Politiit qullersaat isumannaallisaaneq dronillu pillugit ataatsimiittut

Københavnip mittarfiani droneqareernerata kingorna naalagaaffiup politiivini pisortap nunami politeeqarfinni pisortat tamaasa sisamanngornermi ataatsimeeqatigissavai.

Isumannaallisaanermi pissutsit ulorianartorsiortitsinerillu akiornissaannut periarfissat oqaluuserineqassapput. TV 2 pingasunngornermi taama allappoq.

Dronit atorunnaarsinneqarsimannginnerat arlalinnit isornartorsiorneqarpoq, tamannali „pissutsinik pisariillisaanerusimasoq“ politiit pisortaat Thorkild Fogde oqarpoq.

Dronit teknologiit assigiinngitsut atorlugit sananeqartarmata, Fogde naapertorlugu ajornaatsuunik aaqqiissutissaqanngilaq.

- Taamaakkaluartoq pinerlunnermut tunngasut ineriartorpallaarpata politiit aamma ineriartortariaqartut soorunami oqaatigissavara, Thorkild Fogde TV 2-mut oqarpoq.

Assersuutigalugu Jacob Kaarsbop, Illersornissamut tunngasunik Paasiniaavimmi pisortaasimasup, dronit immap nalaaniitillugit aallaaneqarsimannginnerat paasiuminaatsippaa.

- Tamanna tupigusuutiginerpaavara, Jacob Kaarsbo Ekstra Bladetimut oqarpoq.

Dronit silaannarmi takuneqarsinnaammata Københavnip mittarfia ataasinngornermi unnukkut nalunaaquttap-akunnerini sisamani matoqqavoq.

Københavnimi politiit pisortaata Anne Tønnesip saassussineq „droni-mik saassussinertut“ taavaa, ministeriunerullu „qallunaat attaveqaasersuutaannut pingaarutilinnut saassussinerni maannamut ajornerpaartaasoq“ oqaatigaa.

Kina aallartitsisimanersoq ilisimaneqanngilaq. Københavnimili politiit sumiiffimmi umiarsuarnik angallanneq pillugu paasissutissanik katersuillutik pingasunngornermi ualikkut tusagassiutitigut nalunaarummi paasissutissiipput.

Rusland pisuunnginnerarpoq.

Umiarsuarnik Ruslandimut attuumassuteqartunik droninik aallartitsisimasutut pasillerneqartartunik piffissami kingullermi nalunaaruteqartoqartarsimavoq.

Umiarsuaq assartuut tigusarineqartoq tyskit tusagassiuutaat septembarip aallartinnerani nalunaarput. Umiarsuaq Kielip sulluani kisaqqatillugu alapernaarsuiartortitsilluni dronimik aallartitsisoqarsimasoq pasitsaanneqarpoq.

/ritzau/