Politikerit sunniuteqanngitsut

Nunaqarfinni aqutsisut politikkikkut sunniuteqarsinnaanerat imak annikitsigaaq nunaqarfiit ineriartortinneqarnerannut tunngatillugu taakku isumaat kissaataallu amerlasuutigut tusarniarneqassanatilluunniit.

Taamaattumik nunaqarfinni aqutsisut politikeritut appasinnerusut soqutaarpianngitsutullu isigineqartartut, Kalaallit Nunaani Nunaqarfiit Peqatigiiffianni, KANUNUPE-mi siulittaasup tullia aamma Attumi Iginniarfimmilu nunaqarfimmi aqutsisuni siulittaasoq Per Ole Frederiksen, Siumut, kiisalu ukiorpassuarni nunaqarfimmi aqutsisuni ilaasortaasimasoq, maannakkullu Avannaata Kommuniani kommunalbestyrelsimut ilaasortaq Timotheus Petersen, Siumut, oqarput.

Tamannalu tamat oqartussaaqataanerannik innarliinerummat allanguisoqarnissaa siunertaralugu qinigaaffimmi tulliuttumi suliniutit nutaat aallartinneqartariaqartut, taakku isumaqarput.

Ilagiit sinniisaannut assigusoq

Kommunit kattussuutsinneqarnerannut atatillugu nunaqarfimmi aqutsisut akisussaaffimmik anginerusumik tigusinissaat siunertarineqaraluartoq, taamaattoq kommunalbestyrelsit piginnaatitsissutaasa saniatigut nunaqarfimmi aqutsisut namminneerlutik sulianik suli aallartitsisinnaanngiillat, nunaqarfimmilu politikerit isumaat pingaaruteqanngitsutut amerlasuutigut isigineqartartoq, Per Ole Frederiksen oqarpoq.

- Nunaqarfimmi aqutsisut kommunimi atorfilinniit allaat oqartussaaffikinnerupput, taakkumi aaliangeriingaat atorfilinnit allanngortinneqarsimasut takusareerparput, tamannalu pissusissamisoorsorinngilarput.

- Nunaqarfimmi aqutsisut politikkikkut qinigaapput, nunaqarfiillu ineriartortinneqarnerannut oqartussaaffimmik akuutinneqarnissamillu tunineqarnikuullutik.

- Taamaakkaluartoq sunniuteqarsinnaanerput imak annikitsigilernikuuvoq allaat ilagiit sinniisaani sulinertut nallersuunneqarsinnaalluni, nunaqarfimmilu aqutsisut aningaasanik ikittuinnarnik nammineq aqutassatsinnik tunineqartarnerat taamaallaat assigiinngissutaavoq, taanna oqarpoq.

Akuutitsineq suleqatigiinnerlu

Ajornartorsiut pineqartoq nuna tamakkerlugu atuuttoq, Per Ole Frederiksen oqarpoq.

- Taamaattumik Nunamut Namminermut Naalakkersuisup Jess Svanep, Siumut, kommunit aaqqissuussaanerat pillugu nalilersoqartariaqarneranik oqariartuutaa isumaqatigaarput, neriuppugullu tassuunakkut nunaqarfimmi aqutsisut atugaasa pitsaanerulernissaat ilanngullugu aqqutissiuunneqarumaarumaartoq, taanna oqarpoq.

Kunngi Frederik nulialu Dronning Mary julimi Attumut tikeraartussanngormata pilersaarusiornermut atatillugu nunaqarfimmi aqutsisut annertuumik akuutinneqarput, Kommune Qeqertalimmilu suliassaqarfiit assigiinngitsut suleqatigilluarnerisut suliaq pitsaasumik naammassineqarpoq, periuserlu taanna siunissami atorneqarnerusariaqartoq, Per Ole Frederiksen isumaqarpoq.

Ilisimasaqarluartut

Nunaqarfinni aqutsisut nunaqarfinni pissutsit ilisimalluaramikkit nunaqarfiit ineriartortinneqarnerannut pingaarutilerujussuusut, taamaakkaluartorli taakku sulinerat ukiorpassuarni suusupagineqartarsimasoq sulilu maannakkut taamaattoq, allannguisoqarnissaalu piffissanngortoq, 1993-imiilli ataannartumik 2021 tikillugu nunaqarfimmi aqutsisunut ilaasortaasarsimasoq, Timotheus Petersen Kullorsuarminngaanneersoq oqarpoq.

- Nunaqarfimmi aqutsisunut ilaasortat ilisimasakinnerusutut pingaaruteqannginnerusutullu isiginiarneqartarput. Kommunalbestyrelsini Inatsisartunilu ilaasartat ilaat nunaqarfimmi aqutsisuniit qaffasinnerusutut imminnut isigut ukiuni ingerlanerini naammattoortarpakka, tamannalu soorunami ajuusaarnarpoq.

- Suliaallu amerlasuutigut pimoorullugit tiguneqarneq ajormata sunniuteqarsinnaanerat killeqartorujussuuvoq, taanna oqarpoq.

Nunaqarfimmi aqutsisuni ilaasortat politikeritut allatuulli naligiimmik isigineqarlutik sulisinnaalissappata KANUNUPE, kommunalbestyrelsit Naalakkersuisullu iliuusissat pillugit qinigaaffiup tulliuttup ingerlanerani suliniutinik aallartitsisariaqartut, politikeri misilittagartooq aamma piniarnermik aalisarnermillu inuussutissarsiuteqartoq, Timortheus Petersen oqarpoq.