Politikeri DF-meersoq: Kalaallit Kinamik pilerigeqqusaarnerat kamassaarneruvoq

Marlunngornermi Folketingimi oqallinnermi Dansk Folkepartiimeersup Alex Ahrendtsenip nunarsuarmi pissutsit maannakkutut itsillugit Kinap Kalaallit Nunaannut aggersarnissaa mianersoqqussutigaa. Kalaallit Nunaannut aningaasaliinerni Naalakkersuisut misissueriaatsimik suliaqarnerat, Aaja Chemnitzip (IA) erseqqissaatigaa.

Folketingimut ilaasortaq Aaja Chemnitz (IA) kalaallit Kinamik suleqateqarnerisa annertusarsinnaanerat pillugu Alex Arendtsenimik DF-meersumik oqalliseqateqarpoq.

Arkivfoto: Trine Juncher Jørgensen

Thomas Munk Veirum Thomas Munk Veirum Tusagassiortoq

Saqqummersinneqarpoq 4. Juuni 2025 - 10:23

Naalagaaffeqatigiinnerup marlunngormat Folketingimi oqaluuserineqarnerani, Alex Ahrendtsenip Dansk Folkepartiimeersup nunarsuarmi pissutsit maannakkutut itsillugit Kalaallit Nunaata Kinamik suleqateqarnerminik annertusaannginnissaanik oqariartuuteqarpoq.

Politikerip taamaaliorneq maanna USA-p præsidentiata Kalaallit Nunaannik tigusinissamik nakkutiginnilernissamillu erseqqissumik oqariartornerata nalaani, Kalaallit Nunaannut Kunngeqarfimmullu navianartutut taavaa:

- Maanna nunarsuarmi politikikkut ajornakusoortumik inissisimanermi kalaallit politikeriisa Kinamik suleqateqarnissaq ammaappaat. Tamanna puffassaarinerujussuusoq isumaqarpunga, taamaaliornerlu paasisinnaanngilara.

Ussassaarut

- Kina pissaanilissuuvoq sukannersumik ingerlatsisoq, Issittumullu appakkaanniarsarisoq. Kalaallit Nunaannut sanilliukkaanni nunarujussuuvoq, tamannalu akuersaarnartuunngilluinnarpoq. NATO-p Kunngeqarfiullu isumannaatsuuneranik navialisitsivoq, Ahrendtsen oqalugiarnermini oqarpoq.

- Mianersoqqusineq

Tusagassiorfiit arlallit, tassani DR ilanngullugu, aatsitassanut inuussutissarsiornermullu naalakkersuisup Naaja Nathanielsenip (IA) nunanullu allanut tunngasunut naalakkersuisup Vivian Motzfeldtip (S), sapaatip akunnerani kingullermi Kalaallit Nunaata aatsitassarsiornermut aningaasaliinerni assersuutigalugu Kinamik suleqateqarnerusinnaanermik ersersitsisunik oqaaseqarnerisa kingorna pivoq.

Oqaatigisat marlunngornermi Alex Ahrendtsenip sakkortuumik appisaluuppai.

- Kamassaariutigaluni Kinamik pilerigeqqusaartoqarsinnaanngilaq. Aaqqiissutaanngilaq, pissutsinik ajornerulersitsisuuvoq, ilaatigut oqarpoq.

Kalaallit Folketingimi ilaasortaatitaata Aaja Chemnitzip (IA) Naalakkersuisut aningaasaliiniartunik misissueriaatsimik suliaqarnerat pitsaasutut isigaa, taamaaliornermi aningaasaliinerit qanoq ittut nunatsinnut takkunnerat, kiisalu soqutigisat suut ingiaqataanerat misissorneqartassasoq, tassunga tunngatillugu oqaatigaa.

- Afrikami tamatumunnga pitsaanngitsunik assersuutissarpassuaqarmat, Aaja Chemnitz marlunngornermi oqallittoqarnerani oqarpoq.

Sermitsiap Naaja H. Nathanielsen oqaaseqaataanik isorinninneq pillugu apersorpaa, apersuinerlu taanna sapaatip akunnerani uani kingusinnerusukkut saqqummiunneqassaaq.