Politikerit meeqqat atugarliortut puiorpaat

Aatsitassarsiorneq, mittarfiit, aalisarneq inuussutissarsiornermillu ineriartortitsineq politikerinit pingaarnerutinneqarput naak inuttut atukkatigut ajornartorsiortut Kalaallit Nunaanni unammilligassat annersaannut ilaasut.

Kalaallit meerartaasa tallimararterutaat kinguaassiuutitigut atornerlunneqarnikuupput, pingajorarterutaallu angerlarsimaffimminni sumiginnagaallutik imigassamik atornerluisut akornanniillutik. Nunarsuarmi imminut toquttartut amerlanerpaaffiisa ilagaatigut. Sulisitsisut sulisunik amigaateqarput, tamatumali saniatigut inuusuttut 30-t inorlugit ukiullit tallimararterutaasa missaat suliffeqanngillat ilinniagaqarnatillu. Tamatumunnga ilaatigut pissutaavoq meeqqat atuarfianni meeqqat amerlasuut uniinnartarmata.

Taamaattoqaraluartoq isumaginninnermut politikki politikkikkut oqallinnermi sammineqanngingajappoq. Naalakkersuisut ukiumi Inatsisartuni 2023/2024-mi angusaat pillugit nalunaarusiami, siulittaasup Mute B. Egedep (IA) qanittukkut saqqummiussaani, akileraartarnermut akitsuutinullu, peqqinnissamut ineqarnermullu tunngasuni isumaqatigiissutit pingasut annertuut isumaqatigiissutaanerat erseqqissarneqarput.

Meeqqat isumaginninnermilu suliniutit annikitsuinnarmik eqqaaneqarput. ”Meeqqat inuusuttullu siunissaraagut. Pitsaasumik tunngavissaqartariaqarput. Naalakkersuisut meeqqanut pisariaqartitsisunut tapersersuinissamut periarfissat nukittorsarsimavaat, ullukkullu paaqqinnittarfinni perorsaanikkut ineriartornissamut periarfissanik pilersitsisimallutik. Imminut toquttarnerup pinaveersaartinnissaanut periusissiorpugut, meeqqat, inuusuttut inersimasullu tamarmik eqqortumik ikiorneqarnissaannik qulakkeerinninniarluta,” Mute B. Egede angusat pillugit allakkiami allappoq.

Saqqummiineq eqqoqqinnaangajallugu inuit innarluutillit illersuisuata Anja Hynne Nielsenip Avannaata Kommuniani meeqqanut inersimasunullu innarluutilinnut atugassarititat “ernumanartorujussuusut” aamma “innuttaasut 25-t pisariaqartitaminnik pisinnaatitaaffimminnillu inatsit inuit innarluutillit pillugit isumaqatigiissutip malillugit ikiorneqarneq ajortut” nalunaarusiaq tamanut saqqummiuppaa.

Avannaata Kommuniani pisimasoq kisimiinngilaq, kommunimmi isumaginninnermut inatsisinik malinninnissaq nalinginnaasumik ajornakusoortittarpaat. Aammattaaq isumaginninnermi siunnersortit isumaqatigiissutaat maannakkut akerleriissutaalersimavoq, tamatumalu kingunerisaanik meeqqat atugarliortut ikiorserneqarnissaannut tunngatillugu nalorninartorsiortoqarpoq – nalinginnaasumik ammasarfinni taamaallaat ikiorserneqarsinnaanersut imaluunniit isumaginninnermi allaffiit ammarnissaat utaqqisariaqassaneraat.

Sumiginnaaneq annertooq — aaqqissuusseqqinnissaq pisariaqartinneqartoq

Kommunini tamani sumiginnaarujussuartoqarneranik assersuutissarpassuaqarpoq, isumaginninnermilu malunnaateqarluartumik pitsanngorsaanissaq isumaginninnermut politikkimik ilungersortumik iliuuseqarfigineqartariaqarpoq. Lektor, ph.d. Steven Arnfjord, Ilisimatusarfimmi Issittumi atugarissaarnermut centerimi pisortaq, oqarpoq.

