu attatiinnarneqarsinnaanani. Neriuppunga tamanna Kalaallit Nunaanni politiinik atorfinitsitsinermut atorfimmiiginnartitsinermullu iluaqutaassasoq, Bjørn Bjerregaard oqarpoq.
Folketingimut ilaasortap Aaja Chemnitzip (IA) Christiansborgimi suliniuteqarnini arlalitsigut angusaqarfiginera nuannaarutigaa:
– Qanigisariinni nakuusertoqartarnerata, meeqqanillu kinguaassiuutitigut atornerluisoqartarnera akiorniarlugu suliniutinik nutaanik aallartitsoqarnissaa pingaaruteqarpoq. Eqqugaasut pitsaanerusumik illersorneqarliutillu pinerluttoqaqqittarnissaa pinaveersaartinneqassammat, Aaja Chemnitz Facebookimi quppernermini allappoq.
