INATSISARTUT
Poulsenimut tatiginninnginnermik nittarsaasseqqittoqarpoq
Ineqarnermut attaveqaasersuutinullu Naalakkersuisoq Hans Peter Poulsen (S) tatigiunnaarlugu Atassutip tatiginninnginnermik nittarsaassiffigivaa uppisitsiniarnertilli iluatsinngilaat. Ullumikkut Naleraq aalajangersimavoq Naalakkersuisuni ilaartamut tassungaqqissaaq aamma tatiginninnginnermik nittarsaassissalluni.
Partiit illuatungiliuttut Naalakkersuisut ineqarnermut aaqqissuusseqqinnissamut suliniutaat upperinngilaat. Piffissami matumani periarfissat tamaasa atorlugit aaqqissuusseqqinneq apeqqusersoqattaarpaat, aammalu tunuarsimaanngillat Naalakkersuisumut akisussaasuusumut tatiginninnginnermik taasisitsinissamik siunnersuuteqarnissaminnut.
Assiliisoq: Leiff Josefsen
Aamma ullumikkut Inatsisartut ataatsimiinnerminni unikkallarput, tatiginninnginnermik taasisitsinissamik siunnersuuteqartoqarnera aallaavigalugu. Ippassaq Atassutip, ineqarnermut aaqqissuusseqqinnermi akisussaanerpaasoq, Naalakkersuisuni ilaasortaq, Hans Peter Poulsen (S) uppiseriaraluarpaa.
Ullumikkut Naleraq assinganik iliorpoq, Naalakkersuisuni ilaasortamut taassungaqqissaaq tatiginnikkunnaarnermik nittarsaassilluni, aamma ineqarnermut tunngatitaasumik.
Tamatumuuna illuliortiternernut aningaasalersuineq pillugu inatsisip allanngortinnissaa pillugu Inatsisartut Inatsisissaannik suliarinninnermut tunngassuteqarluni.
- Siunnersuut ineqarnermi iluarsaaqqinnerup atuutsinneqalerneranut ilaatinneqarpoq, aammalu
Ineqarnermut aningaasalersueriaatsinik nalilersuinermit inassuteqaatit aallaavigineqarlutik.
Naliliinermi naapertuutinngitsut arlallit uparuarneqarput, taakkualu allannguutissatut
siunnersuummi matumani iluarsiniarneqarput, Hans Peter Poulsen saqqummiussinermini nassuiaavoq.
Naleraq Poulsenimut paasissutissanik isertuussisimasutut pasilliuteqarpoq
- Ineqarnermut Attaveqaasersuutinullu Naalakkersuisoq Hans Peter Poulsen, siunnersuummi
UKA2024/44, Naalakkersuisorlu pineqartoq arlaleriarluni akinissaanut periarfissinneqaraluarluni,
Ineqarnermut tapiiffigineqarnerisa allanngortinnissaannut sunniutissaat, qanorlu aningaasatigut
kingunissaat, suli saqqummiunneqanngillat.
- Taamatuttaaq Ineqarnermut Attaveqaasersuutinullu Naalakkersuisoq Hans Peter Poulsen,
assinganik, siunnersuut akuerineqassatillugu, Ineqarnermut innuttaasunut atuisunut siunissamut
Ineqarnermut akiliutaalersussat kingunissaalu tamakkiisumik saqqummiunneqarnikuunngillat.
- Taamaasilluni Ineqarnermut Attaveqaasersuutinullu Naalakkersuisoq Hans Peter Poulsen,
Inatsisartut oqaluuserisassamik oqaluuserinninneranni paasissutissanik oqaluuserisap
inatsisartunit aalajangiiffigineqarnissaanut annertuumik pingaaruteqartunik nipangiussisimavoq.
- Qulaani pineqartoq tunuliaqutaralugit siunnersuuteqartariaqarpugut ullormut oqaluuserisassani
ikaarsaariarnermut tulliuttumut, Inuutissarsiornermut, Ineqarnermut Attaveqaasersuutinullu
Naalakkersuisoq peqquteqartumik tatiginnikkunnaarnermik takutitsissalluta saqqummiussivugut.