- Politikerit atugarissaarnermik aaqqissuussineq pitsaasoq atuarfeqarfinnik pitsaasunik, peqqinnissaqarfimmik pitsaasumik, utoqqarnut isumaginninnermik il.il. qulakkeertariaqarpaat. Politikkikkut annertuumik iliuuseqarnissaq pisariaqarpoq, isumalluutinik atuinerup allanngortiterneqarneranik, atugarissaarnermut akileraartarnermullu politikki apeqquserneqartariaqarluni, tikkuaavoq.

- Isumaginninnikkut politikki suliniutillu naleqqussarneqartuartariaqarput, taamaanngippat unittoortarput. Isumaginninnikkut politikki ingerlaannaq iluatsissinnaanngilaq, politikerilli iluatsitsipallannissartik qinigaaqqinnissartillu eqqarsaatigineruaat. Pisariaqartinneqartut tassaapput aaqqissuusseqqinnerit siunissaq ungasinnerusoq eqqarsaatigalugu sunniuteqarsinnaasut, taamaalilluni meerarpassuit pilluartut pilersinneqarsinnaallutik. Politikerilli meeqqat atugarliortut piitsuullutik inuusut, inunnut attaveqarpiaratik inunnullu tunngasunik sammisaqarnissaminnut peqataanissartik ajornakusoortitsisut puiortarpaat. Meeraanermi piitsuuneq inersimasutut piitsuunermik kinguneqarajuppoq, Steven Arnfjord erseqqissaavoq.

Isumaginninnermut inatsit "pisoqalisimasutut pillaatitut“ taavaa, akerlianilli inatsimmik meeqqat inersimasullu inuiaqatigiinni nutaaliaasuni atugarliortuni ikiortariaqartunullu pisariaqartitsisoqartoq tikkuarlugu.

- Kalaallit Nunaanni inuiaqatigiit ukiorpassuarni namminersortunngorsarneqarsimapput, tamatumalu pisortat atugarissaarnermik aaqqissuussaanerat sanngiillisippaa. Anaananngortussat ernisussiortumut namminersortumukarsinnaapput, angajoqqaat aningaasaateqarluartut meeqqatik namminersortumi atuarfimmi atuarlertissinnaavaat, immaqalu qanittukkut nakorsaqalissalluta namminersortunik.

- Inuiaqatigiit ataqatigiinnerannut ajornakusuulersitsivoq, akileraartarnermut politikki inuiaqatigiinnilu atugarissaarnermut aningaasaliissutinut apeqqusiinermik kinguneqarpoq – taamatullu kalaallit ataatsimoorlutik inooriaasaannut akornusiillutik. Isumaginninnikkut politikki suliniuteqarluartoq nuna tamakkerlugu najukkamilu ataatsimoornermik anersaaqarnerulersitsisinnaavoq, Steven Anfjord oqarpoq.

Aningaasat nanineqarsinnaapput

Politikerit isumaginninnermut politikkimut akuliunnaveersaaraangata, tamanna siunissaq ungasinnerusoq eqqarsaatigalugu qanoq kinguneqarluarsinnaaneranik takujuminaatsitsinerannik pissuteqarsinnaavoq.

- Soorunami aamma inuit isumaat pissutaasinnaavoq, immaqa inuit ilaat isumaqarput akileraarutit amerlanerusut atugarissaarnermut atorneqassanngitsut.

Politikerilli atugarissaarnermut aningaasat naammannginnerarlugit tunngavilersuissappata tamanna ilumuunngitsoq Steven Arnfjord isumaqarpoq.

- Aningaasat naammapput; pingaarnersiuineq apeqqutaavoq, naqissusiivoq.

- Assersuutigalugu mittarfiit nutaat milliardilikkaanik akeqarput, tamannalu aningaasanik nassaarfiusinnaasut ilaannaraat.