KL

DK

Politiit ukiortaami ulapputtut

Politiit unnuaq ullaarlu angerlarsimaffinni eqqissiviilliortunut arlalinnut ornigupput.

Grønlands Politi
Thomas Munk Veirum
Tusagassiortoq
Saqqummersinneqarpoq

Ukiortaap unnuaa Kalaallit Nunaanni Politiinut sinerissami Nuummilu ulapaarfiuvoq.

Politiit imigassaq pissutigalugu pisunut arlalinnut ornittut, soorlu angerlarsimaffimmi eqqissiviilliornerit imigassartorsimasunillu biilertoqarneranut, pigaartut pisortaat Aputsiaq Hansen oqarpoq.

Unnuami pisimasut pigaartut pisortaata ima oqaluttuarai:

  • 22 Imigassartortoqarneranit angerlarsimaffimmi eqqissiviilliornerit.
  • 15 Angerlarsimaffimmi eqqissiviilliornerit meerartallit.
  • 16 Inuit kissaatiginngisat eqqissiviilliortitsisut.
  • 5 Aalakoorpallaartut imminnut isumagisinnaanngitsut.
  • 8 Aqqusinermi eqqissiviilliornerit.

Ikuallattoqartillugu kalerrisaarut aallartinneqartoq imigassartorsimasullu pingasut biilertut unitsinneqartut

Politiit ikuallattoqartillugu kalerrisaarummut marloriarlutik ornigussimasut pigaartut pisortaata aamma oqaatigaa.

Paamiuni nal. 01.05 ikuallattoqarneranik kalerrisaarut aallartippoq, ikuallattoqanngilarli. Inuup kalerrisaarut aallarteriarlugut sumiiffimmiit qimaasimavoq.

Nuummi kinguninngua nalunaaqutaq 01.37 ikuallattoqarneranik kalerrisaarut aamma aallartippoq, tassani Blok 12-imi containeri eqqaavik ikuallappoq.

Qummoroortartut eqqaavimmut iginneqarsimasoq ikuallalersimavoq. Qatserisartut ornigutipallapput ikuallattorlu qamillugu Aputsiaq Hansen oqarpoq.

Nuummi unnuap ingerlanerani imigassartorsimallutik biilertut pingasut unitsinneqarput. Tamarmik tigusarineqarput aaversikkiartorlutillu napparsimmavimmukaanneqarlutik. Kingorna iperagaapput.

Qamuteralannik ajutoortoqartoq

Nuup eqqaani marlunngornermi ualikkut qamuteralannik ajutoortoqarpoq. Kalaallit Nunaanni Politiit Qamutit SAR Group-ip allaaserisaa siammarterpaat, tassani allassimavoq inuk ajoqusersimasoq orninneqarsimasoq sumiiffimmilu nipaallisaatinik sakkortuunik tunineqarsimalluni.

Kingorna Nuummukaanneqarpoq, tassanilu ambulancit assartuussineq nangippaat. Annaassiniartartut Qamutit oqartussaasut sukkasuumik pitsaasumillu tapersersinnaagamikkit nuannaarutigaat, Qamutinut SAR Group pisoq pillugu allappoq.

Taakku ajoqusersimasoq qamuteralannik ajutoortoq politiinut nalunaarutigigaat Aputsiaq Hansen paasissutissiivoq.

samfund spirituskørsel grønlands politi brandalarmer aputsiaq hansen alkoholrelaterede hændelser inuiaqatigiit

ATORFIIT Se alle jobs

Powered by Labrador CMS